റവ.ഫാ. ജോസ് പൈറ്റേലിന്റെ കോറെപ്പിസ്‌കോപ്പ സ്ഥാനാരോഹണം നവംബര്‍ 24 ന് ഞായറാഴ്ച്ച
ഫിലഡല്‍ഫിയ: നോര്‍ത്ത് അമേരിക്കന്‍ സിറിയന്‍ ഓര്‍ത്തഡോക്‌സ് അതി ഭദ്രാസനത്തിലെ സീനിയര്‍ വൈദികനും, ഫിലഡല്‍ഫിയ സെന്റ് പീറ്റേഴ്‌സ് കത്തീഡ്രല്‍ മുന്‍ വികാരിയുമായിരുന്ന റവ. ഫാ. ജോസ് ഡാനിയേല്‍ പൈറ്റേല്‍, കോര്‍ എപ്പിസ്‌കോപ്പ സ്ഥാനത്തേക്ക് ഉയര്‍ത്തപ്പെടുന്നു.
നവംബര്‍ 24ന് ഞായറാഴ്ച രാവിലെ ഫിലഡല്‍ഫിയ സെന്റ് പീറ്റേഴ്‌സ് കത്തീഡ്രലില്‍ വച്ച് മലങ്കര അതിഭദ്രാസനാധിപന്‍ യല്‍ദോ മോര്‍ തീത്തോസ് മെത്രാപ്പോലീത്തായുടെ പ്രധാന കാര്‍മികത്വത്തിലാണ് കോര്‍എപ്പിസ്‌കോപ്പ സ്ഥാനാരോഹണ ചടങ്ങുകള്‍ നടത്തപ്പെടുന്നത്.
കായംകുളം. ഒന്നാംകുറ്റി, പൈറ്റേല്‍ പുത്തന്‍ വീട്ടില്‍, കോശി ദാനിയേലിന്റെയും ഏലിസബെത്തിന്റെയും നാലാമത്തെ മകനായി ജനനം,
കായംകുളം ശ്രീ വിട്ടോബാ ഹൈസ്‌കൂളില്‍ നിന്നും 1970-71 ല്‍ SSLCയും, ഏം എസ് എം കോളേജില് നിന്നും പ്രീ ഡിഗ്രിയും പൂര്‍ത്തിയാക്കിയതിനുശേഷം പെരുമ്പള്ളി സെന്റ് ജയിംസ് സിറിയന്‍ തിയോള ജിക്കല്‍ സെമിനാരിയിലും, മഞ്ഞിനിക്കര മോര്‍ ഇഗ്‌നാത്തിയോസ് ദയറായിലും വൈദീക പഠനം നടത്തി.. 1976 ജനുവരി 18 ന് കായംകുളം മോര്‍ മിഖായേല്‍ മെമ്മോറിയല്‍ ആശ്രമ ചാപ്പലില്‍ വച്ചു മോര്‍ കൂറീലോസ് കുറിയാക്കോസ് മെത്രാപ്പോലീത്തായില്‍ നിന്നും ശെമ്മാശു പട്ടമേറ്റു. തുടര്‍ന്ന്, അഭിവന്ദ്യ തിരുമേനിയുടെ സെക്രട്ടറിയായി, തിരുമേനി കാലം ചെയ്യുന്നതു വരെ, ശെമ്മാശനായും, കശീശാ ആയതിനു ശേഷവും സേവനമനുഷ്ഠിച്ചു. ഡിഗ്രി പഠനത്തിന് ശേഷം, ദീപിക ദിനപത്രത്തിലും, പിന്നീട്, കൗണ്‍സിലിംഗ് പഠനത്തിനു ശേഷം, ശാന്തിഭവന്‍ മെന്റല്‍ ഹോസ്പിറ്റലിലും സേവനമനുഷ്ഠിച്ചു.
പശീത്താ സുറിയാനി ബൈബിളിന്റെ സമ്പൂര്‍ണ്ണ മലയാള പരിഭാഷയായ വിശുദ്ധ ഗ്രന്ഥത്തി ന്റെ പരിഭാഷയില്‍ വന്ദ്യ മലങ്കരമല്പാന്‍ കണിയമ്പറമ്പില്‍ അച്ചനെ സഹായിച്ചു, അതിന്റെ കയ്യെഴുത്തുപ്രതിയും, അതേ തുടര്‍ന്ന് പ്രിന്റിംഗിനു വേണ്ടിയുള്ള അതിന്റെ ഫെയര്‍ കോപ്പി തയ്യാറാക്കുവാനും, അതിന്റെ പ്രൂഫ് റീഡിംഗു ചെയ്യുവാനും, പ്രസിദ്ധീകരണത്തിന് തയ്യാറാക്കുവാനും അച്ചനെ സഹായിച്ചു. അതിനു ശേഷം, പുതിയനിയമ വ്യാഖ്യാനം എഴുതിയപ്പോഴും സമാനമായ സേവനം ചെയ്തു.
കുന്നന്താനം സെന്റ് പീറ്റേഴ്‌സ്, കാവുംഭാഗം സെന്റ് ജോര്‍ജ്ജ് കത്തീഡ്രല്‍, തിരുവനന്തപുരം സെന്റ് പീറ്റേഴ്‌സ് കത്തീഡ്രല്‍, ചേപ്പാട് സെന്റ് ജോര്‍ജ്ജ് എന്നീ ദേവാലയങ്ങളില്‍ ദീര്‍ഘകാലം വികാരിയായി സേവനം അനുഷ്ഠിച്ച ജോസ് ദാനിയേല്‍ അച്ചന്‍, 2000 ല്‍ അമേരിക്കയില്‍ എത്തി. ഫിലാഡല്‍ഫിയ സെന്റ് പീറ്റേഴ്‌സ് സിറിയക് ഓര്‍ത്തഡോക്‌സ് കത്തീഡ്രല്‍, ഹാവര്‍ടൌണ്‍ സെന്റ് പോള്‍സ് ചര്‍ച്ച് എന്നീ ദേവാലയങ്ങളില്‍ വികാരിയായി സേവനമനുഷ്ഠിച്ചു. ഫിലഡല്‍ഫിയ എക്യുമെനിക്കല്‍ ഫെലോഷിപ്പിന്റെ ചെയര്‍മനായും അദ്ദേഹം പ്രവര്‍ത്തിച്ചിട്ടുണ്ട്.
നോര്‍ത്ത് അമേരിക്കന്‍ ഭദ്രാസനത്തിലെ നവവൈദീകരുടെയും, ശെമ്മാശന്മാരുടെയും ഗുരുവും സുറിയാനി മല്പാനുമായ അച്ചന്‍, നോര്‍ത്ത് അമേരിക്കന്‍ അതിഭദ്രാസനത്തിന്റെ ആഭിമുഖ്യത്തില്‍ സൗജന്യമായി നടത്തപ്പെടുന്ന സെന്റ് ജേക്കബ് ദസ്‌റൂഗ് സ്‌കൂള്‍ ഓഫ് സിറിയക് സ്റ്റഡീസിന്റെ പ്രധാന മല്പാനും ആണ്. സുറിയാനി ഭാഷ എല്ലാ വിശ്വാസികള്‍ക്കും അഭ്യസിക്കുവാന്‍ കഴിയുന്ന ഒരു സംരംഭമായി പ്രവര്‍ത്തിച്ചുകൊണ്ടിരിക്കുന്ന ഈ സ്‌കൂളിന്റെ പ്രധാന അദ്ധ്യാപന ചുമതല നിര്‍വഹിച്ചുകൊണ്ട്, വൈദീക വിദ്യാര്‍ത്ഥികളേയും, സ്‌കൂള്‍ കലാലയ വിദ്യാര്‍ത്ഥികളെയും സുറിയാനിയും ആരാധനകളും അഭ്യസിപ്പിക്കുന്നു. സുറിയാനിഭാഷയിലുള്ള ആരാധനയുടെ ആസ്വാദ്ധ്യത വിശ്വാസികളിലേക്ക് പകരുന്നതിന് ഈ സംരംഭം പ്രയോജനപ്പെട്ടുകൊണ്ടിരിക്കുന്നു.
കോറെപ്പിസ്‌ക്കോപ്പാ പദവിയിലേക്ക് ഉയര്‍ത്തപ്പെടുന്ന തികഞ്ഞ വാഗ്മിയും സുറിയാനി പണ്ഡിതനും, സിറിയന്‍ ഓര്‍ത്തഡോക്‌സ് സഭയുടെ അഭിമാന പുരോഹിതനുമായ ബഹുമാനപ്പെട്ട ജോസച്ചന് മലയാളി മനസ്സ് യു എസ എ യുടെ പ്രാര്‍ത്ഥാനാശംസകളും, സ്‌നേഹാദരവുകളും അര്‍പ്പിക്കുന്നു.
വാര്‍ത്ത: രാജു ശങ്കരത്തില്‍, ഫിലഡല്‍ഫിയ
