സെന്റ് പീറ്റേഴ്സ് മലങ്കര കത്തോലിക്കാ പള്ളിയും എക്സ്ചേഞ്ച് ക്ലബ്ബും കൈകോര്ക്കുന്നു; കുട്ടികള്ക്കായി സ്നേഹസമ്മാനങ്ങള് കൈമാറി
ഡോ. ജോര്ജ് എം. കാക്കനാട്
സ്റ്റാഫോര്ഡ് (ടെക്സാസ്): ക്രിസ്മസ് ആഘോഷങ്ങളുടെ ഭാഗമായി സെന്റ് പീറ്റേഴ്സ് മലങ്കര കത്തോലിക്കാ പള്ളിയും പ്രമുഖ സേവന സംഘടനയായ എക്സ്ചേഞ്ച് ക്ലബ്ബും (Exchange Club) സംയുക്തമായി ജീവകാരുണ്യ പ്രവര്ത്തനം സംഘടിപ്പിച്ചു. പള്ളിയിലെ 'ഏഞ്ചല് ട്രീ' (Angel Tree) മിനിസ്ട്രിയുടെ ആഭിമുഖ്യത്തില് നിര്ധനരായ കുട്ടികളെ സഹായിക്കുന്നതിനായി നടന്ന ചടങ്ങില് എക്സ്ചേഞ്ച് ക്ലബ് ഭാരവാഹികള് അതിഥികളായെത്തി.
സെന്റ് പീറ്റേഴ്സ് മലങ്കര കത്തോലിക്കാ പള്ളി വികാരി റവ. ഡോ. ബിന്നി ഫിലിപ്പ് ചടങ്ങില് അധ്യക്ഷത വഹിച്ചു. ക്രിസ്മസ് എന്നത് ദൈവസ്നേഹം പ്രവൃത്തിയിലൂടെ പങ്കുവെക്കാനുള്ള അവസരമാണെന്ന് അദ്ദേഹം പറഞ്ഞു. എക്സ്ചേഞ്ച് ക്ലബ്ബുമായി സഹകരിക്കുന്നതിലൂടെ പ്രത്യാശയും പിന്തുണയും ആഗ്രഹിക്കുന്ന കുടുംബങ്ങളിലേക്കും കുട്ടികളിലേക്കും എത്താന് സഭയ്ക്ക് സാധിക്കുമെന്നും അദ്ദേഹം കൂട്ടിച്ചേര്ത്തു.
എക്സ്ചേഞ്ച് ക്ലബ് പ്രസിഡന്റ് ജൂലി ഫോര്ണിയര് മുഖ്യാതിഥിയായിരുന്നു. കുടുംബങ്ങളെ ശാക്തീകരിക്കുകയും കുട്ടികള്ക്ക് പിന്തുണ നല്കുകയും ചെയ്യുന്നതിലൂടെ മെച്ചപ്പെട്ട ഒരു സമൂഹം കെട്ടിപ്പടുക്കുകയാണ് തങ്ങളുടെ ലക്ഷ്യമെന്ന് അവര് പറഞ്ഞു. സഭയുമായുള്ള ഈ പങ്കാളിത്തത്തില് തങ്ങള് കൃതാര്ത്ഥരാണെന്നും ജൂലി ഫോര്ണിയര് വ്യക്തമാക്കി.
ക്രിസ്മസ് ആഘോഷത്തിന്റെ ഭാഗമായി സമാഹരിച്ച ഏകദേശം തൊണ്ണൂറോളം സമ്മാനപ്പൊതികളും സാമ്പത്തിക സഹായവും എക്സ്ചേഞ്ച് ക്ലബ്ബിന് ചടങ്ങില് കൈമാറി. കുട്ടികളുടെയും കുടുംബങ്ങളുടെയും ക്ഷേമത്തിനായി പ്രവര്ത്തിക്കുന്ന ക്ലബ്ബിന്റെ വിവിധ പദ്ധതികള്ക്കായി ഇവ വിനിയോഗിക്കും.
അലിറ്റ നെടുവേലില് ചടങ്ങില് സ്വാഗതം ആശംസിച്ചു. ഡയോസിഷന് പാസ്റ്ററല് കൗണ്സില് അംഗവും എക്സ്ചേഞ്ച് ക്ലബ് അംഗവുമായ ഡോ. ജോര്ജ് കാക്കനാട്ട് അതിഥികളെ പരിചയപ്പെടുത്തുകയും സംഘടനയുടെ സാമൂഹിക സേവനങ്ങളെക്കുറിച്ച് വിശദീകരിക്കുകയും ചെയ്തു.
സണ്ഡേ സ്കൂള് പ്രിന്സിപ്പല് സിബി തോമസ്, അധ്യാപകര് എന്നിവരുടെ നേതൃത്വത്തിലാണ് പരിപാടികള് ഏകോപിപ്പിച്ചത്. വരും കാലങ്ങളിലും സന്നദ്ധസേവനം, യുവജന പങ്കാളിത്തം, സ്കോളര്ഷിപ്പുകള് തുടങ്ങിയ മേഖലകളില് എക്സ്ചേഞ്ച് ക്ലബ്ബുമായി സഹകരിച്ച് പ്രവര്ത്തിക്കാന് സഭ ലക്ഷ്യമിടുന്നു. ക്രിസ്മസ് സന്ദേശം ഉള്ക്കൊണ്ട് വിശ്വാസവും സാമൂഹിക സേവനവും ഒന്നിപ്പിക്കുന്ന ഒരു മികച്ച മാതൃകയായി ഈ സംഗമം മാറി.
