വാഴക്കുളം: പെയിന്റ്ിങ് തൊഴിലാളിയെ കാറിൽക്കയറ്റിക്കൊണ്ടുപോയി കൊലപ്പെടുത്തിയ സംഭവത്തിൽ ഹോട്ടൽ ജീവനക്കാരൻ അറസ്റ്റിൽ. മാമലക്കണ്ടം പഴമ്പിള്ളിച്ചാൽ പള്ളിത്താഴത്ത് സുജിതിനെ (31)യാണ് വാഴക്കുളം പൊലീസ് അറസ്റ്റ് ചെയ്തിട്ടുള്ളത്.ഇയാൾ വാഴക്കുളത്തെ ഹോട്ടൽ തൊഴിലാളിയാണ് .

ഒരാഴ്ച മുമ്പ് നാട്ടിൽ നിന്നും അപ്രത്യക്ഷനായിരുന്ന വാഴക്കുളം ചാവറ കോളനിഭാഗം പേരാലിൻ ചുവട്ടിൽ സന്തോഷ് കുമാറിന്റെ ജഡം(49) ഇന്നലെ വൈകിട്ട് നേര്യമംഗലം -മൂന്നാർ പാതയിൽ അറാംമൈലിൽ നിന്നും ഒരുകിലോമീറ്ററോളം അകലെ മാമലക്കണ്ടത്തിനുള്ള പാതയോരത്ത് വനത്തിൽ നിന്നുമാണ് പൊലീസ് സംഘം കണ്ടെടുത്തിരുന്നു.

സുജിത് സന്തോഷിനെ കാറിൽ കയറ്റിക്കൊണ്ടുപോയി കൊലപ്പെടുത്തി സ്വർണ്ണമാലയും മൊബൈലും കവർന്നതായിട്ടാണ് പൊലീസ് അന്വേഷണത്തിൽ വ്യക്തമായിട്ടുള്ളത്.

കഴിഞ്ഞമാസം 28-മുതൽ സന്തോഷിനെ കാണാനില്ലന്നുകാണിച്ച് വീട്ടുകാർ പരാതിയുമായി എത്തിയതോടെയാണ് ഇത് സംമ്പന്ധിച്ച് പൊലീസ് വാഴക്കുളം പൊലീസ് അന്വേഷണം ആരംഭിച്ചത്. വ്യാപകമായി നടത്തിയ അന്വേഷണത്തിൽ ഇരുവരും 28-ന് വൈകിട്ട് ഒരുമിച്ചുണ്ടായിരുന്നതായി പൊലീസിന് ബോദ്ധ്യപ്പെട്ടു.

ഇതിന്റെ അടിസ്ഥാനത്തിൽ പൊലീസ് സുജിത്തിനെ വിളിച്ചുവരുത്തി ചോദ്യം ചെയ്തപ്പോൾ നിഷേധിച്ചു. പിന്നീട് ഇയാളുടെ മൊബൈലിലെ കോൾലിസ്റ്റ് പരിശോധിച്ചപ്പോൾ അന്ന് വൈകിട്ട് സന്തോഷിനെ വിളിച്ചതായും തെളിഞ്ഞു.തുടർന്ന് വിശദമായി ചോദ്യം ചെയ്തപ്പോൾ പണിക്കാര്യം സംസാരിക്കാനാണ് വിളിച്ചതെന്നും പറഞ്ഞ് തടിതപ്പി.

പൊലീസ് ഇത് വിശ്വാസത്തിലെടുത്തില്ല. പിന്നീട് തെളിവെടുപ്പിൽ സമീപ പ്രദേശങ്ങളിലെ ഹോട്ടലുകളിലെയും പെട്രോൾ പമ്പുകളിലേയും മറ്റും സിസി ടിവി കാമറ ദൃശ്യങ്ങൾ പരിശോധിച്ചു. ഈ നീക്കത്തിലാണ് സന്തോഷിന്റെ തിരോധാനത്തിൽ സുജിത്തിനെ നേരിട്ട് ബന്ധപ്പെടുത്തുന്ന ശക്തമായ തെളിവുകൾ പൊലീസിന് ലഭിച്ചത്.

ഇവർ ഇരുവരും നേര്യമംഗലത്തെ ഹോട്ടലിൽ ഒരുമിച്ചിരുന്ന് ഭക്ഷണം കഴിക്കുന്നതും കാറിൽ സഞ്ചരിക്കുന്നതും ഇരുമ്പുപാലത്തെ ബീവറേജസിൽ നിന്നും സന്തോഷ് മദ്യം വാങ്ങുന്നതുമായ ദൃശ്യങ്ങൾ പരിശോധനയിൽ പൊലീസിന് ലഭിച്ചു. ഇവർ സഞ്ചരിച്ചിരുന്ന് മാരുതി 800 കാർ സുജിത്തിന്റെ ആണെന്ന് വ്യക്തമായതോടെ പൊലീസ് ഇയാളെ പലവട്ടം ചോദ്യം ചെയ്തു.

ഒരിക്കൽ ഞാനവനെ കൊന്നെന്ന് സുജിത് സമ്മതിച്ചെങ്കിലും അടുത്ത നിമിഷം ഉരുണ്ടുകളിച്ച് മൊഴിമാറ്റി.പിന്നീട് എത്ര ചോദിച്ചിട്ടും ഒന്നും സമ്മതിക്കാൻ സുജിത് തയ്യാറായില്ല. പിന്നീട് ഇവർ പോയതായി വ്യക്തമായ കൊച്ചി-ധനുഷ്‌കോടി ദേശീയ പാതയിലെ നേര്യമംഗലം മുതൽ പൊലീസ് തിരച്ചിൽ ആരംഭിക്കുകയും വൈകിട്ടോടെ മൃതദ്ദേഹം കണ്ടെടുക്കുകയുമായിരുന്നു. ഇന്നലെ വൈകിട്ട് വനപ്രദേശത്ത് പൊലീസ് കാവലിൽ സൂക്ഷിച്ചിരുന്ന മൃതദ്ദേഹം മേൽ നടപടികൾക്ക് ശേഷം പോസ്റ്റുമോർട്ടത്തിനായി മാറ്റുന്നതിനുള്ള നീക്കത്തിലാണ് പൊലീസ് സംഘം.