രാമേശ്വരത്ത് നാൽപ്പത്തിയഞ്ചുകാരിയെ കൂട്ടബലാത്സംഗം ചെയ്തുകൊന്ന് മൃതദേഹം കത്തിച്ചു; ഒഡിഷ സ്വദേശികളായ ആറ് തൊഴിലാളികൾ പിടിയിൽ; യുവതി പീഡനത്തിനിരയായത് തൊഴിൽ കഴിഞ്ഞ് വീട്ടിലേക്ക് മടങ്ങവെ; മൃതദേഹം കണ്ടെത്തിയ ചെമ്മീൻ കെട്ട് അഗ്നിക്കിരയാക്കി നാട്ടുകാർ

ചെന്നൈ: തമിഴ്‌നാട്ടിലെ രാമേശ്വരത്ത് മത്സ്യത്തൊഴിലാളിയായ 45-കാരിയെ കൂട്ടബലാത്സംഗം ചെയ്ത് കത്തിച്ച് കൊന്നു. ചൊവ്വാഴ്ച മുതൽ കാണാതായ സ്ത്രീയെയാണ് കൊല്ലപ്പെട്ടനിലയിൽ കണ്ടെത്തിയത്. സംഭവവുമായി ബന്ധപ്പെട്ട് പ്രദേശത്തെ ചെമ്മീൻ ഫാമിൽ ജോലിചെയ്യുന്ന ആറ് ഒഡിഷ ്‌സ്വദേശികളായ തൊഴിലാളികളെ പൊലീസ് കസ്റ്റഡിയിലെടുത്തു. ഇവരെ വിശദമായി ചോദ്യംചെയ്തുവരികയാണ്.

കടൽത്തീരത്തു നിന്ന് ചിപ്പികളും മറ്റും ശേഖരിച്ചാണ് കൊല്ലപ്പെട്ട സ്ത്രീ കുടുംബം പുലർത്തിയിരുന്നത്. കഴിഞ്ഞദിവസവും പതിവുപോലെ ജോലിക്ക് പോയ ഇവർ രാത്രി വൈകിയിട്ടും വീട്ടിൽ തിരിച്ചെത്തിയില്ല. ഇതോടെ ഭർത്താവ് രാമേശ്വരം വടക്കാട് പൊലീസിൽ പരാതി നൽകുകയായിരുന്നു. തുടർന്ന് പൊലീസും നാട്ടുകാരും നടത്തിയ തിരച്ചിലിലാണ് മണിക്കൂറുകൾക്ക് ശേഷം ചെമ്മീൻ ഫാമിന് സമീപത്തെ ആളൊഴിഞ്ഞ സ്ഥലത്ത് പാതി കത്തിക്കരിഞ്ഞനിലയിൽ മൃതദേഹം കണ്ടെത്തിയത്.

കൂട്ടബലാത്സംഗത്തിന് ശേഷം സ്ത്രീയെ തീകൊളുത്തി കൊലപ്പെടുത്തിയെന്നാണ് നിഗമനം. സംഭവത്തിൽ ചെമ്മീൻ ഫാമിലെ ആറ്തൊഴിലാളികളെ പൊലീസ് കസ്റ്റഡിയിലെടുത്തിട്ടുണ്ട്. എന്നാൽ കേസുമായി ബന്ധപ്പെട്ട വിവരങ്ങൾ പൊലീസ് ഔദ്യോഗികമായി പുറത്തുവിട്ടിട്ടില്ല. സംഭവത്തിൽ കേസെടുത്തിട്ടുണ്ടെന്നും അന്വേഷണം തുടരുകയാണെന്നുമായിരുന്നു രാമേശ്വരം എസ്‌പി. ഇ. കാർത്തിക്കിന്റെ പ്രതികരണം.

അതേസമയം, സ്ത്രീയെ ബലാത്സംഗം ചെയ്തുകൊലപ്പെടുത്തിയെന്ന വിവരം പുറത്തുവന്നതോടെ നാട്ടുകാർ വൻ പ്രതിഷേധവുമായി രംഗത്തെത്തി. കൊല്ലപ്പെട്ട സ്ത്രീയ്ക്ക് നീതി ലഭ്യമാക്കണമെന്ന് ആവശ്യപ്പെട്ട് ഒട്ടേറെ പേരാണ് തെരുവിലിറങ്ങിയത്. പ്രതിഷേധക്കാർ റോഡ് ഉപരോധിച്ചു. കസ്റ്റഡിയിലുള്ളവർ ജോലിചെയ്യുന്ന ചെമ്മീൻ ഫാമിലേക്ക് ഇരച്ചെത്തിയ നാട്ടുകാർ ഫാം അടിച്ചുതകർക്കുകയും ചെയ്തു.