ഭോപ്പാൽ: യു.പിയിൽ മുഖ്യമന്ത്രി യോഗി ആദിത്യനാഥ് പൊതുഅവധികൾ വെട്ടിക്കുറച്ചതിന് പിന്നാലെ മധ്യപ്രദേശ് സർക്കാരും ഇരുപത്തിയഞ്ചോളം സ്‌കൂൾ അവധി ദിനങ്ങൾ റദ്ദാക്കാനൊരുങ്ങുന്നു. പ്രമുഖരുടെ ജനന മരണ വാർഷികദിനങ്ങളിലെ അവധികളാണ് റദ്ദാക്കുക. 20 മുതൽ 25 വരെ അവധിദിനങ്ങൾ റദ്ദാക്കാനാണ് ഉദ്ദേശിക്കുന്നതെന്ന് വിദ്യാഭ്യാസ മന്ത്രി ദീപക് ജോഷി പറഞ്ഞു.

ഭഗത് സിങ്ങിന്റെ ചരമവാർഷികദിനത്തിൽ അവധി നൽകിയാൽ കുട്ടികൾ അദ്ദേഹത്തെക്കുറിച്ച് എന്താണ് പഠിക്കുക, അങ്ങനെയുള്ള ദിവസങ്ങളിൽ അവധി നൽകുന്നതിന് പകരം അത് ആരുടെ ജന്മവാർഷികമോ ചരമവാർഷികമോ ആണെങ്കിലും അവരുടെ ജീവിതവും സംഭാവനകളും കുട്ടികളെ പഠിപ്പിക്കുമെന്ന് ദീപക് ജോഷി പറഞ്ഞു.

ഏതൊക്കെ അവധി ദിനങ്ങളാണ് റദ്ദാക്കേണ്ടതെന്ന് ആലോചിച്ച് വരുകയാണ്. ഒരു വിദ്യാഭ്യാസ വർഷത്തിൽ അവധി ദിനങ്ങൾ 35 ആയി ചുരുക്കിയേക്കുമെന്നും സൂചനയുണ്ട്.

മധ്യപ്രദേശ് സർക്കാരിന്റെ ഔദ്യോഗിക കലണ്ടർ പ്രകാരം 76 പൊതു അവധി ദിനങ്ങളാണുള്ളത്. ഇതിൽ 54 നിയന്ത്രിത അവധികളും ഉൾപ്പെടുന്നു. ഒരു അക്കാദമിക് വർഷത്തിൽ 150 പ്രവൃത്തിദിനങ്ങളുള്ളത് 185 ആയി വർധിപ്പിക്കാനാണ് സർക്കാർ ലക്ഷ്യമിടുന്നത്.