ഹൈദരാബാദ്: വിവാഹാഘോഷ ചടങ്ങിനിടെ വാൾപ്പയറ്റ് ഡാൻസ് ചെയ്യുന്നതിനിടെയുണ്ടായ അപകടത്തിൽ 16 വയസുകാരൻ മരിച്ചു. ഹൈദരാബാദിലെ ഷെയ്ക്പെട്ടിലാണ് സംഭവം. സയിദ് ഹമീദ് എന്ന സ്‌കൂൾ വിദ്യാർത്ഥിയാണ് മരിച്ചത്. വിവാഹച്ചടങ്ങിനിടെ വാളുകൾ കൈയിലേന്തിയുള്ള നൃത്തം ഇവിടെ പതിവാണ്. ഇത്തരത്തിൽ വാളുകളുമായി 20 വയസുകാരനായ മുഹമ്മദ് ജുനൈദ് നൃത്തം ചെയ്യുന്നത് നോക്കിനിൽക്കുകയായിരുന്നു അപകടത്തിൽപ്പെട്ട സയിദ്ഹ മീദും സുഹൃത്തുക്കളും.

ഇരുകൈകളിലും വാളുകൾ പിടിച്ച് പാട്ടിനൊപ്പം നൃത്തം ചെയ്യുകയായിരുന്ന മുഹമ്മദ് ജുനൈദ് ഇതിനിടെ നിയന്ത്രണം വിട്ട് കാണികൾക്ക് മേൽ വീഴുകയായിരുന്നു. വാളുകളിലൊന്ന് സയിദ് ഹമീദിന്റെ കഴുത്തിൽ കുത്തിക്കയറുകയായിരുന്നു. ഉടൻതന്നെ മാതാപിതാക്കളും ബന്ധുക്കളും ചേർന്ന് സമീപത്തെ ആശുപത്രിയിലേക്ക്ക് സയിദിനെ കൊണ്ടുപോയെങ്കിലും ഗുരുതരാവസ്ഥയിലായ കുട്ടിയെ പ്രവേശിപ്പിക്കാൻ ആശുപത്രി അധികൃതർ തയാറായില്ല.

മറ്റൊരു ആശുപത്രിയിലും സമാനമായ അനുഭവം ബന്ധുക്കൾക്ക് നേരിടേണ്ടിവന്നു. ഒടുവിൽ മൂന്നാമത്തെ ആശുപത്രിയിൽ പ്രവേശിപ്പിക്കുമ്പോഴേക്ക് രക്തംവാർന്ന് അവശനിലയിലായിരുന്ന സയിദ് ഹമീദ് മരണത്തിന് കീഴടങ്ങി. കഴുത്തിൽ ആഴത്തിൽ മുറിവേറ്റ അവസ്ഥയിൽ ചികിത്സ നടത്താനുള്ള സൗകര്യങ്ങൾ തങ്ങൾക്കില്ലാത്തതിനാലാണ് പ്രവേശനം നൽകാതിരുന്നതെന്നാണ് രണ്ട് ആശുപത്രികളുടെയും വിശദീകരണം.

അതേസമയം, വാളുകളുമായി നൃത്തം ചെയ്ത് അപകടത്തിനിടയാക്കിയ മുഹമ്മദ് ജുനൈദിനെ പൊലീസ് അറസ്റ്റ് ചെയ്തു.