യുപിയിൽ 50 വയസുകാരിയെ കൂട്ടബലാത്സംഗം ചെയ്തുകൊലപ്പെടുത്തി; രാത്രിയിൽ മൃതദേഹം വീട്ടിലെത്തിച്ചത് ക്ഷേത്ര പുരോഹിതനടക്കം മൂന്ന് പേർ ചേർന്ന്; വീട്ടുകാരോട് പറഞ്ഞത് കിണറ്റിൽ വീണ് മരിച്ചെന്ന്; കാലൊടിഞ്ഞെന്നും സ്വകാര്യ ഭാഗങ്ങളിൽ മുറിവേറ്റെന്നും പോസ്റ്റ്‌മോർട്ടം റിപ്പോർട്ട്; കേസിൽ രണ്ട് പേർ അറസ്റ്റിൽ
ലഖ്നൗ : ഉത്തർപ്രദേശിൽ ക്ഷേത്രദർശനത്തിന് പോയ സ്ത്രീയെ കൂട്ടബലാത്സംഗം ചെയ്തുകൊലപ്പെടുത്തി. ബദ്വാൻ ജില്ലയിലെ അങ്കണവാടി ജീവനക്കാരിയായ 50 വയസ്സുകാരിയാണ് ദാരുണമായി കൊല്ലപ്പെട്ടത്. കഴിഞ്ഞ ഞായറാഴ്ചയാണ് സംഭവം നടന്നത്.
വൈകിട്ട് ക്ഷേത്രത്തിലേക്ക് പോയ സ്ത്രീയുടെ മൃതദേഹം ക്ഷേത്ര പുരോഹിതനും മറ്റുരണ്ടുപേരും ചേർന്നാണ് വീട്ടിലെത്തിച്ചത്. കിണറ്റിൽ വീണു മരിച്ചുവെന്നാണ് പുരോഹിതനും കൂടെയുള്ളവരും വീട്ടകാരോട് പറഞ്ഞത്. മൃതദേഹം വീടിന്റെ വാതിലിന് മുന്നിൽ കിടത്തിയ ശേഷം ഇവർ വേഗം സ്ഥലം വിട്ടതോടെയാണ് വീട്ടുകാർക്ക് സംശയം ഉയർന്നത്. തുടർന്ന് തിങ്കളാഴ്ച പൊലീസിൽ പരാതി നൽകുകയായിരുന്നു.
പൊലീസ് കേസെടുത്തതോടെ മൃതദേഹം പോസ്റ്റുമോർട്ടം ചെയ്തു. പോസ്റ്റുമോർട്ടം റിപ്പോർട്ടിൽ സ്ത്രീ കൂട്ടബലാത്സംഗത്തിനിരയായി കൊല്ലപ്പെട്ടതാണെന്ന് തെളിഞ്ഞു. സ്വകാര്യഭാഗങ്ങളിൽ മുറിവേറ്റതായും കാലിന് ഒടിവ് സംഭവിച്ചിട്ടുണ്ടെന്നും കണ്ടെത്തി. സംഭവം വിവാദമായതോടെ എസ്.എസ്‌പി. അടക്കമുള്ള മുതിർന്ന പൊലീസ് ഉദ്യോഗസ്ഥർ കേസിൽ ഇടപെട്ടു.
'ക്ഷേത്രത്തിലെ പുരോഹിതനും അനുയായികളായ രണ്ടുപേരും ചേർന്ന് കൃത്യം നടത്തിയെന്നാണ് സ്ത്രീയുടെ മകന്റെ ആരോപണം. 'ഞായറാഴ്ച വൈകിട്ട് ക്ഷേത്രത്തിൽ പോയ അമ്മ മണിക്കൂറുകൾ പിന്നിട്ടിട്ടും വീട്ടിൽ തിരികെ എത്തിയിരുന്നില്ല. രാത്രി 11.30-ഓടെയാണ് പുരോഹിതനും മറ്റുള്ളവരും ചേർന്ന് അമ്മയെ വീട്ടിലെത്തിച്ചത്. അമ്മയുടെ മൃതദേഹം വീടിന്റെ വാതിലിന് മുന്നിൽ കിടത്തിയ ശേഷം ഇവർ വേഗത്തിൽ തിരികെപോവുകയും ചെയ്തു. പിന്നീട് പൂജാരിയോട് കാര്യം തിരക്കിയപ്പോൾ കിണറ്റിൽ വീണ് മരിച്ചതാണെന്നാണ് മറുപടി കിട്ടിയത്'', മകൻ പറഞ്ഞു.
സംഭവത്തിൽ രണ്ട് പ്രതികളെ അറസ്റ്റ് ചെയ്തിട്ടുണ്ടെന്നും കേസിൽ അലംഭാവം കാണിച്ച സ്റ്റേഷൻ ഹൗസ് ഓഫീസറെ സസ്പെൻഡ് ചെയ്തതായും ബദ്വാൻ ജില്ലാ പൊലീസ് മേധാവി അറിയിച്ചു. അതേസമയം, താൻ നിരപരാധിയാണെന്ന് വിശദീകരിച്ചുള്ള പുരോഹിതന്റെ വീഡിയോയും പുറത്തുവന്നിട്ടുണ്ട്.
ക്ഷേത്രത്തിൽ പ്രാർത്ഥനയ്ക്ക് വന്ന സ്ത്രീ കിണറ്റിൽ വീണതാണെന്നും താനടക്കമുള്ളവർ അവരെ രക്ഷപ്പെടുത്താൻ ശ്രമിച്ചെന്നുമാണ് വീഡിയോയിൽ പറയുന്നത്. സ്ത്രീയെ വീട്ടിൽ എത്തിച്ചപ്പോൾ ജീവനുണ്ടായിരുന്നതായും പുരോഹിതൻ വിശദീകരിക്കുന്നുണ്ട്.
