നായ കുറുകെ ചാടിയതിനെ തുടർന്നുണ്ടായ അപകടം; ഓട്ടോറിക്ഷ ഡ്രൈവറായ വനിത മരിച്ചു

കോട്ടയം: ഉഴവൂരിൽ നായ കുറുകെ ചാടിയതിനെ തുടർന്നുണ്ടായ അപകടത്തിൽ ഓട്ടോറിക്ഷാ ഡ്രൈവറായ വനിത മരിച്ചു. ഉഴവൂർ ടൗൺ സ്റ്റാൻഡിൽ ആറ് വർഷമായി ഓട്ടോറിക്ഷ ഓടിക്കുന്ന കരുനെച്ചി ശങ്കരാശേയിൽ വിജയമ്മ (54) ആണ് വെളിയന്നൂർമംഗലത്താഴം റോഡിൽ പടിഞ്ഞാറ്റെപ്പീടിക ഭാഗത്തുണ്ടായ അപകടത്തിൽ മരിച്ചത്. രാവിലെ ഏഴരയോടെയായിരുന്നു സംഭവം.

രാവിലെ വെളിയന്നൂർ നിന്നും കൂത്താട്ടുകുളം ഭാഗത്തേക്ക് ആദ്യത്തെ ഓട്ടം പോകുമ്പോഴായിരുന്നു നാടിനെ നടുക്കിയ അപകടമുണ്ടായത്. ഓട്ടോയിൽ ഉണ്ടായിരുന്ന രണ്ട് യാത്രക്കാർക്ക് നിസാര പരിക്കേറ്റിട്ടുണ്ട്. അപകടത്തിൽ ഗുരുതരമായി പരിക്കേറ്റ വിജയമ്മയെ ഉടൻ സമീപത്തെ ആശുപത്രിയിൽ എത്തിച്ചെങ്കിലും ജീവൻ രക്ഷിക്കാനായില്ല.സർക്കാരിന്റെ ധനസഹായത്താൽ വനിതകൾക്കുള്ള പദ്ധതിയുടെ ഭാഗമായി വാങ്ങിയ ഓട്ടോറിക്ഷയാണ് അപകടത്തിൽപ്പെട്ടത്.

കഴിഞ്ഞ അഞ്ച് വർഷമായി ഓട്ടോ ഓടിച്ചാണ് വിജയമ്മ കുടുംബം നോക്കിയിരുന്നത്. ഭർത്താവ് പെയിന്റിങ് തൊഴിലാളിയാണ്. മൃതദേഹം കൂത്താട്ടുകുളം ദേവമാതാ ആശുപത്രിയിലേക്ക് മാറ്റി.