കണ്ണപുരത്ത് കറൻസിയുമായി പോയ പിക്കപ്പ് വാൻ ലോറിയുമായി കൂട്ടിയിടിച്ച് ഡ്രൈവർ മരിച്ചു; നാല് പേർക്ക് പരിക്ക്

കണ്ണൂർ: കണ്ണുർ നഗരത്തിനടുത്തെ കണ്ണപുരത്ത് പൊതുമേഖലാ ബാങ്കിൽ നിന്നും കറൻസിയുമായി പോകുന്ന വാഹനം മറ്റൊരു വാഹനത്തിലിടിച്ച് ഒരാൾ മരിച്ചു.കണ്ണപുരം യോഗശാലക്ക് സമീപമാണ് വാഹനങ്ങൾ കൂട്ടിയിടിച്ചത്. അപകടത്തിൽ ഒരാൾ മരിക്കുകയും നാല് പേർക്ക് പരിക്കേൽക്കുകയും ചെയ്തു.

വെള്ളിയാഴ്‌ച്ച വൈകുന്നേരം മൂന്ന് മണിയോടെയാണ് അപകടം നടന്നത്. ഐസിഐസിഐ ബാങ്കിൽ നിന്നും കറൻസിയുമായി ബാംഗ്ലൂരിലേക്ക് പോകുന്ന പിക്കപ്പ് വാനും പഴയങ്ങാടി ഭാഗത്ത് നിന്ന് കണ്ണൂരിലേക്ക് വരികയായിരുന്ന ലോറിയുമാണ് കൂട്ടിയിടിച്ചത്.

മംഗലാപുരം ബൽത്തങ്ങാടി സ്വദേശി കെ ജയപ്രകാശ് (47)ആണ് മരണപ്പെട്ടത്. പ്രശാന്ത് (40), ഉമേഷ് (52), പൊന്നപ്പ(53) എന്നിവരെ കണ്ണൂർ മെഡിക്കൽ കോളേജിലും ബാലകൃഷ്ണൻ (45) നെ കണ്ണൂർ ജില്ലാ ആശുപത്രിയിലും പ്രവേശിപ്പിച്ചു.അപകടത്തെ തുടർന്ന് ഈ റൂട്ടിൽ ഏറെ നേരം ഗതാഗതം മുടങ്ങി.കണ്ണപുരം പൊലിസും ഫയർഫോഴ്‌സും സ്ഥലത്തെത്തി രക്ഷാപ്രവർത്തനം നടത്തി.