'ഇനി നടക്കപോറത് യുദ്ധം..'; ഏവരും കാത്തിരുന്ന 'ഹൃദയപൂർവ്വം' ഡിലീറ്റഡ് സീൻ പുറത്ത്; കാണാൻ കൊതിച്ചതെന്ന് ആരാധകർ

പ്രിയതാരം മോഹൻലാൽ നായകനായി എത്തിയ ഏറ്റവും പുതിയ ചിത്രമായ 'ഹൃദയപൂർവ്വം' റിലീസ് ചെയ്തതിന് പിന്നാലെ ചിത്രത്തിലെ ഒരു നീക്കം ചെയ്ത രംഗം പുറത്തുവിട്ടു. സംവിധായകൻ സത്യൻ അന്തിക്കാട്, മോഹൻലാൽ എന്നിവർ വീണ്ടും ഒന്നിച്ച ഈ ചിത്രത്തിന്റെ പ്രധാന ആകർഷണങ്ങളിലൊന്നായിരുന്നു ഈ രംഗം. സംഗീത് പ്രതാപിന്റെയും അനൂപ് സത്യന്റെയും സോഷ്യൽ മീഡിയ പേജുകൾ വഴിയാണ് ഈ ദൃശ്യം പ്രേക്ഷകരിലേക്ക് എത്തിയിരിക്കുന്നത്.

ആശുപത്രി പശ്ചാത്തലത്തിൽ മോഹൻലാലും നടനും സംവിധായകനുമായ സംഗീത് പ്രതാപും തമ്മിലുള്ള സംഭാഷണങ്ങളടങ്ങിയതാണ് പുറത്തുവിട്ട ഈ രംഗം. "ഇനി നടക്കാൻ പോകുന്നത് യുദ്ധമല്ല", "എന്റെ പിള്ളേരെ തൊടാൻ നോക്കരുത്" എന്നിങ്ങനെയുള്ള ഡയലോഗുകൾ ഉൾപ്പെട്ട രംഗം സാമൂഹ്യ മാധ്യമങ്ങളിൽ ഇതിനോടകം ശ്രദ്ധ നേടിക്കഴിഞ്ഞു.

ഓഗസ്റ്റ് 28നാണ് 'ഹൃദയപൂർവ്വം' തിയറ്ററുകളിൽ എത്തിയത്. പത്ത് വർഷത്തെ ഇടവേളയ്ക്ക് ശേഷം മോഹൻലാലും സത്യൻ അന്തിക്കാടും ഒന്നിച്ച ചിത്രം കൂടിയായിരുന്നു ഇത്. 2015ൽ പുറത്തിറങ്ങിയ 'എന്നും എപ്പോഴും' എന്ന ചിത്രത്തിന് ശേഷമാണ് ഇരുവരും വീണ്ടും ഒരുമിച്ചത്.

ലാൽ, ലാലു അലക്സ്, സംഗീത് പ്രതാപ്, മാളവിക മോഹനൻ, സംഗീത, സിദ്ദിഖ്, ബാബുരാജ്, സബിതാ ആനന്ദ് തുടങ്ങിയ വലിയ താരനിര തന്നെ ചിത്രത്തിലുണ്ടായിരുന്നു. ആശിർവാദ് സിനിമാസും സത്യൻ അന്തിക്കാടും ഒന്നിക്കുന്ന അഞ്ചാമത്തെ ചിത്രം കൂടിയാണ് 'ഹൃദയപൂർവ്വം'.