കയ്യടി നേടി ദിൻജിത് അയ്യത്താൻ ഒരുക്കിയ മിസ്റ്ററി ത്രില്ലർ; ബോക്സ്ഓഫീസിലും തരംഗമായി 'എക്കോ'; ഒൻപത് ദിവസം പിന്നിടുമ്പോൾ ചിത്രം നേടിയത് 25 കോടി

കൊച്ചി: ദിൻജിത് അയ്യത്താൻ സംവിധാനം ചെയ്ത മിസ്റ്ററി ത്രില്ലർ ചിത്രം 'എക്കോ' ബോക്സ്ഓഫീസിൽ തരംഗം സൃഷ്ടിച്ച് മുന്നേറുന്നു. റിലീസ് ചെയ്ത് ഒൻപത് ദിവസം പിന്നിടുമ്പോൾ ചിത്രം ആഗോളതലത്തിൽ 25 കോടി രൂപയുടെ ഗ്രോസ് കളക്ഷൻ നേടിയതായാണ് റിപ്പോർട്ടുകൾ. മികച്ച പ്രേക്ഷക പ്രതികരണവും നിരൂപക പ്രശംസയും നേടി രണ്ടാം വാരത്തിലേക്ക് കടന്ന 'എക്കോ' കേരളത്തിലെ ബോക്സ്ഓഫീസ് വിജയങ്ങളിൽ ഒന്നായി മാറിയതായാണ് സിനിമാ വൃത്തങ്ങൾ വിലയിരുത്തുന്നത്.

നിർമ്മാതാക്കൾ ഔദ്യോഗിക കളക്ഷൻ കണക്കുകൾ ഇതുവരെ പുറത്തുവിട്ടിട്ടില്ലെങ്കിലും, ചിത്രത്തിന്‍റെ സ്വീകാര്യത വ്യക്തമാക്കുന്നതാണ് ബുക്ക് മൈ ഷോയിലെ ടിക്കറ്റ് വിൽപ്പന. കഴിഞ്ഞ ദിവസം മാത്രം 71,730 ടിക്കറ്റുകളാണ് വിറ്റഴിഞ്ഞത്. ഇതുവരെ 5,68,000 ടിക്കറ്റുകൾ ബുക്ക് മൈ ഷോ വഴി വിറ്റഴിച്ചു. റിലീസ് ചെയ്ത് പത്താം ദിവസമായ ഇന്ന് കേരളത്തിലെ പ്രമുഖ തിയറ്റർ കേന്ദ്രങ്ങളിൽ ആദ്യ ദിനത്തേക്കാൾ മൂന്നിരട്ടി അധികം പ്രദർശനങ്ങളാണ് 'എക്കോ'യ്ക്കായി നടക്കുന്നത്.

കേരളത്തിൽ 182 സ്ക്രീനുകളിൽ പ്രദർശനം ആരംഭിച്ച ചിത്രം രണ്ടാം വാരത്തിൽ 249 സ്ക്രീനുകളിലേക്ക് വ്യാപിച്ചു. ഗൾഫ് രാജ്യങ്ങളിൽ രണ്ടാം വാരത്തിൽ 110 സ്ക്രീനുകളിലും 'എക്കോ' പ്രദർശിപ്പിക്കുന്നുണ്ട്. പ്രേക്ഷകരുടെ ആവശ്യപ്രകാരം മറ്റ് വിദേശ രാജ്യങ്ങളിലും കൂടുതൽ സ്ക്രീനുകളിലേക്ക് ചിത്രം ഉടൻ എത്തുമെന്നും അണിയറപ്രവർത്തകർ അറിയിച്ചു. ചിത്രത്തിന്‍റെ മെയ്ക്കിംഗും താരങ്ങളുടെ പ്രകടനവും ഒരുപോലെ കയ്യടി നേടുന്നുണ്ട്.

'കിഷ്കിന്ധാകാണ്ഡം' എന്ന ചിത്രത്തിനുശേഷം സംവിധായകൻ ദിൻജിത് അയ്യത്താനും എഴുത്തുകാരനും ഛായാഗ്രാഹകനുമായ ബാഹുൽ രമേശും ചേർന്നൊരുക്കിയ ഈ മിസ്റ്ററി ത്രില്ലർ, സിനിമാസ്വാദകർക്ക് തിയറ്ററിൽ ഒരു പുത്തൻ ദൃശ്യാനുഭവമാണ് നൽകുന്നത്. എം.ആർ.കെ. ജയറാം ആരാധ്യ സ്റ്റുഡിയോസിന്റെ ബാനറിൽ നിർമ്മിച്ച 'എക്കോ'യിൽ സന്ദീപ് പ്രദീപ്, സൗരബ് സച്ച്‌ദേവാ, വിനീത്, നരേൻ, അശോകൻ, ബിനു പപ്പു, സഹീർ മുഹമ്മദ്, ബിയാന മോമിൻ, സീ ഫൈ, രഞ്ജിത് ശങ്കർ, ശ്രീലക്ഷ്മി എന്നിവരാണ് പ്രധാന കഥാപാത്രങ്ങളെ അവതരിപ്പിക്കുന്നത്. മുജീബ് മജീദാണ് സംഗീതവും സൂരജ് ഇ.എസ് എഡിറ്റിംഗും നിർവഹിച്ചിരിക്കുന്നത്.