കൊത്തയുടെ ക്ഷീണം തീർക്കാൻ ദുൽഖർ; പാൻ ഇന്ത്യൻ ചിത്രം 'ലക്കി ഭാസ്‍കര്‍'ന്റെ ട്രെയ്‌ലർ പുറത്ത്; ത്രില്ലടിപ്പിക്കുമെന്ന് ഉറപ്പ്
പ്രേക്ഷകർ ഏറെ പ്രതീക്ഷയോടെ കാത്തിരിക്കുന്ന ദുൽഖർ ചിത്രമായ 'ലക്കി ഭാസ്‍കര്‍'ന്റെ ട്രെയ്‌ലർ പുറത്ത്. വെങ്കി അറ്റ്ലൂരിയാണ് പാന്‍ ഇന്ത്യന്‍ തെലുങ്ക് ചിത്രം സംവിധാനം ചെയ്തിരിക്കുന്നത്. 'ലക്കി ഭാസ്‍കര്‍' ഒക്ടോബര്‍ 31 ന് തിയറ്ററുകളിലെത്തും. 1980 - 1990 കാലഘട്ടത്തിലെ മുംബൈ നഗരത്തിന്റെ പശ്ചാത്തലത്തിൽ കഥ പറയുന്ന ഈ പീരീഡ് ഡ്രാമയാണ് ചിത്രം. ഒരു ബാങ്ക് കാഷ്യറുടെ വേഷമാണ് ദുൽഖർ സൽമാൻ അവതരിപ്പിക്കുന്നത്. രണ്ടര മിനിറ്റ് ദൈര്‍ഘ്യമുള്ള ട്രെയ്‌ലർ ആണ് ഇന്ന് പുറത്തെത്തിയിരിക്കുന്നത്. വെങ്കി അറ്റ്ലൂരി തന്നെയാണ് ചിത്രത്തിന്റെ രചനയും നിര്‍വ്വഹിച്ചിരിക്കുന്നത്.
ഒരു ബിഗ് ബജറ്റ് ചിത്രമാണ് 'ലക്കി ഭാസ്കർ'. വാത്തി എന്ന ബ്ലോക്ക്ബസ്റ്റർ ധനുഷ് ചിത്രത്തിന് ശേഷം വെങ്കി അറ്റ്ലൂരി സംവിധാനം ചെയ്ത ചിത്രം ഹൈദരാബാദിലാണ് ചിത്രീകരണം പൂർത്തിയാക്കിയത്. പ്രശസ്ത പ്രൊഡക്ഷൻ ഡിസൈനർ ബംഗ്ലാന്റെ നേതൃത്വത്തിൽ ഒരുക്കിയ വമ്പൻ സെറ്റുകളിലാണ് ചിത്രീകരിച്ചിരിക്കുന്നത്. പീരീഡ് ഡ്രാമ ത്രില്ലറായി ഒരുക്കിയിരിക്കുന്ന ചിത്രം തീയേറ്ററുകളിൽ വമ്പൻ വിജയമായിരിക്കുമെന്നാണ് പ്രതീക്ഷ.
മീനാക്ഷി ചൗധരി നായികാ വേഷം ചെയ്യുന്ന ലക്കി ഭാസ്കറിൽ ഹൈപ്പർ ആദി, സൂര്യ ശ്രീനിവാസ് എന്നിവരാണ് മറ്റു പ്രധാന താരങ്ങൾ. ചിത്രം, തെലുങ്ക്, തമിഴ്, മലയാളം, ഹിന്ദി ഭാഷകളിലാണ് പ്രദർശനത്തിനെത്തുക. ദുൽഖർ സൽമാന്റെ ഉടമസ്ഥതയിലുള്ള വേഫെറർ ഫിലിംസാണ് ഈ ചിത്രം കേരളത്തിൽ വിതരണം ചെയ്യുന്നത്.
സിതാര എന്റർടെയ്ന്‍‍മെന്‍റ്സ് ചിത്രം നിർമ്മിച്ചിരിക്കുന്നത്. സൂര്യദേവര നാഗവംശി, സായി സൗജന്യ എന്നിവരുടെ നേതൃത്വത്തിലുള്ള സിതാര എന്റർടൈൻമെൻറ്സും ഫോർച്യൂൺ ഫോർ സിനിമാസും ചേർന്ന് നിർമ്മിച്ചിരിക്കുന്ന ലക്കി ഭാസ്കർ ശ്രീകര സ്റ്റുഡിയോസാണ് അവതരിപ്പിക്കുന്നത്. ലക്കി ഭാസ്കറിന് സംഗീതമൊരുക്കിയത് ജി വി പ്രകാശ് കുമാറാണ്, ഛായാഗ്രഹണം നിർവഹിച്ചിരിക്കുന്നത് നിമിഷ് രവി എന്നിവരാണ്. എഡിറ്റിംഗ് നവീൻ നൂലി, പിആർഒ ശബരി എന്നിവരാണ്.