ഇനി ഡബിൾ മോഹനന്റെ ഊഴം; ത്രില്ലടിപ്പിക്കാൻ പൃഥ്വിരാജിന്റെ 'വിലായത്ത് ബുദ്ധ'; ചിത്രം നാളെ മുതൽ തിയേറ്ററുകളിലേക്ക്

കൊച്ചി: മലയാള സിനിമയിൽ ഏറെ പ്രതീക്ഷയോടെ കാത്തിരിക്കുന്ന ആക്ഷൻ ത്രില്ലറായ 'വിലായത്ത് ബുദ്ധ' നവംബർ 21-ന് ലോകമെമ്പാടുമുള്ള തിയേറ്ററുകളിൽ എത്തുകയാണ്. നടൻ പൃഥ്വിരാജ് സുകുമാരൻ നായകനായെത്തുന്ന ചിത്രം ജി.ആർ. ഇന്ദുഗോപൻ എഴുതിയ അതേ പേരിലുള്ള പ്രശസ്തമായ നോവലിനെ അടിസ്ഥാനമാക്കിയാണ് ഒരുക്കിയിരിക്കുന്നത്. ജെ എൻ നമ്പ്യാർ സംവിധാനം ചെയ്യുന്ന ഈ ചിത്രം, മറയൂരിലെ ചന്ദനക്കാടുകളുടെ പശ്ചാത്തലത്തിൽ പ്രതികാരത്തിന്റെയും സ്നേഹത്തിന്റെയും വൈര്യത്തിന്റെയും കഥ പറയുന്നു.

ചിത്രത്തിൽ പൃഥ്വിരാജ് അവതരിപ്പിക്കുന്നത് 'ഡബിൾ മോഹനൻ' എന്ന കുപ്രസിദ്ധനായ ചന്ദനക്കടത്തുകാരനെയാണ്. മോഹനന്റെ കഥ ഒരു സാധാരണ ത്രില്ലർ എന്നതിലുപരി, വികാരപരവും ധാർമികവുമായ സംഘർഷങ്ങളുടെ കഥ കൂടിയാണ്. ചിത്രത്തിന്റെ ഹൈലൈറ്റ്, മോഹനനും അദ്ദേഹത്തിന്റെ മുൻ ഗുരുവായ ഭാസ്‌കരൻ മാസ്റ്ററുമായിട്ടുള്ള (ഷമ്മി തിലകൻ) ഏറ്റുമുട്ടലാണ്.

വർഷങ്ങളായി സ്വന്തം പറമ്പിൽ താൻ വളർത്തുന്നതും 'വിലായത്ത് ബുദ്ധ' എന്ന് വിളിപ്പേരുള്ളതുമായ വിലയേറിയ ചന്ദനമരം മുറിക്കാൻ ശ്രമിക്കുന്ന മോഹനനെതിരെ മാസ്റ്റർ നടത്തുന്ന പോരാട്ടമാണ് കഥയുടെ കേന്ദ്രബിന്ദു. ഷമ്മി തിലകന്റെ മികച്ച പ്രകടനവും പൃഥ്വിരാജിന്റെ മാസ് അവതാരവും ഈ ഗുരുവ - ശിഷ്യ പോരാട്ടത്തിന് തീവ്രത നൽകുന്നു. പ്രിയംവദ കൃഷ്ണനാണ് ചിത്രത്തിലെ നായിക. സിനിമയുടെ ട്രെയിലർ പുറത്തിറങ്ങിയതിന് പിന്നാലെ സോഷ്യൽ മീഡിയയിൽ വലിയ ചർച്ചയായ ഒരു വിഷയം, അല്ലു അർജുൻ ചിത്രം 'പുഷ്പ'യുമായുള്ള താരതമ്യമാണ്.

സമാനമായ ചന്ദനക്കടത്ത് പശ്ചാത്തലവും നായകന്റെ റഫ് ലുക്കും കാരണമാണ് പ്രേക്ഷകർ ഈ താരതമ്യം നടത്തിയത്. എന്നാൽ, ഈ വിഷയത്തിൽ പൃഥ്വിരാജ് കൃത്യമായ മറുപടി നൽകിയിരുന്നു. "ഈ സിനിമയുടെ കഥ സംവിധായകൻ സച്ചി (പരേതനായ) എന്നോട് പറയുമ്പോൾ 'പുഷ്പ'യുടെ ആദ്യ ഭാഗം പോലും റിലീസായിരുന്നില്ല. ഞങ്ങളുടെ സ്ക്രിപ്റ്റ് ആദ്യം വന്നതാണ്. കഥാപാത്രങ്ങൾ തമ്മിൽ യാതൊരു സാമ്യവുമില്ല, ട്രെയിലറിലെ ചില ഡയലോഗുകൾ പ്രൊമോഷന്റെ ഭാഗമായി ചേർത്തതാണ്" എന്ന് അദ്ദേഹം വ്യക്തമാക്കി.

ഉർവശി തിയേറ്റേഴ്‌സിന്റെ ബാനറിൽ സന്ദീപ് സേനൻ നിർമ്മിക്കുന്ന ഈ ചിത്രത്തിന്റെ തിരക്കഥ ജി.ആർ. ഇന്ദുഗോപനും രാജേഷ് പിന്നാടനും ചേർന്നാണ് ഒരുക്കിയിരിക്കുന്നത്. ജേക്ക്‌സ് ബിജോയ് സംഗീതവും, 'കാന്താര'യിലൂടെ ശ്രദ്ധേയനായ അരവിന്ദ് എസ്. കാശ്യപും റെനദിവും ഛായാഗ്രഹണവും നിർവഹിക്കുന്നു. ചിത്രം ആദ്യം സംവിധാനം ചെയ്യാൻ തീരുമാനിച്ചിരുന്നത് അന്തരിച്ച സംവിധായകൻ സച്ചിയായിരുന്നു. എന്നാൽ അദ്ദേഹത്തിന്റെ അകാല വിയോഗത്തെ തുടർന്നാണ് സഹസംവിധായകനായിരുന്ന ജെ.യൻ നമ്പ്യാർ ഈ പ്രോജക്ട് ഏറ്റെടുത്തത്.

ട്രെയിലർ ലോഞ്ച് വേളയിൽ സച്ചിയെയും, ഷമ്മി തിലകന്റെ പ്രകടനത്തെ പ്രശംസിച്ചുകൊണ്ട് അന്തരിച്ച മഹാനടൻ തിലകനെക്കുറിച്ചും പൃഥ്വിരാജ് വികാരാധീനനായി സംസാരിച്ചിരുന്നു. വൻ താരനിരയും സാങ്കേതിക മികവും കൊണ്ട് ശ്രദ്ധേയമായ 'വിളയാത്ത് ബുദ്ധ', മലയാളി പ്രേക്ഷകർക്ക് ഒരു തീവ്രമായ ആക്ഷൻ അനുഭവം സമ്മാനിക്കുമെന്ന ഉറപ്പിലാണ് നവംബർ 21-ന് തിയേറ്ററുകളിലേക്ക് എത്തുന്നത്.