'സിൽക്ക് സ്മിത പോലും വളരെ ലളിതവും മാന്യവുമായാണ് വസ്ത്രങ്ങൾ ധരിച്ചിരുന്നത്'; ഇപ്പോഴത്തെ നടിമാർ ആ വ്യത്യാസം തിരിച്ചറിയണം; ശിവജിക്ക് പിന്നാലെ വിവാദത്തിലായി നടന് സുമന്
ചെന്നൈ: സിനിമയും യഥാർത്ഥ ജീവിതവും രണ്ടാണെന്നും, അതിനാൽ വസ്ത്രധാരണ രീതിയും അതിനനുസരിച്ച് മാറ്റണമെന്നും നടൻ സുമൻ. നടിമാരുടെ വസ്ത്രധാരണം സംബന്ധിച്ചുള്ള നടന് ശിവജിയുടെ പ്രസ്താവനയ്ക്ക് പിന്നാലെയാണ് സുമന്റെ പരാമർശങ്ങൾ. ശിവജിയുടെ ആശങ്കകൾ ശരിയായിരിക്കാമെന്നും, എന്നാൽ അദ്ദേഹം അത് പ്രകടിപ്പിച്ച രീതിയും ഉപയോഗിച്ച വാക്കുകളും തെറ്റായിപ്പോയെന്നും സുമൻ വ്യക്തമാക്കി.
സിൽക്ക് സ്മിത, ജയമാലിനി, വിജയലളിത തുടങ്ങിയ നടിമാർ സ്ക്രീനിൽ ഗ്ലാമറസ് വേഷങ്ങളിൽ പ്രത്യക്ഷപ്പെട്ടിരുന്നുവെങ്കിലും, യഥാർത്ഥ ജീവിതത്തിൽ വളരെ ലളിതവും മാന്യവുമായ വസ്ത്രങ്ങൾ ധരിച്ചവരായിരുന്നു. ആധുനികകാലത്തെ നടിമാർ ഈ വ്യത്യാസം തിരിച്ചറിയണം. പഴയകാല നടിമാർക്ക് വസ്ത്രധാരണത്തിൽ മികച്ച അച്ചടക്കം ഉണ്ടായിരുന്നുവെന്നും, എവിടെ എങ്ങനെ പെരുമാറണമെന്ന് അവർക്ക് കൃത്യമായ ധാരണയുണ്ടായിരുന്നുവെന്നും സുമൻ ചൂണ്ടിക്കാട്ടി. ഏത് വസ്ത്രമാണ് എവിടെ ഉചിതമെന്നും എവിടെ അല്ലാ എന്നും അവർക്ക് വ്യക്തമായി അറിയാമായിരുന്നു എന്നും അദ്ദേഹം കൂട്ടിച്ചേർത്തു.
മുമ്പ്, ശരീരം തുറന്നുകാണിക്കുന്ന വസ്ത്രങ്ങൾ ധരിക്കരുതെന്നും സാരിയോ അല്ലെങ്കിൽ ശരീരം മുഴുവനായി മൂടുന്ന വസ്ത്രങ്ങളോ ധരിക്കാനുമായിരുന്നു ശിവജി നായികമാരോട് അഭ്യർത്ഥിച്ചത്. മുഴുവനായി മൂടുന്ന വസ്ത്രത്തിലോ സാരിയിലോ ആണ് സൗന്ദര്യമെന്നും ശരീരഭാഗങ്ങൾ തുറന്നുകാണിക്കുന്നതിലല്ലെന്നും അദ്ദേഹം അഭിപ്രായപ്പെട്ടിരുന്നു. ഈ പരാമർശത്തിൽ വനിതാ കമ്മീഷൻ കേസെടുത്തതോടെ ശിവജി മാപ്പ് പറയുകയും ചെയ്തിരുന്നു.