ഇരുപതാം വയസ്സിൽ ആദ്യ വിവാഹം; അന്നേരം ജീവിതത്തിൽ വലിയ പ്ലാനിങ്ങ് ഒന്നും ഇല്ലായിരുന്നു; അതുവഴി ഞാൻ ഒരു കാര്യം പഠിച്ചു; എല്ലാം തുറന്നുപറഞ്ഞ് അപ്സര

മിനിസ്‌ക്രീൻ പ്രേക്ഷകരുടെ പ്രിയതാരവും 'സാന്ത്വനം' സീരിയലിലെ ജയന്തി എന്ന പ്രതിനായക കഥാപാത്രത്തിലൂടെയും ബിഗ് ബോസ് മലയാളം സീസൺ 6 ലെ മത്സരാർത്ഥി എന്ന നിലയിലും ശ്രദ്ധേയയായ നടി അപ്സര രത്നാകരൻ, തന്റെ കരിയറിനെക്കുറിച്ചും വ്യക്തിജീവിതത്തിലെ നിർണായക തീരുമാനങ്ങളെക്കുറിച്ചും തുറന്നുപറഞ്ഞ പുതിയ അഭിമുഖം ശ്രദ്ധ നേടുന്നു. നിരവധി പുരസ്കാരങ്ങൾ നേടിയിട്ടും താൻ ആഗ്രഹിച്ച പ്രൊഫഷണൽ നിലയിലേക്ക് എത്തിയിട്ടില്ലെന്ന് വെളിപ്പെടുത്തിയ അപ്സര, ചെറുപ്രായത്തിലെ വിവാഹത്തെക്കുറിച്ച് യുവതലമുറയ്ക്ക് ശക്തമായ മുന്നറിയിപ്പും നൽകി.

സംസ്ഥാന അവാർഡ് ഉൾപ്പെടെ പന്ത്രണ്ടോളം പുരസ്കാരങ്ങളും ബഡായി ബംഗ്ലാവ്, ബിഗ് ബോസ് തുടങ്ങിയ നിരവധി ഷോകളും മുപ്പത്താറോളം സീരിയലുകളും ചെയ്തിട്ടുണ്ടെന്നും അപ്സര പറയുന്നു. കഴിവില്ലാത്ത ഒരാൾക്ക് ഇത്രയധികം നേട്ടങ്ങൾ കൈവരിക്കാൻ സാധിക്കില്ലെന്നും എന്നാൽ താൻ ആഗ്രഹിച്ചിടത്ത് എത്തിച്ചേർന്നിട്ടില്ലെന്നുമുള്ള നിരീക്ഷണവും താരം പങ്കുവെച്ചു. ഷെൽഫിൽ പുരസ്കാരങ്ങൾ നിരത്തിയിട്ടുണ്ടെങ്കിലും, അത്രയൊന്നും അംഗീകാരങ്ങൾ ലഭിക്കാത്തവർ പോലും കരിയറിൽ വലിയ ഉയരങ്ങളിലെത്തിയിട്ടുണ്ടെന്നും അവർ കൂട്ടിച്ചേർത്തു.

തന്റെ ജീവിതത്തിലെ വഴിത്തിരിവ് 16 വയസ് മുതൽ 19 വയസ് വരെയുള്ള കാലഘട്ടമായിരുന്നുവെന്നും, 16-ാം വയസ്സിൽ സീരിയൽ രംഗത്തേക്ക് കടന്നുവന്നതായും അപ്സര വിശദീകരിച്ചു. യാതൊരു മുൻധാരണകളോ ആസൂത്രണമോ ഇല്ലാതെ 19-20 വയസ്സിൽ ആദ്യ വിവാഹം നടന്നതായും അവർ വെളിപ്പെടുത്തി. ഈ പ്രായത്തിൽ ആരും വിവാഹം കഴിക്കരുതെന്നും, വ്യവസായത്തിലേക്ക് കടന്നുവരുന്നവരോട് ജീവിതത്തിലും തൊഴിലിലും ശ്രദ്ധ കേന്ദ്രീകരിക്കണമെന്നും അവർ ഉപദേശിച്ചു. മറ്റൊരാൾക്കുവേണ്ടി സമയവും ജീവിതവും സ്നേഹവും പൂർണമായും നിക്ഷേപിക്കരുതെന്നും, എപ്പോഴും സ്വയം മുൻഗണന നൽകണമെന്നും അപ്സര ഓർമ്മിപ്പിച്ചു.