ആ രോഗം മാറിയതും പിന്നാലെ ബ്ലീഡിം​ഗ് തുടങ്ങി; സഹിക്കാൻ പറ്റാത്ത വേദന; അതിനിടെ, ഒരുപാട് തവണ ആശുപത്രിയിലായി; ഗർഭകാല അനുഭവങ്ങൾ പറഞ്ഞ് നടി ദുർ​ഗ

മലയാള സിനിമാതാരം ദുർഗ കൃഷ്ണയുടെ ഗർഭകാലം നിരവധി വെല്ലുവിളികൾ നിറഞ്ഞതായിരുന്നുവെന്ന് നടി വെളിപ്പെടുത്തി. നാലാം മാസത്തിൽ കോവിഡ് ബാധിച്ചതിനെക്കുറിച്ചും തുടർച്ചയായുണ്ടായ രക്തസ്രാവത്തെയും രക്തത്തിലെ അണുബാധയെയും കുറിച്ച് ദുർഗ തുറന്നുപറഞ്ഞു. അടുത്തിടെയാണ് ദുർഗ ഒരു പെൺകുഞ്ഞിന് ജന്മം നൽകിയത്.

പ്രസവത്തിനായി ആശുപത്രിയിൽ പ്രവേശിപ്പിക്കുന്നതിന് മുമ്പാണ് നടി ഈ വിവരങ്ങൾ പങ്കുവെച്ചത്. ഗർഭകാലത്തിന്റെ നാലാം മാസത്തിൽ കോവിഡ് സ്ഥിരീകരിച്ചത് വലിയ ആശങ്കയുണ്ടാക്കിയെന്ന് ദുർഗ പറഞ്ഞു. ഇതേത്തുടർന്ന് വീട്ടിലിരിക്കേണ്ടി വരികയും അമ്മയ്ക്കും കോവിഡ് സ്ഥിരീകരിച്ചതോടെ കുടുംബം ക്വാറന്റൈനിലാവുകയും ചെയ്തു.

ഇതിനിടയിൽ രക്തത്തിൽ അണുബാധയുണ്ടായെന്നും സഹിക്കാനാവാത്ത വേദന അനുഭവിക്കേണ്ടി വന്നെന്നും അവർ കൂട്ടിച്ചേർത്തു. രക്തസ്രാവത്തെത്തുടർന്ന് പലതവണ ആശുപത്രിയിൽ ചികിത്സ തേടേണ്ടി വന്നെന്നും എന്നാൽ എല്ലാവരുടെയും പ്രാർത്ഥന കൊണ്ട് കുഞ്ഞിന് യാതൊരു പ്രശ്നവുമുണ്ടായില്ലെന്നും ദുർഗ വ്യക്തമാക്കി.

അഞ്ചാം മാസം മുതലാണ് വീട്ടിൽനിന്നിറങ്ങിയതെന്നും പിന്നീടുള്ള മാസങ്ങളിൽ പൂർണ്ണ വിശ്രമത്തിലായിരുന്നുവെന്നും നടി പറഞ്ഞു. ഗർഭകാലത്തുണ്ടായ മൂഡ് സ്വിങ്‌സ് കാരണം പലപ്പോഴും ഒറ്റയ്ക്ക് കരഞ്ഞിട്ടുണ്ട്. താൻ വളരെ അസ്വസ്ഥയായിരുന്നെന്നും ഭർത്താവ് തന്നെ ഉപേക്ഷിച്ചു പോകുമോ എന്ന് വരെ ഭയന്നിരുന്നെന്നും ദുർഗ ഓർത്തെടുത്തു.