ഒരു പുരുഷൻ തന്റെ പകുതി പ്രായമുള്ളയാളെ വിവാഹം കഴിച്ചാൽ 'ആഹാ! എന്തൊരു മനുഷ്യൻ' എന്ന് വാഴ്ത്തും; മറിച്ച് ഒരു സ്ത്രീയാണെങ്കിൽ അത് പ്രശ്നമാകും; ചിന്താഗതികൾ മാറേണ്ടതുണ്ടെന്ന് മലൈക അറോറ

മുംബൈ: വിവാഹമോചിതരായ സ്ത്രീകളുടെ ജീവിതത്തെയും പുനർവിവാഹത്തെയും കുറിച്ച് സമൂഹം പുലർത്തുന്ന ഇരട്ടത്താപ്പിനെതിരെ രൂക്ഷ വിമർശനവുമായി നടി മലൈക അറോറ. ഒരു പുരുഷൻ വിവാഹമോചനം നേടി, തന്നേക്കാൾ പ്രായം കുറഞ്ഞ യുവതിയെ വിവാഹം കഴിച്ചാൽ സമൂഹം അയാളെ അഭിനന്ദിക്കുകയും ശക്തനെന്ന് വാഴ്ത്തുകയും ചെയ്യും, എന്നാൽ സമാനമായ സാഹചര്യത്തിൽ ഒരു സ്ത്രീയെ നിരന്തരം ചോദ്യം ചെയ്യുന്നതിലെ വൈരുദ്ധ്യം മലൈക ചൂണ്ടിക്കാട്ടി. ഇത്തരം ചിന്താഗതികൾ മാറേണ്ടതുണ്ടെന്നും അവർ ആവശ്യപ്പെട്ടു.

"കരുത്തയായതിന്റെ പേരിൽ നിരന്തരം വിധിക്കപ്പെടുന്ന അവസ്ഥയാണ്. ഞാൻ എന്തു ചെയ്താലും ഇത്തരം വിധി ഉണ്ടാകും. ഇന്നത്തെ സ്ത്രീയായി എന്നെ മാറ്റുന്നതിൽ നിരവധി സ്ത്രീകൾക്ക് പങ്കുണ്ട്. ഒരു പുരുഷൻ തന്റെ ഇഷ്ടത്തിന് ജീവിക്കുന്നത് അഭിനന്ദിക്കപ്പെടും. വിവാഹമോചനം നേടുകയും തന്റെ പകുതി പ്രായമുള്ള യുവതിയെ വിവാഹം കഴിക്കുകയും ചെയ്താൽ, 'ആഹാ! എന്തൊരു മനുഷ്യൻ' എന്ന് പറയും. എന്നാൽ ഇതൊരു സ്ത്രീയാണ് ചെയ്യുന്നതെങ്കിൽ, 'അവൾ എന്തിന് ഇത് ചെയ്തു? അവൾക്ക് ബോധമില്ലേ?' എന്നെല്ലാം ചോദിച്ച് അവളെ ചോദ്യം ചെയ്യും. ഇത്തരം കാഴ്ചപ്പാടുകൾ അവസാനിക്കണം," മലൈക വ്യക്തമാക്കി.

നേരത്തെ നടനും സംവിധായകനുമായ അർബാസ് ഖാനെ വിവാഹം കഴിച്ച മലൈക, ദീർഘകാലത്തെ ദാമ്പത്യജീവിതത്തിന് ശേഷം വേർപിരിയുകയായിരുന്നു. പിന്നീട് നടൻ അർജുൻ കപൂറുമായി മലൈക പ്രണയത്തിലായി. തന്നേക്കാൾ പ്രായം കുറഞ്ഞ അർജുനുമായി പ്രണയത്തിലായതിന്റെ പേരിൽ മലൈകയ്ക്ക് നിരന്തരമായി സമൂഹമാധ്യമങ്ങളിൽ വിമർശനങ്ങൾ നേരിടേണ്ടി വന്നിരുന്നു. അടുത്തിടെയാണ് ഇരുവരും തങ്ങളുടെ പ്രണയബന്ധം അവസാനിപ്പിച്ചത്.

അതേസമയം, മലൈകയുമായി വേർപിരിഞ്ഞതിന് ശേഷം അർബാസ് ഖാൻ 2023-ൽ മേക്കപ്പ് ആർട്ടിസ്റ്റായ ഷുര ഖാനെ വിവാഹം കഴിച്ചിരുന്നു. ഇവർ തമ്മിലുള്ള പ്രായവ്യത്യാസവും അന്ന് ചർച്ചയായിരുന്നു. ഈയിടെയാണ് ഇവർക്ക് ഒരു കുഞ്ഞ് പിറന്നത്. വിവാഹമോചിതരായ സ്ത്രീകളെക്കുറിച്ചുള്ള സമൂഹത്തിന്റെ വിവേചനപരമായ കാഴ്ചപ്പാടുകൾക്കെതിരെ മലൈകയുടെ തുറന്നുപറച്ചിൽ പ്രസക്തമാകുകയാണ്.