ഞാൻ വിജയ് യെ കല്യാണം കഴിക്കും; സത്യസന്ധമായി പറഞ്ഞാൽ..ആഴത്തിൽ എന്നെ മനസ്സിലാക്കാൻ കഴിവുള്ള ആളായിരിക്കണം; എല്ലാം തുറന്നുപറഞ്ഞ് രശ്മിക

തെന്നിന്ത്യൻ സിനിമാ താരസുന്ദരി രശ്മിക മന്ദാന തന്റെ വിവാഹത്തെക്കുറിച്ചും ജീവിത പങ്കാളിയെക്കുറിച്ചുമുള്ള കാഴ്ചപ്പാടുകൾ വെളിപ്പെടുത്തി. അടുത്തിടെ നടന്ന ഒരു പരിപാടിയിൽ വെച്ചാണ് താരം ഇക്കാര്യങ്ങൾ പങ്കുവെച്ചത്. സഹതാരങ്ങളെ കൊല്ലുക, വിവാഹം കഴിക്കുക, ഡേറ്റ് ചെയ്യുക തുടങ്ങിയ ചോദ്യങ്ങൾക്ക് മറുപടി പറയവേയാണ് രശ്മിക തന്റെ താല്പര്യങ്ങൾ തുറന്നുപറഞ്ഞത്.

ചോദ്യങ്ങൾക്ക് മറുപടിയായി, താൻ നടൻ വിജയ്‌യെ വിവാഹം കഴിക്കുമെന്നും, അനിമേ കഥാപാത്രമായ നരുട്ടോയെ ഡേറ്റ് ചെയ്യുമെന്നും രശ്മിക പറഞ്ഞു. ഇത് സദസ്സിൽ നിറഞ്ഞ കൈയ്യടിയോടെയാണ് പ്രേക്ഷകർ സ്വീകരിച്ചത്.

തന്റെ ജീവിത പങ്കാളിക്ക് വേണ്ട ഗുണങ്ങളെക്കുറിച്ചും രശ്മിക വിശദീകരിച്ചു. ആഴത്തിൽ കാര്യങ്ങൾ മനസ്സിലാക്കാനും സ്വന്തം വീക്ഷണകോണിൽ നിന്ന് ജീവിതത്തെ സമീപിക്കാനും കഴിവുള്ള ഒരാളെയാണ് താൻ ആഗ്രഹിക്കുന്നതെന്ന് താരം വ്യക്തമാക്കി. തുറന്ന മനസ്സുള്ളവരും, ദയയുള്ളവരും, തന്നെയും തന്റെ താല്പര്യങ്ങളെയും സംരക്ഷിക്കാൻ കഴിയുന്നവരുമായിരിക്കണം പങ്കാളിയെന്നും രശ്മിക കൂട്ടിച്ചേർത്തു.

നടൻ വിജയ് ദേവരക്കൊണ്ടയുമായുള്ള വിവാഹത്തെക്കുറിച്ചുള്ള അഭ്യൂഹങ്ങൾക്കിടെയാണ് രശ്മികയുടെ ഈ വെളിപ്പെടുത്തൽ വീണ്ടും ശ്രദ്ധ നേടുന്നത്. അടുത്ത വർഷം ഫെബ്രുവരിയിൽ ഇരുവരും വിവാഹിതരാകുമെന്നും ഇതിനായുള്ള തയ്യാറെടുപ്പുകൾ നടക്കുന്നതായും റിപ്പോർട്ടുകളുണ്ട്. 2018-ലെ 'ഗീത ഗോവിന്ദം', 2019-ലെ 'ഡിയർ കോമ്രേഡ്' എന്നീ ചിത്രങ്ങൾക്കു ശേഷമാണ് ഇരുവരും പ്രണയത്തിലാണെന്ന തരത്തിലുള്ള വാർത്തകൾ പ്രചരിക്കാൻ തുടങ്ങിയത്. എന്നാൽ, ഇരുവരും ഔദ്യോഗികമായി ബന്ധം സ്ഥിരീകരിച്ചിട്ടില്ല.