'സ്‌കര്‍ട്ട് കുറച്ചു താഴ്ത്തിയാല്‍ സിനിമക്ക് കൂടുതല്‍ മൈലേജ് ലഭിക്കുമെന്ന് വിചാരിക്കുന്നവരുണ്ട്'; 'പിസാസ് 2'-ൽ ഇറോട്ടിക് രംഗങ്ങളുണ്ട്; നഗ്നരംഗം ഒഴിവാക്കിയത് നിർമ്മാതാവിനെ ഓർത്ത്; വെളിപ്പെടുത്തലുമായി ആൻഡ്രിയ
ചെന്നൈ: 'പിസാസ് 2' എന്ന ചിത്രത്തിൽ ഇറോട്ടിക് രംഗങ്ങളുണ്ടായിരുന്നുവെന്ന് നടി ആൻഡ്രിയ ജെർമിയ. തിരക്കഥയിൽ ഉൾപ്പെടുത്തിയിരുന്ന ഒരു നഗ്നരംഗം, നിർമ്മാതാവിന് ഉണ്ടാകാനിടയുള്ള ബുദ്ധിമുട്ടുകൾ പരിഗണിച്ച് സംവിധായകൻ മിഷ്കിൻ ഒഴിവാക്കുകയായിരുന്നുവെന്നും ആൻഡ്രിയ വെളിപ്പെടുത്തി. തന്റെ പുതിയ ചിത്രമായ 'മാസ്ക്'-ന്റെ പ്രചാരണ പരിപാടിക്കിടെ മാധ്യമങ്ങളോട് സംസാരിക്കുകയായിരുന്നു താരം.
മിഷ്കിനെപ്പോലുള്ള ഒരു സംവിധായകൻ സിനിമയിലേക്ക് വിളിക്കുമ്പോൾ കഥ പോലും നോക്കാതെയാണ് താൻ അവസരം സ്വീകരിക്കുന്നതെന്ന് ആൻഡ്രിയ പറഞ്ഞു. "കഥയ്ക്ക് അനിവാര്യമായ രംഗമായതുകൊണ്ടാണ് അത്തരം ഒരു രംഗത്തിന് സമ്മതിച്ചത്. എന്നാൽ ഷൂട്ടിംഗ് സമയത്ത്, ഈ രംഗം ചിത്രീകരിച്ചാൽ നിർമ്മാതാവിന് പ്രശ്നങ്ങളുണ്ടാകുമെന്ന് സംവിധായകൻ അറിയിക്കുകയും അത് ഒഴിവാക്കാൻ തീരുമാനിക്കുകയുമായിരുന്നു. നമ്മുടെ സ്‌കര്‍ട്ട് കുറച്ചു താഴ്ത്തിയാല്‍ സിനിമക്ക് കൂടുതല്‍ മൈലേജുണ്ടെന്ന് വിചാരിക്കുന്ന ചിലയാളുകളെ എനിക്കറിയാം. ഈ പടത്തില്‍ വേറെയും ഇറോട്ടിക് രംഗങ്ങളുണ്ട്. പക്ഷേ, ആദ്യം കേട്ടതുപോലെ ന്യൂഡിറ്റിയില്ല," ആൻഡ്രിയ കൂട്ടിച്ചേർത്തു.
2021-ലാണ് ആൻഡ്രിയയെ കേന്ദ്ര കഥാപാത്രമാക്കി മിഷ്കിൻ 'പിസാസ് 2' പ്രഖ്യാപിച്ചത്. കോവിഡ് ഉൾപ്പെടെയുള്ള കാരണങ്ങളാൽ ചിത്രീകരണം നീണ്ടുപോവുകയായിരുന്നു. മൂന്ന് വർഷം മുൻപ് ചിത്രത്തിന്റെ ടീസർ പുറത്തിറങ്ങിയിരുന്നു. ആൻഡ്രിയയെ കൂടാതെ വിജയ് സേതുപതി, പൂർണ, സന്തോഷ് പ്രതാപ് എന്നിവരും ചിത്രത്തിൽ പ്രധാന വേഷങ്ങളിലെത്തുന്നുണ്ട്.