പണമില്ലാതെ കുഴങ്ങിയപ്പോൾ തുണയായത് ആ താരം; ഒരു ലക്ഷം രൂപ പ്രതിഫലം വാങ്ങുന്ന സമയത്ത് നൽകിയത് 50,000 രൂപ; കിഡ്നി മാറ്റിവെക്കാനായി സുരേഷ് ഗോപി സഹായിച്ചുവെന്നും അപ്പ ഹാജ

തിരുവനന്തപുരം: ഒരു ലക്ഷം രൂപ പ്രതിഫലം വാങ്ങിയിരുന്ന സമയത്ത് നടൻ സുരേഷ് ഗോപി തനിക്ക് 50,000 രൂപ നൽകി സാമ്പത്തികമായി സഹായിച്ചിട്ടുണ്ടെന്ന് വെളിപ്പെടുത്തി നടൻ അപ്പ ഹാജ. നിലവിൽ കേന്ദ്രമന്ത്രി കൂടിയായ സുരേഷ് ഗോപിയുമായുള്ള തന്റെ ആഴത്തിലുള്ള സൗഹൃദത്തെക്കുറിച്ചാണ് അപ്പ ഹാജ മാസ്റ്റർ ബിൻ യൂട്യൂബ് ചാനലിന് നൽകിയ അഭിമുഖത്തിൽ തുറന്നുപറഞ്ഞത്. തൊണ്ണൂറുകളിൽ താൻ ഫുട്‌വെയർ ബിസിനസ് നടത്തിയിരുന്ന കാലത്താണ് ഈ സഹായം ലഭിച്ചതെന്ന് അപ്പ ഹാജ ഓർമ്മിച്ചു.

സാധനങ്ങൾ പർച്ചേസ് ചെയ്യുമ്പോൾ പണമായി നൽകിയാൽ കൂടുതൽ ലാഭം ലഭിച്ചിരുന്നതിനാൽ തനിക്ക് വലിയ തുകയുടെ ആവശ്യം വരാറുണ്ടായിരുന്നു. അത്തരം സന്ദർഭങ്ങളിൽ, ഒരു ലക്ഷം രൂപ മാത്രം പ്രതിഫലം വാങ്ങിയിരുന്ന കാലത്ത് പോലും, സുരേഷ് ഗോപി 50,000 രൂപ എടുത്ത് നൽകുമായിരുന്നു എന്ന് അപ്പ ഹാജ പറയുന്നു. ഇത് വർഷങ്ങൾക്ക് മുൻപുള്ള കാര്യമാണെന്നും അദ്ദേഹം കൂട്ടിച്ചേർത്തു.

സമ്പന്നമായ വ്യക്തിബന്ധം പങ്കുവെക്കുന്നതിനിടെ, ഉച്ചഭക്ഷണത്തിനായി സുരേഷ് ഗോപി പലപ്പോഴും വീട്ടിലേക്ക് ക്ഷണിച്ചിരുന്നതായും അപ്പ ഹാജ പറഞ്ഞു. ട്രെയിനിൽ യാത്ര ചെയ്യുമ്പോൾ സുരേഷ് ഗോപിയുടെ അമ്മ പാകം ചെയ്ത ഭക്ഷണം അദ്ദേഹത്തിന്റെ അച്ഛൻ എത്തിച്ചുനൽകാറുണ്ടായിരുന്നെന്നും ഇരുവരും ഒരുമിച്ചിരുന്ന് കഴിച്ചിട്ടുണ്ടെന്നും അദ്ദേഹം ഓർമ്മിച്ചു. സ്നേഹസമ്പന്നനും കുടുംബസ്‌നേഹിയുമാണ് സുരേഷ് ഗോപിയെന്നും അപ്പ ഹാജ അഭിപ്രായപ്പെട്ടു. കേന്ദ്രമന്ത്രിയായി ചുമതലയേറ്റ ശേഷവും സുരേഷ് ഗോപി തനിക്ക് സഹായകരമായി നിലകൊണ്ടിട്ടുണ്ടെന്നും അപ്പ ഹാജ വെളിപ്പെടുത്തി.

തന്റെ ഒരു സുഹൃത്തിന്റെ മകന്റെ വൃക്ക മാറ്റിവെക്കൽ ശസ്ത്രക്രിയയുമായി ബന്ധപ്പെട്ട് കേന്ദ്രസർക്കാർ സഹായം ലഭ്യമാക്കാൻ സുരേഷ് ഗോപി മുൻകൈയെടുത്തു. പ്രധാനമന്ത്രിയുടെ ഫണ്ടിൽ നിന്നുള്ള സഹായം ഇതിലൂടെ അവർക്ക് ലഭിച്ചതായും അപ്പ ഹാജ പറഞ്ഞു. തൊണ്ണൂറുകളിലെ മലയാള സിനിമയിൽ ചെറിയ വേഷങ്ങളിലൂടെ ശ്രദ്ധേയനായിരുന്ന നടനാണ് അപ്പ ഹാജ. സൂപ്പർതാര ചിത്രങ്ങളിലടക്കം നിരവധി വിജയ സിനിമകളുടെ ഭാഗമായിരുന്ന അദ്ദേഹം പിന്നീട് ബോധപൂർവ്വമായി സിനിമാ അഭിനയം കുറച്ച് ബിസിനസ് രംഗത്തേക്ക് തിരിയുകയായിരുന്നു.