'ട്രയൽ റൂ'മിന് മുന്നിൽ അവൾ എനിക്ക് വേണ്ടി കാത്തിരുന്നു; മടുക്കുന്നുണ്ടോ? എന്ന് ചോദിച്ചപ്പോൾ അവളുടെ മറുപടി കേട്ട് എന്റെ മുഖം വാടി; മകളെ കുറിച്ച് അശ്വതി ശ്രീകാന്ത്

മലയാളികളുടെ പ്രിയപ്പെട്ട അവതാരകയും അഭിനേത്രിയുമായ അശ്വതി ശ്രീകാന്തിന് തന്റെ പിറന്നാൾ ദിനത്തിൽ മൂത്തമകൾ പത്മ നൽകിയത് ഹൃദയസ്പർശിയായ സമ്മാനം. മാസങ്ങളായി സ്വരുക്കൂട്ടിയ പണം കൊണ്ട് അമ്മയ്ക്ക് വസ്ത്രങ്ങളും ചെരുപ്പുകളും വാങ്ങി നൽകിയാണ് പത്മ സ്നേഹം പ്രകടിപ്പിച്ചത്. അശ്വതി ശ്രീകാന്ത് സാമൂഹിക മാധ്യമങ്ങളിലൂടെ ഈ അനുഭവം പങ്കുവെച്ചതോടെ നിരവധി പേരാണ് അഭിനന്ദനങ്ങളുമായി രംഗത്തെത്തിയത്.

പിറന്നാളിന് മുൻപേ അമ്മയ്ക്കൊപ്പം ഷോപ്പിങ്ങിന് പോകണമെന്ന് പത്മ നിർബന്ധം പിടിച്ചിരുന്നു. ഫോറം മാളിൽ വെച്ച് അമ്മയ്ക്കുള്ള വസ്ത്രങ്ങളും ചെരുപ്പുകളും തിരഞ്ഞെടുക്കുന്നതിനിടെ ട്രയൽ റൂമിന് മുന്നിൽ കാത്തിരുന്ന മകളോട് "മടുക്കുന്നുണ്ടോ" എന്ന് ചോദിച്ചപ്പോൾ, "അമ്മാ, നിങ്ങൾക്കുവേണ്ടി എത്രനേരം വേണമെങ്കിലും കാത്തിരിക്കാം" എന്നായിരുന്നു പത്മയുടെ മറുപടി.

കൗണ്ടറിൽ എത്തിയപ്പോൾ, താൻ സ്വരുക്കൂട്ടിയ പണത്തേക്കാൾ കൂടുതൽ ബിൽ തുക വരുമോ എന്ന് പത്മ ആശങ്കപ്പെട്ടു. ബാക്കി പണം അമ്മ നൽകാമെന്ന് പറഞ്ഞിട്ടും അവളുടെ മുഖം വാടിയിരുന്നു. എന്നാൽ, പിറന്നാൾ മാസത്തിന്റെ ഭാഗമായി ലഭിച്ച പത്ത് ശതമാനം ഡിസ്കൗണ്ട് ബില്ലിൽ കുറഞ്ഞതോടെ പത്മ അങ്ങേയറ്റം സന്തോഷവതിയായി.

"അതെ, ഇനിയും വിഷു വരും, തിരുവോണം വരും. നീയിനിയും വളരും. നിന്റെ നിഴൽ പറ്റി ഞാനും," എന്ന് അശ്വതി ഇൻസ്റ്റഗ്രാം കുറിപ്പിൽ വികാരനിർഭരയായി പങ്കുവെച്ചു. മകളുടെ നിഷ്കളങ്കമായ സ്നേഹവും കരുതലും വ്യക്തമാക്കുന്ന ഈ കുറിപ്പിന് താഴെ, "ഒരു കൊച്ചുകുഞ്ഞിൽ നിന്ന് ഇത്രയും വലിയൊരു കാര്യത്തെക്കുറിച്ച് ചിന്തിക്കാൻ അവൾക്ക് കഴിഞ്ഞല്ലോ," എന്നും "ആളുകൾ പരസ്പരം തണലാകുന്നത് കാണാൻ, അത് ഒരു കുട്ടിയാണെങ്കിൽ പോലും എന്തൊരു ഭംഗിയാണ്" എന്നുമുള്ള കമന്റുകൾ ഉൾപ്പെടെ നിരവധി പേർ പ്രതികരണങ്ങളറിയിച്ചു.