'സമാന്തരങ്ങൾ' എന്ന ചിത്രത്തിന് ലഭിക്കേണ്ടിയിരുന്നത് മൂന്ന് പുരസ്കാരങ്ങൾ;ചിലരുടെ ഇടപെടലുകളിൽ നഷ്ടമായത് രണ്ട് അവാർഡുകൾ; ദേശീയ ചലച്ചിത്ര പുരസ്‌കാരത്തിൽ തിരിമറിയെന്ന് ബാലചന്ദ്രമേനോൻ
തിരുവനന്തപുരം: 1997-ലെ ദേശീയ ചലച്ചിത്ര പുരസ്‌കാരത്തിൽ ഗുരുതരമായ തിരിമറി നടന്നുവെന്ന് ആരോപിച്ച് നടനും സംവിധായകനുമായ ബാലചന്ദ്രമേനോൻ. താൻ സംവിധാനം ചെയ്ത 'സമാന്തരങ്ങൾ' എന്ന ചിത്രത്തിന് മികച്ച നടനുള്ള പുരസ്‌കാരത്തിന് പുറമെ, മികച്ച സംവിധായകനും മികച്ച ഫീച്ചർ ഫിലിമിനുമുള്ള അവാർഡുകൾ കൂടി ലഭിക്കേണ്ടിയിരുന്നുവെന്നും എന്നാൽ അവസാന നിമിഷത്തെ ഇടപെടലുകൾ കാരണം അവ നഷ്ടപ്പെടുകയായിരുന്നുവെന്നും അദ്ദേഹം വെളിപ്പെടുത്തി. തന്റെ സിനിമാ ജീവിതത്തിന്റെ അമ്പതാം വാർഷികം ആഘോഷിക്കുന്ന വേളയിലാണ് ബാലചന്ദ്രമേനോൻ ഈ ഞെട്ടിക്കുന്ന ആരോപണവുമായി രംഗത്തെത്തിയത്.
അവാർഡ് നിർണയം പൂർത്തിയായപ്പോൾ താനായിരുന്നു മികച്ച നടനെന്നും, മികച്ച ഫീച്ചർ ഫിലിം 'സമാന്തരങ്ങൾ' ആയിരുന്നുവെന്നും, താനായിരുന്നു മികച്ച സംവിധായകനെന്നും തീരുമാനമായിരുന്നുവെന്ന് ബാലചന്ദ്രമേനോൻ വിശദീകരിച്ചു. ഈ മൂന്ന് അവാർഡുകളും തനിക്ക് ലഭിക്കുമെന്ന ഘട്ടമെത്തിയപ്പോഴാണ് തിരിമറി നടന്നതെന്നും, കേരളത്തിൽ നിന്നുള്ള ചിലരുടെ ശക്തമായ ഇടപെടലുകളാണ് ഇതിന് പിന്നിലുണ്ടായിരുന്നതെന്നും അദ്ദേഹം ആരോപിച്ചു. അന്നത്തെ ജൂറി അംഗത്തിന്റെ ഒരു വീഡിയോ പ്രദർശിപ്പിച്ചുകൊണ്ടായിരുന്നു മാധ്യമങ്ങളോടുള്ള അദ്ദേഹത്തിന്റെ പ്രതികരണം.
ആരാണ് ഇടപെട്ടതെന്ന് താൻ അന്വേഷിച്ചിട്ടില്ലെന്നും, ജൂറി അംഗം പറഞ്ഞ കാര്യങ്ങളാണ് താനിപ്പോൾ വെളിപ്പെടുത്തിയതെന്നും ബാലചന്ദ്രമേനോൻ മാതൃഭൂമി ന്യൂസിനോട് കൂട്ടിച്ചേർത്തു. ഈ മൂന്ന് അവാർഡുകളും 'സമാന്തരങ്ങൾക്ക്' ലഭിച്ചിരുന്നെങ്കിൽ ഇന്ത്യൻ സിനിമയുടെ ചരിത്രത്തിൽ അതൊരു നാഴികക്കല്ലായേനെ എന്ന് അദ്ദേഹം പറഞ്ഞു. "കപ്പിനും ചുണ്ടിനുമിടയ്ക്ക് നഷ്ടപ്പെട്ടതാണ്, സ്വാഭാവികമായും വിഷമമുണ്ടാവും," അദ്ദേഹം തന്റെ നിരാശ പ്രകടിപ്പിച്ചു.
അമ്പത് വർഷത്തെ സിനിമാ ജീവിതത്തിലേക്ക് തിരിഞ്ഞുനോക്കിയപ്പോൾ ഹൃദയസ്പർശിയായ ഈ സംഭവം പറയാൻ അനുകൂലമായ സാഹചര്യമായതുകൊണ്ടാണ് താനിപ്പോൾ സംസാരിച്ചതെന്നും അദ്ദേഹം വ്യക്തമാക്കി. 1997-ൽ 'സമാന്തരങ്ങളി'ലെ മികച്ച അഭിനയത്തിന് ബാലചന്ദ്രമേനോന് മികച്ച നടനുള്ള ദേശീയ പുരസ്കാരം ലഭിച്ചിരുന്നു. എന്നാൽ, മറ്റ് രണ്ട് പ്രധാന പുരസ്കാരങ്ങൾ നിഷേധിക്കപ്പെട്ടുവെന്ന അദ്ദേഹത്തിന്റെ ആരോപണം.