'ചില വഴിയോരക്കാഴ്ചകൾ.. സേഫ് റൈഡ് ഗയ്സ്'; ഹെൽമറ്റില്ല, മദ്യപിച്ച് അപകടകരമായ സ്കൂട്ടർ യാത്ര: പിന്നിലിരിക്കുന്ന ആൾ ഏത് നിമിഷവും താഴെ വീഴാമെന്ന മട്ടിൽ; വീഡിയോ പകർത്തി നവ്യ നായർ

കോഴിക്കോട്: സിനിമാതാരം നവ്യ നായർ തന്റെ കാറിന് മുന്നിൽ അപകടകരമായ രീതിയിൽ സ്കൂട്ടർ ഓടിച്ചുപോയ യാത്രികരുടെ വീഡിയോ പങ്കുവെച്ചത് ഇപ്പോൾ സോഷ്യൽ മീഡിയയിൽ ശ്രദ്ധ നേടുകയാണ്. ഹെൽമറ്റ് ധരിക്കാതെ, മദ്യപിച്ചെന്ന് വ്യക്തമാകുന്ന തരത്തിൽ അലക്ഷ്യമായി വണ്ടിയോടിച്ച് പോയ രണ്ടുപേരുടെ ദൃശ്യങ്ങളാണ് താരം തന്റെ ഇൻസ്റ്റാഗ്രാം പേജിലൂടെ പുറത്തുവിട്ടത്.

നവ്യയുടെ കാറിന് തൊട്ടുമുന്നിൽക്കൂടി പോകുന്ന സ്കൂട്ടറാണ് വീഡിയോയിൽ കാണുന്നത്. സ്കൂട്ടറിൽ രണ്ടുപേരായിരുന്നു ഉണ്ടായിരുന്നത്. ഇവരിൽ ആരാണ് വണ്ടിയോടിക്കുന്നത് എന്ന് സംശയം തോന്നുന്ന തരത്തിലായിരുന്നു ഇവരുടെ സഞ്ചാരം. മദ്യപിച്ചതിന്റെ ലക്ഷണങ്ങൾ സ്കൂട്ടർ യാത്രികരിൽ വ്യക്തമായിരുന്നു. സ്കൂട്ടറിന്റെ പിന്നിലിരുന്ന ആൾ ഏത് നിമിഷവും താഴെ വീഴാമെന്ന മട്ടിലാണ് ഇരുന്നിരുന്നത്.

യാത്രികർ ഹെൽമറ്റ് ധരിച്ചിരുന്നില്ല എന്നതും വീഡിയോയിൽ വ്യക്തമാണ്. സുരക്ഷാ മാനദണ്ഡങ്ങൾ പൂർണ്ണമായി ലംഘിച്ചുള്ള ഇവരുടെ ഈ യാത്ര, മറ്റുള്ളവരുടെ ജീവനും കൂടി ഭീഷണിയാകുന്നതായിരുന്നു. കുറേനേരം ഈ അപകടകരമായ യാത്ര നവ്യ തന്റെ കാറിൽ ഇരുന്ന് നിരീക്ഷിക്കുകയും അത് ക്യാമറയിൽ പകർത്തി സോഷ്യൽ മീഡിയയിൽ പങ്കുവെക്കുകയും ചെയ്തു. "ചില വഴിയോരക്കാഴ്ചകൾ. സേഫ് റൈഡ് ഗയ്സ്," എന്ന അടിക്കുറിപ്പോടെയാണ് നവ്യ വീഡിയോ പോസ്റ്റ് ചെയ്തത്.

അപകടകരമായ രീതിയിൽ പോയ സ്കൂട്ടർ യാത്രികർ പിന്നീട് വഴിയരികിൽ വണ്ടി നിർത്തി. അതുവരെയുള്ള ദൃശ്യങ്ങൾ നവ്യ വീഡിയോയിൽ പകർത്തിയിട്ടുണ്ട്. റോഡിൽ മദ്യപിച്ച് അലക്ഷ്യമായി വാഹനമോടിക്കുന്നവരുടെ ശ്രദ്ധയിൽപ്പെടുത്തുക എന്ന ലക്ഷ്യത്തോടെയാണ് താരം ഈ വീഡിയോ പങ്കുവെച്ചത്. വീഡിയോ പുറത്തുവന്നതിന് പിന്നാലെ രസകരവും അതോടൊപ്പം യാത്രയുടെ അപകടസാധ്യതകൾ ചൂണ്ടിക്കാണിച്ചുമുള്ള നിരവധി കമന്റുകളാണ് വീഡിയോയ്ക്ക് താഴെ വന്നത്. പൊതുസ്ഥലങ്ങളിൽ ഉത്തരവാദിത്തമില്ലാതെ പെരുമാറുന്ന ഇത്തരം പ്രവണതകൾക്കെതിരെ ശക്തമായ പ്രതികരണമാണ് സോഷ്യൽ മീഡിയയിൽ നിന്നും ലഭിക്കുന്നത്.

രത്തീന സംവിധാനം ചെയ്ത 'പാതിരാത്രി' എന്ന ചിത്രമാണ് നവ്യയുടേതായി ഏറ്റവും ഒടുവിൽ റിലീസ് ചെയ്തത്. ഈ ചിത്രത്തിൽ സൗബിൻ ഷാഹിറിനൊപ്പം നവ്യ ഒരു പോലീസ് കഥാപാത്രത്തെയാണ് അവതരിപ്പിച്ചത്. നവ്യയുടെ കരിയറിലെ ആദ്യത്തെ പോലീസ് വേഷം കൂടിയായിരുന്നു ഇത്.

'പുഴു' എന്ന ചിത്രത്തിന് ശേഷം രത്തീന സംവിധാനം ചെയ്ത 'പാതിരാത്രി', ഒരു പാതിരാത്രിയിൽ നടക്കുന്ന അപ്രതീക്ഷിത സംഭവ വികാസങ്ങളെ ചുറ്റിപ്പറ്റിയാണ് കഥ പറഞ്ഞത്. നവ്യ, സൗബിൻ ഷാഹിർ എന്നിവരെ കൂടാതെ സണ്ണി വെയ്ൻ, ആൻ അഗസ്റ്റിൻ, ആത്മീയ രാജൻ, ശബരീഷ് വർമ്മ, ഹരിശ്രീ അശോകൻ, അച്യുത് കുമാർ, ഇന്ദ്രൻസ്, തേജസ് എന്നിവരും ചിത്രത്തിലെ പ്രധാന കഥാപാത്രങ്ങളെ അവതരിപ്പിച്ചു. ത്രില്ലടിപ്പിക്കുന്നതോടൊപ്പം വൈകാരികമായി സ്പർശിക്കുന്ന ഒരു അനുഭവമാണ് ചിത്രം പ്രേക്ഷകർക്ക് നൽകിയത്. ചിത്രത്തിലെ നവ്യയുടെ പ്രകടനം ഏറെ ശ്രദ്ധ നേടിയിരുന്നു.