'വിശ്വാസത്തിൽ ഒരു തരിപോലും കുറഞ്ഞിട്ടില്ല, ചേച്ചി എയറിലാണല്ലോ എന്ന് ചോദിച്ചവരുണ്ട്'; കൃപാസനത്തിൽ സാക്ഷ്യം പറഞ്ഞതിന് ശേഷമാണ് മാതാവായി അഭിനയിച്ച സിനിമ കിട്ടിയത്; തുറന്ന് പറഞ്ഞ് ധന്യ മേരി വർഗീസ്

കൊച്ചി: കൃപാസനത്തെക്കുറിച്ച് സാക്ഷ്യം പറഞ്ഞതിന്റെ പേരിൽ സാമൂഹിക മാധ്യമങ്ങളിൽ വലിയ വിമർശനങ്ങൾക്ക് വിധേയയായ നടി ധന്യ മേരി വർഗീസ്, തന്റെ വിശ്വാസങ്ങളിൽ ഉറച്ചുനിൽക്കുന്നതായി വ്യക്തമാക്കി. പണം വാങ്ങിയാണ് താൻ സാക്ഷ്യം പറഞ്ഞതെന്ന ആരോപണങ്ങൾ ശരിയായിരുന്നില്ലെന്നും, തന്റെ വിശ്വാസത്തിന് ഒരു കോട്ടവും സംഭവിച്ചിട്ടില്ലെന്നും അവർ പറഞ്ഞു. ഒരു യൂട്യൂബ് ചാനലിന് നൽകിയ അഭിമുഖത്തിലാണ് ധന്യ മേരി വർഗീസ് തന്റെ നിലപാടുകൾ വ്യക്തമാക്കിയത്.

സാമൂഹിക മാധ്യമങ്ങളിൽ ആർക്കും എപ്പോഴും ആരെയും വിമർശിക്കാമെന്നും, എന്നാൽ ഇത് വ്യക്തികളുടെ മാനസികാരോഗ്യത്തെ സാരമായി ബാധിക്കുമെന്നും അവർ ചൂണ്ടിക്കാട്ടി. 'ഞാൻ എന്റെ വിശ്വാസം പറഞ്ഞു. എന്തു പറഞ്ഞാലും അതിൽ നിന്ന് മാറില്ല,' ധന്യ വ്യക്തമാക്കി. കൃപാസനത്തെക്കുറിച്ചുള്ള തന്റെ പ്രസ്താവനകൾ ചില വിവാദങ്ങൾക്ക് വഴിവെച്ചതായും, ഇത് തന്റെ വ്യക്തിജീവിതത്തിൽ ചില സമ്മർദ്ദങ്ങൾ സൃഷ്ടിച്ചതായും അവർ കൂട്ടിച്ചേർത്തു.

'ചേച്ചി എയറിലാണല്ലോ എന്ന് ചോദിച്ചവരുണ്ട്. കൃപാസനത്തിലെ അച്ചൻ വരെ സമാധാനം പറയേണ്ടിവന്നു. പിന്നെ ഞാൻ അധികം അവിടെ പോയിട്ടില്ല,' അവർ പറഞ്ഞു. എന്നാൽ, അമ്മ കൃപാസനത്തിൽ സ്ഥിരമായി പോകുന്നതായും, പ്രത്യേകിച്ച് രോഗാവസ്ഥയിലായിരുന്നിട്ടും അവർ വിശ്വാസത്തിൽ മുറുകെ പിടിക്കുന്നതായും ധന്യ പറഞ്ഞു. വീട്ടിലെ പലരും ഈ വിശ്വാസത്തിലേക്ക് കൂടുതൽ അടുത്തിട്ടുണ്ടെന്നും, തനിക്കറിയാവുന്ന ധാരാളം പേർ, നടീനടന്മാർ ഉൾപ്പെടെ, കൃപാസനത്തിൽ പോയിട്ടുണ്ടെന്നും അവർ വെളിപ്പെടുത്തി.

എന്നാൽ, എല്ലാവരും ഇത് തുറന്നുപറയാൻ താല്പര്യം കാണിക്കാറില്ലെന്നും അവർ കൂട്ടിച്ചേർത്തു. വിശ്വാസത്തിൽ നിന്ന് ഒരു തരിപോലും മാറിയിട്ടില്ലെങ്കിലും, കൃപാസനത്തിൽ പോയ ശേഷം പറഞ്ഞിരിക്കുന്ന കാര്യങ്ങൾ അതേപടി പിന്തുടരാൻ സാധിക്കാറില്ലെന്നും ധന്യ മേരി വർഗീസ് സമ്മതിച്ചു. തിരക്കിട്ട ജീവിതവും, മകന്റെ കാര്യങ്ങളും, മറ്റ് ഉത്തരവാദിത്തങ്ങളും കാരണം സമയക്കുറവ് അനുഭവപ്പെടുന്നതായും അവർ പറഞ്ഞു. 'മൂന്നുമാസമാണ് ഉടമ്പടിയുടെ പിരീഡ്. ആ മൂന്നുമാസം പ്രാർത്ഥന, സാഹായങ്ങൾ അങ്ങനെ ഒത്തിരി കാര്യങ്ങൾ ചെയ്യാനുണ്ട്. നമ്മുടെ മനസ് അതിനുവേണ്ടി ശാന്തമാക്കി വയ്ക്കാൻ പറ്റുന്നില്ല,' അവർ വിശദീകരിച്ചു.

എന്നാൽ, വീണ്ടും ഒരു ഉടമ്പടി എടുക്കാൻ ആഗ്രഹമുണ്ടെന്നും, അത് ഏതെങ്കിലും പ്രത്യേക കാരണം കൊണ്ടല്ലെന്നും, മറിച്ച് വിശ്വാസത്തിൽ ഉറച്ചുപോകാനും മനോധൈര്യം വർദ്ധിപ്പിക്കാനുമാണെന്നും ധന്യ വ്യക്തമാക്കി. മനുഷ്യസഹജമായ ഡിപ്രഷൻ പോലുള്ള അവസ്ഥകളെ നേരിടാൻ വിശ്വാസവും പ്രാർത്ഥനയുമാണ് തനിക്ക് മരുന്നായതെന്നും, നല്ല രീതിയിൽ വിശ്വസിച്ച് പ്രാർത്ഥിക്കുന്നവർക്ക് പലപ്പോഴും വൈദ്യസഹായമില്ലാതെ തന്നെ പല പ്രശ്നങ്ങളെയും മറികടക്കാൻ സാധിക്കുമെന്നും അവർ കൂട്ടിച്ചേർത്തു.

ദൈവം നമ്മളെ നോക്കുന്നുണ്ടെന്ന വിശ്വാസം മാത്രം മതിയാകുമെന്നും, കൃപാസനത്തിൽ പോയി നല്ല അനുഭവങ്ങൾ ലഭിച്ച ഒട്ടേറെ പേരുണ്ടെന്നും ധന്യ മേരി വർഗീസ് പറഞ്ഞു. എല്ലാവർക്കും ഒരേപോലെയുള്ള അനുഭവങ്ങളായിരിക്കില്ല ലഭിക്കുകയെങ്കിലും, മനുഷ്യർക്ക് അത്യാവശ്യമായ പല കാര്യങ്ങളും ലഭിച്ചിട്ടുണ്ടെന്നും, സാക്ഷ്യം പറഞ്ഞതിന് ശേഷമാണ് മാതാവ് ആയി അഭിനയിച്ച സിനിമ കിട്ടിയതെന്നും അവർ കൂട്ടിച്ചേർത്തു.