'നമ്മളെക്കുറിച്ച് ആരെങ്കിലും ഒരു ആരോപണം പറഞ്ഞാൽ അത് എഐ ആണെന്ന് പറഞ്ഞാൽ മതി'; വൈറലായി മാധ്യമപ്രവർത്തകർക്ക് ധ്യാൻ നൽകിയ മറുപടി

കൊച്ചി: മാധ്യമപ്രവർത്തകരുടെ ചോദ്യത്തിന് ധ്യാൻ ശ്രീനിവാസൻ നൽകിയ മറുപടി സോഷ്യൽ മീ‍ഡിയയിൽ വലിയ ചർച്ചകൾക്ക് വഴിവെച്ചിരിക്കുകയാണ്. അറിയാത്ത കാര്യത്തെക്കുറിച്ച് ഒരു ആരോപണം ആരെങ്കിലും ഉന്നയിച്ചാൽ എങ്ങനെ പ്രതികരിക്കണം എന്ന ചോദ്യത്തിന് ധ്യാൻ നൽകിയ മറുപടിയാണ് ഇപ്പോൾ പലരും നടൻ അജ്മൽ അമീറുമായി ബന്ധപ്പെടുത്തി ചർച്ച ചെയ്യുന്നത്. ആരോപണങ്ങളെ നേരിടാനുള്ള ഒരു പുതിയ 'തന്ത്രം' എന്ന നിലയിലാണ് ധ്യാൻ ഇങ്ങനെ പറഞ്ഞത്.

ഒരു മാധ്യമപ്രവർത്തകൻ ധ്യാനിനോട് ചോദിച്ച ചോദ്യം ഇതായിരുന്നു: "നമ്മളെക്കുറിച്ച് അറിയാത്ത ഒരു കാര്യത്തെക്കുറിച്ച് ആരെങ്കിലും ഒരു ആരോപണം ഉന്നയിച്ചാൽ എങ്ങനെ പ്രതികരിക്കണം?" ഇതിന് ധ്യാൻ നൽകിയ മറുപടി വളരെ ലളിതമായിരുന്നു: "നമ്മളെക്കുറിച്ച് ആരെങ്കിലും ഒരു ആരോപണം പറഞ്ഞാൽ അത് എഐ ആണെന്ന് പറഞ്ഞാൽ മതി."

ഈ മറുപടി ഒരു തമാശ രൂപേണയുള്ളതാണെങ്കിലും, സമീപകാലത്ത് അജ്മൽ അമീറിനെതിരെ ഉയർന്നുവന്ന ഒരു വിവാദത്തെ ഓർമ്മിപ്പിക്കുന്നതാണ്. അടുത്തിടെ നടൻ അജ്മൽ അമീറിന്റേതെന്ന പേരിൽ ചില വീഡിയോ കോളുകളും ശബ്ദ സന്ദേശങ്ങളും സോഷ്യൽ മീഡിയയിൽ വ്യാപകമായി പ്രചരിച്ചിരുന്നു. വാട്ട്‌സ്ആപ്പ് വഴി റെക്കോർഡ് ചെയ്യപ്പെട്ട ഈ സംഭാഷണങ്ങളുടെ ഭാഗങ്ങൾ ലൈംഗിക ചുവയോടെയുള്ളതായിരുന്നെന്നും, അതിൽ അജ്മലിന്റെ മുഖവും കാണിക്കുന്നുണ്ടെന്നും റിപ്പോർട്ടുകൾ പുറത്തുവന്നിരുന്നു.

പ്രസ്തുത വീഡിയോയിൽ, പെൺകുട്ടി 'തൻ്റെ കല്യാണം കഴിഞ്ഞതല്ലേ' എന്ന് ചോദിക്കുമ്പോൾ, 'അതൊന്നും താൻ അറിയേണ്ടെന്നും താമസ സൗകര്യം ഒരുക്കി തരാമെന്നും' അജ്മൽ പറയുന്നതായാണ് കേൾക്കുന്നത്. ഈ സന്ദേശങ്ങൾ പുറത്തുവന്നതിന് പിന്നാലെ, തൻ്റെ പേരിൽ പ്രചരിക്കുന്ന വീഡിയോ സന്ദേശങ്ങൾ എഐ നിർമ്മിതമാണെന്ന് വിശദീകരിച്ച് അജ്മൽ അമീർ രംഗത്തെത്തിയിരുന്നു. താനല്ല അത്തരം സന്ദേശങ്ങൾ അയച്ചതെന്നും, തൻ്റെ ഇൻസ്റ്റഗ്രാം അക്കൗണ്ട് കൈകാര്യം ചെയ്ത മറ്റൊരാളാണ് ഇതിന് പിന്നിലെന്നും അദ്ദേഹം വാദിച്ചു. അക്കൗണ്ട് ഇനി താൻ മാത്രം കൈകാര്യം ചെയ്യുമെന്നും താരം അറിയിച്ചു.