അവന്റെ മുഖത്തെ ചിരി എല്ലാം നഷ്ടപ്പെട്ടു; ഞാന്‍ കരഞ്ഞ് കരഞ്ഞ് ബിപി ഒക്കെ ഡൗണ്‍ ആയി; കുഞ്ഞിന്റെ അസുഖവിവരം പറഞ്ഞ് ദിയ

നടനും രാഷ്ട്രീയപ്രവർത്തകനുമായ കൃഷ്ണകുമാറിന്റെ മകളും സോഷ്യൽ മീഡിയ ഇൻഫ്ലുവൻസറുമായ ദിയ കൃഷ്ണയുടെ മകൻ നിയോം പൂർണ്ണ ആരോഗ്യവാനായി ജീവിതത്തിലേക്ക് തിരിച്ചെത്തി. കഴിഞ്ഞ ദിവസമാണ് തൻ്റെ മകൻ്റെ ആരോഗ്യനിലയെക്കുറിച്ചും ആശുപത്രിവാസത്തെക്കുറിച്ചുമുള്ള വിവരങ്ങൾ ദിയ പങ്കുവെച്ചത്.

സെപ്റ്റംബർ 5ന്, തിരുവോണത്തോടനുബന്ധിച്ച് മകൻ്റെ മുഖം ആരാധകർക്ക് കാണിച്ചു കൊടുക്കാനും വിവാഹ വാർഷികം ആഘോഷിക്കാനും ദിയയും ഭർത്താവ് അശ്വിനും പദ്ധതിയിട്ടിരുന്നു. എന്നാൽ, നിയോമിന് അസുഖം ബാധിച്ചതിനെത്തുടർന്ന് ഈ ചടങ്ങുകൾ മാറ്റിവെക്കുകയായിരുന്നു. രോഗബാധിതനായിരുന്ന സമയത്ത് മകന് ഏകദേശം 600 ഗ്രാം ഭാരം കുറഞ്ഞതായും, ചിരി മാഞ്ഞ് സങ്കടത്തോടെ കഴിഞ്ഞിരുന്നതായും ദിയ വെളിപ്പെടുത്തി. താനും കുടുംബാംഗങ്ങളും കടുത്ത ആശങ്കയിലായിരുന്നുവെന്നും, കരഞ്ഞ് കണ്ണുകൾക്ക് പോലും പ്രശ്നങ്ങളുണ്ടായെന്നും അവർ പറഞ്ഞു.

തൻ്റെ മകൻ എപ്പോഴും സന്തോഷവാനും ചിരിക്കുന്ന പ്രകൃതക്കാരനുമാണെന്നും, അസുഖം ബാധിച്ചപ്പോൾ അത് തങ്ങളെ എല്ലാവരെയും വല്ലാതെ ബാധിച്ചെന്നും ദിയ ഓർത്തെടുത്തു. ജീവിതത്തിൽ ഉയർച്ച താഴ്ചകൾ സ്വാഭാവികമാണെന്നും, ഇത്തരം പ്രതിസന്ധികൾ പിന്നീടുള്ള ഉയർച്ചയ്ക്ക് കാരണമാകുമെന്നും അച്ഛൻ്റെ വാക്കുകളെ ഉദ്ധരിച്ച് ദിയ പറഞ്ഞു.

എന്നാൽ, ഇപ്പോൾ മകൻ്റെ ആരോഗ്യസ്ഥിതി മെച്ചപ്പെട്ടതിൽ ഏറെ സന്തോഷമുണ്ടെന്ന് ദിയ അറിയിച്ചു. നിയോം പഴയതുപോലെ ചിരിച്ചു തുടങ്ങിയിരിക്കുന്നു. പുതിയ ശബ്ദങ്ങളുണ്ടാക്കാനും കളിക്കാനും തുടങ്ങിയിട്ടുണ്ട്. എല്ലാവരുടെയും പ്രാർത്ഥനകൾക്ക് ഫലമുണ്ടായെന്നും, മകൻ്റെ ചിരി കാണുമ്പോൾ സന്തോഷം അടക്കാനാകുന്നില്ലെന്നും അവർ കൂട്ടിച്ചേർത്തു.