'സിംഗിള്‍ ചൈല്‍ഡ് സിൻഡ്രോം ആയതിനാല്‍ ഒരാളുമായി മുറി പങ്കിടുന്നത് ബുദ്ധിമുട്ടാണ്'; ഒറ്റക്ക് ജീവിക്കുന്നതാണ് ഇഷ്ടം; ജീവിതത്തിൽ ഇപ്പോൾ നല്ല സമാധാനമുണ്ടെന്നും തൃഷ
ചെന്നൈ: തനിക്ക് 'സിംഗിൾ ചൈൽഡ് സിൻഡ്രോം' ഉണ്ടെന്നും ആരുമായും മുറി പങ്കിടാൻ താല്പര്യമില്ലെന്നും വെളിപ്പെടുത്തി തൃഷ കൃഷ്ണൻ. നിലവിൽ ഒറ്റയ്ക്ക് ജീവിക്കുന്നതിൽ സംതൃപ്തയാണെന്നും വിവാഹത്തെക്കുറിച്ചുള്ള തന്റെ കാഴ്ചപ്പാടുകൾ പങ്കുവെച്ച നടി വ്യക്തമാക്കി. ജീവിതത്തിലെ വളരെ സമാധാനപരമായ ഒരു ഘട്ടത്തിലൂടെയാണ് കടന്നുപോകുന്നതെന്നും ഒറ്റക്കായതിൽ ബുദ്ധിമുട്ടുള്ള സമയമുണ്ടായിരുന്നെന്നും താരം പറഞ്ഞു. എന്നാൽ ഇപ്പോൾ ഒറ്റക്ക് ജീവിക്കുന്നത് ഇഷ്ടമാണെന്നും കൂട്ടിച്ചേർത്തു.
1999-ൽ അരങ്ങേറ്റം കുറിച്ച തൃഷ, 40-ാം വയസ്സിലും നായികയായി തിളങ്ങുകയാണ്. 2025-ൽ പുറത്തിറങ്ങാനിരിക്കുന്ന 'ഐഡന്റിറ്റി', 'വിടാമുയാർച്ചി', 'ഗുഡ് ബാഡ് അഗ്ലി', 'തഗ് ലൈഫ്' തുടങ്ങിയ ചിത്രങ്ങളിൽ താരം പ്രധാന വേഷത്തിലെത്തുന്നുണ്ട്. സിനിമാ ജീവിതത്തിനൊപ്പം വ്യക്തി ജീവിതവും പലപ്പോഴും വാർത്തകളിൽ ഇടം പിടിക്കാറുണ്ട്. അടുത്തിടെ താരം വിവാഹിതയാകാൻ പോകുന്നു എന്ന തരത്തിൽ പ്രചരിച്ച വാർത്തകളെ ഇൻസ്റ്റാഗ്രാം പോസ്റ്റിലൂടെ തള്ളിക്കളഞ്ഞിരുന്നു.
ഒരു അഭിമുഖത്തിൽ, താൻ ജീവിതത്തിലെ വളരെ സമാധാനപരമായ ഒരു ഘട്ടത്തിലൂടെയാണ് കടന്നുപോകുന്നതെന്നും ഒറ്റയ്ക്കായതിൽ വിഷമമുണ്ടായിരുന്നെങ്കിലും ഇപ്പോൾ ആ അവസ്ഥ ആസ്വദിക്കുകയാണെന്നും തൃഷ പറഞ്ഞിരുന്നു. 'സിംഗിൾ ചൈൽഡ് സിൻഡ്രോം' വളരെ കൂടുതലായതിനാൽ ആരുമായും മുറി പങ്കിടുന്നത് വ്യക്തിസ്വാതന്ത്ര്യത്തെ ബാധിക്കുമെന്ന് കരുതുന്നതായും താരം വ്യക്തമാക്കി.
'മണിരത്നം' സംവിധാനം ചെയ്ത 'തഗ് ലൈഫ്' എന്ന ചിത്രവുമായി ബന്ധപ്പെട്ട് നടന്ന വാർത്താസമ്മേളനത്തിലും താരം വിവാഹത്തെക്കുറിച്ചുള്ള തന്റെ നിലപാട് വ്യക്തമാക്കുകയുണ്ടായി. വിവാഹ സങ്കൽപ്പത്തിൽ വിശ്വസിക്കുന്നില്ലെന്നും വിവാഹിതയായാലും ഇല്ലെങ്കിലും ജീവിതത്തിൽ സംതൃപ്തയാണെന്നും തൃഷ പറഞ്ഞു. ഈ വിഷയത്തിൽ മുൻപും താരം ഇതേ നിലപാട് തന്നെയായിരുന്നു പുലർത്തിയിരുന്നത്.