അന്ന് ഞാൻ ആദ്യം വിളിച്ചത് എന്റെ മോനെയാണ്; കുറച്ച് നാളത്തേക്ക് യൂട്യൂബ് നോക്കണ്ട എന്നും അവൻ പറഞ്ഞു; ഞാൻ കുറെ വിഷമിച്ചു; ജീവിതം അവസാനിപ്പിച്ചാലോ...എന്ന് വരെ ചിന്തിച്ചു; മറക്കാൻ ആഗ്രഹിക്കുന്ന ദിവസങ്ങൾ വീണ്ടും ഓർത്തെടുത്ത് മഞ്ജു പത്രോസ്

ടെലിവിഷൻ പ്രേക്ഷകർക്കിടയിലും സിനിമയിലും വളരെ ചുരുക്കകാലം കൊണ്ട് പ്രശസ്തി നേടിയ താരമാണ് മഞ്ജു പത്രോസ്. യൂട്യൂബ് ചാനലിലൂടെയും മറ്റു സോഷ്യൽ മീഡിയ പ്ലാറ്റ്ഫോമുകളിലൂടെയും താരം വളരെ സജീവമാണ്. താരത്തിന്റെ അഭിമുഖങ്ങൾ ഉൾപ്പടെ വലിയ രീതിയിൽ ശ്രദ്ധ നേടുകയും ചെയ്തിട്ടുണ്ട്.

ഇപ്പോഴിതാ, മഞ്ജുവിന്റെ പുതിയ അഭിമുഖവും ഇപ്പോൾ ശ്രദ്ധിക്കപ്പെടുകയാണ്. ബിഗ് ബോസ് തന്റെ ജീവിതത്തെ തന്നെ ആകെ മാറ്റിമറിച്ചു എന്നാണ് താരം പറയുന്നത്. ബിഗ്ബോസിനു ശേഷം പുറത്തിറങ്ങിയ മഞ്ജുവിനെതിരെ വലിയ രീതിയിലാണ് സോഷ്യൽ മീഡിയയിൽ സൈബർ അറ്റാക്ക് നടന്നത്.

താരത്തിന്റെ വാക്കുകൾ...

'ഞാൻ സൂപ്പർസ്റ്റാർ ആണ്, അനീതിക്കെതിരെ പ്രതികരിച്ചു എന്നൊക്കെ വിചാരിച്ചാണ് ബിഗ് ബോസിൽ നിന്നും പുറത്തു വരുന്നത്. ഫോണൊന്നും കയ്യിൽ ഇല്ലല്ലോ. പുറത്തു നടക്കുന്നത് ഇതൊക്കെയാണെന്ന് അറിയുന്നില്ല. പുറത്തിറങ്ങിയ ശേഷം ആദ്യം വിളിച്ചത് എന്റെ മോനെയാണ്. അമ്മ, കുറച്ചു നാളത്തേക്ക് യൂട്യൂബ് നോക്കണ്ട എന്നാണ് അവൻ എന്നോട് പറഞ്ഞത്', ഒരു സ്വകാര്യ ചാനലിനു നൽകിയ അഭിമുഖത്തിൽ മഞ്ജു പത്രോസ് പറഞ്ഞു.

സൈബർ ആക്രമണങ്ങൾ ഞാൻ അത്ര എളുപ്പത്തിലൊന്നുമല്ല തരണം ചെയ്തത്, മരിച്ച് പോയാലോ എന്ന് വരെ ആലോചിച്ചിട്ടുണ്ട്. ഞാൻ മാത്രമല്ല എന്റെ മകൻ, മാതാപിതാക്കൾ, എന്നോട് ഏറ്റവും അടുത്തു നിൽക്കുന്ന ആളുകൾ നോക്കി ആളുകൾ പരിഹസിച്ച് ചിരിക്കുകയാണ്. എന്റെ മകളെ എനിക്കറിയാം എന്ന് അമ്മച്ചി പറയും, പക്ഷേ വീട്ടിലിരുന്ന് അമ്മച്ചി വിഷമിക്കുന്നത് ഞാൻ കണ്ടിട്ടുണ്ട്. ഇതൊക്കെ കണ്ടിട്ടാണ് കേസ് കൊടുക്കാൻ തീരുമാനിച്ചതെന്നും മഞ്‍ജു പത്രോസ് പറഞ്ഞു.

കേസിൽ അയാൾ ശിക്ഷിക്കപ്പെടുമോ എന്നൊന്നും എനിക്ക് അറിയില്ല. പക്ഷേ എനിക്കയാളെ കോടതിയിൽ കൊണ്ട് നിർത്താൻ സാധിച്ചല്ലോ. അതുമതി. അയാൾ പോലീസ് സ്റ്റേഷനിൽ വെച്ച് എന്റെ കാലൊക്കെ പിടിച്ചിരുന്നു. പക്ഷെ എന്റെ മനസ് അലിഞ്ഞില്ല. ഞാൻ അനുഭവിച്ച വേദന അയാൾ മനസിലാകണം'' മഞ്ജു പത്രോസ് വ്യക്തമാക്കി.