'വിവാഹം ഒന്നിന്റെയും അവസാന വാക്കല്ല'; അത് പറയാൻ ഇന്നത്തെ കുട്ടികൾക്ക് ധൈര്യമുണ്ട്; ആകാശങ്ങളിലേക്ക് പറന്നുയരാൻ സ്ത്രീകൾക്ക് സാമ്പത്തിക സ്വാതന്ത്ര്യം പ്രധാനമെന്നും മഞ്ജു വാര്യർ

തിരുവനന്തപുരം: വിവാഹം ജീവിതത്തിന്റെ അവസാന ലക്ഷ്യമല്ലെന്നും, സ്ത്രീകൾക്ക് അവരുടെ ആഗ്രഹങ്ങൾ നിറവേറ്റുന്നതിനും സ്വയം ശാക്തീകരിക്കപ്പെടുന്നതിനും സാമ്പത്തിക സ്വാതന്ത്ര്യം അനിവാര്യമാണെന്നും നടി മഞ്ജു വാര്യർ. കേരള വനിതാ കമ്മീഷന്റെ 'പറന്നുയരാം കരുത്തോടെ' കാമ്പയിന്റെ ബ്രാൻഡ് അംബാസഡറായി ചുമതലയേറ്റ ചടങ്ങിൽ സംസാരിക്കുകയായിരുന്നു അവർ. മാറിക്കൊണ്ടിരിക്കുന്ന പെൺകുട്ടികളിലും സമൂഹത്തിലും വലിയ പ്രതീക്ഷയുണ്ടെന്നും മഞ്ജു വാര്യർ അഭിപ്രായപ്പെട്ടു.

വിവാഹം ഒന്നിന്റെയും അവസാന വാക്കല്ലെന്ന് പ്രഖ്യാപിക്കാൻ ധൈര്യം കാണിക്കുന്ന കൂട്ടികൾ ഇന്ന് ഉണ്ടെന്ന് മഞ്ജു പറഞ്ഞു. വിവാഹം കഴിക്കണമോ വേണ്ടയോ എന്നത് സ്വന്തം തീരുമാനമായിരിക്കണമെന്ന് ഇന്നത്തെ പെൺകുട്ടികൾ ഉറച്ചു വിശ്വസിക്കുന്നുണ്ട്. മക്കളുടെ ഇത്തരം തീരുമാനങ്ങൾക്ക് പൂർണ്ണ പിന്തുണ നൽകി കൂടെ നിൽക്കുന്ന മാതാപിതാക്കളെ കാണുന്നതാണ് സമൂഹത്തിലെ ഏറ്റവും വലിയ മാറ്റമായി താൻ കാണുന്നതെന്നും, ഇത് സമൂഹം മാറിക്കൊണ്ടിരിക്കുന്നു എന്നതിന്റെ തെളിവാണെന്നും അവർ കൂട്ടിച്ചേർത്തു.

സാമ്പത്തികമായി സ്വതന്ത്രരായാൽ മാത്രമേ സ്ത്രീകൾക്ക് സ്വന്തം ചിറകുകൾ കണ്ടെത്താനും ആകാശങ്ങളിലേക്ക് പറന്നുയരാനും സാധിക്കൂ എന്ന് മഞ്ജു വാര്യർ ഊന്നിപ്പറഞ്ഞു. ഇതിനായി വനിതാ കമ്മീഷന്റെ 'പറന്നുയരാം കരുത്തോടെ' പോലുള്ള പദ്ധതികൾ വലിയ സഹായമാകുമെന്നും അവർ ചൂണ്ടിക്കാട്ടി. സാധാരണക്കാരായ സ്ത്രീകളുടെ പോരാട്ടവീര്യത്തെക്കുറിച്ചും മഞ്ജു തന്റെ പ്രസംഗത്തിൽ പരാമർശിച്ചു.

കാശ്മീരിൽ നിന്ന് കേരളത്തിലേക്ക് ആപ്പിൾ ലോറി ഓടിക്കുന്ന ജലജ എന്ന ഡ്രൈവർ, കാർ മുതൽ ജെസിബി വരെ ഓടിക്കുന്ന എഴുപതുകാരി രാധാമണിയമ്മ, തട്ടുകട നടത്തി എൽഎൽബിക്ക് പഠിക്കുന്ന വിദ്യാർത്ഥിനി എന്നിവരുടെ ഉദാഹരണങ്ങൾ അവർ എടുത്തുപറഞ്ഞു. അച്ഛന്റെ മരണശേഷം തനിച്ചായപ്പോൾ നൃത്തത്തിലേക്കും സാഹിത്യത്തിലേക്കും മടങ്ങിപ്പോയി സ്വന്തം സന്തോഷം കണ്ടെത്തിയ തന്റെ അമ്മയും വലിയ പ്രചോദനമാണെന്ന് മഞ്ജു വാര്യർ കൂട്ടിച്ചേർത്തു.