'അവള്‍ ഇപ്പോഴും അതേ പഴയ തമാശക്കാരിയായ 'പൊടി' തന്നെയാണ്; അവള്‍ ആരെയും അതിശയിപ്പിക്കുന്നൊരു നടിയാണ്'; ഉര്‍വശിയുടെ കവിളില്‍ ചുംബിച്ച് ശോഭന; 'ഇത് ഞങ്ങള്‍ ആഗ്രഹിച്ച ഫ്രെയിം' എന്ന് ആരാധകര്‍
കൊച്ചി: മലയാള സിനിമയില്‍ പകരക്കാരില്ലാത്ത നായികമാരാണ് ഉര്‍വശിയും ശോഭനയും. ഇരുവര്‍ക്കും കേരളത്തിനും പുറത്തും ഏറെ ആരാധകരാണ് ഉള്ളത്. വളരെ കാലത്തിന് ശേഷം ഇരുവരും നേരില്‍ കണ്ടപ്പോഴുള്ള ഒരു ചിത്രമാണ് സമൂഹ മാധ്യമങ്ങളില്‍ വൈറലാകുന്നത്. നടി ഉര്‍വശിക്കൊപ്പമുള്ള മനോഹരമായ ചിത്രം തന്റെ ഇന്‍സ്റ്റഗ്രാം അക്കൗണ്ടില്‍ പങ്കുവച്ചിരിക്കുകയാണ് നടി ശോഭന. കൊച്ചി വിമാനത്താവളത്തില്‍വച്ച് ഉര്‍വശിയെ കണ്ടുമുട്ടിയപ്പോള്‍ പകര്‍ത്തി ചിത്രമാണ് ശോഭന പങ്കുവച്ചത്. ഉര്‍വശിക്ക് ശോഭന ഉമ്മ നല്‍കുന്ന ചിത്രം ചുരുങ്ങിയ സമയത്തിനകം തന്നെ സമൂഹമാധ്യമങ്ങളില്‍ വൈറലായി. ഇരുവരും തമ്മിലുള്ള സൗഹൃദത്തെ കുറിച്ച് മനോഹരമായൊരു കുറിപ്പും ചിത്രത്തിനൊപ്പം ശോഭന പങ്കുവച്ചു.
'കൊച്ചിയിലേക്ക് ഇത്രയുമധികം വിമാനയാത്രകള്‍ നടത്തിയിട്ടുണ്ടെങ്കിലും ഒരിക്കല്‍പോലും ഉര്‍വശി ജിയെ കണ്ടുമുട്ടാതിരുന്നത് എന്താണെന്ന് ഞാന്‍ ആലോചിച്ചിട്ടുണ്ട്. അവള്‍ ഇപ്പോഴും എനിക്ക് അറിയാവുന്ന അതേ തമാശക്കാരിയായ 'പൊടി' തന്നെയാണ്. എന്റെ നമ്പര്‍ അവളുടെ ഫോണില്‍ എനിക്ക് സേവ് ചെയ്യണമായിരുന്നു. ഞങ്ങള്‍ പരസ്പരം മൊബൈലുകള്‍ തിരഞ്ഞു. അവള്‍ക്കും അതൊരു വൈകാരിക നിമിഷമായിരിക്കുമെന്ന് പ്രതീക്ഷിക്കുന്നു. അവള്‍ ആരെയും അതിശയിപ്പിക്കുന്നൊരു നടിയാണ്', ശോഭന കുറിച്ചു.
മലയാളികളുടെ പ്രിയപ്പെട്ട രണ്ട് നായികമാരെ ഒരേ ഫ്രെയിമില്‍ കണ്ടതിന്റെ സന്തോഷത്തിലാണ് ആരാധകര്‍. 'ഇത് ഞങ്ങള്‍ ആഗ്രഹിച്ച ഒരു ഫ്രെയിം' എന്നാണ് പലരും അഭിപ്രായപ്പെടുന്നത്. ഈ ചിത്രം ഒരു കാലഘട്ടത്തെ അടയാളപ്പെടുത്തുന്നു എന്നാണ് ഒരാള്‍ കമന്റ് ചെയ്തത്. 'മലയാളത്തിന്റെ സൂപ്പര്‍ സ്റ്റാറുകള്‍ ഇവരാണ്', 'ഇതിനായി കാത്തിരിക്കുകയായിരുന്നുവെന്നും മനോഹര നിമിഷം', 'ഇവര്‍ രണ്ട് പേരുമില്ലാതെ മലയാള സിനിമയുടെ ചരിത്രം എഴുതാന്‍ പറ്റില്ല', എന്നിങ്ങനെ പോകുന്നു കമന്റുകള്‍. വളരെ കുറച്ച് സിനിമകളില്‍ മാത്രമേ ഉര്‍വശിയും ശോഭനയും ഒരുമിച്ച് അഭിനയിച്ചിട്ടുള്ളൂ. 'വരനെ ആവശ്യമുണ്ട്' എന്ന സിനിമയിലാണ് ഇരുവരും അവസാനമായി ഒന്നിച്ചെത്തിയത്.