'ബേസിലിന്റെ സിനിമകളും, തമാശകളും വളരെ ഇഷ്ടമാണ്'; ഞാനും ഭർത്താവും കടുത്ത ആരാധകർ; പ്രശംസിച്ച് രാധിക ശരത്കുമാർ
ചെന്നൈ: മലയാളികളുടെ പ്രിയ താരം ബേസിലിനെ പ്രശംസിച്ച് തമിഴ് നടി രാധിക ശരത്കുമാർ. ബേസിലിന്റെ സിനിമകളും അതിലെ തമാശകളും വളരെ ഇഷ്ടമാണെന്നാണ് രാധിക പറഞ്ഞത്. താനും ഭർത്താവും കടുത്ത ആരാധകരാണെന്ന് രാധിക ശരത്കുമാർ സമൂഹമാധ്യമങ്ങളിൽ കുറിച്ചു. ബേസിലിന്റെ സിനിമകളിലെ ഹാസ്യത്തെ താൻ ഏറെ ഇഷ്ടപ്പെടുന്നതായും അവർ വ്യക്തമാക്കി. ജിമ്മിൽ വെച്ച് ബേസിലിനൊപ്പമെടുത്ത ചിത്രവും രാധിക പങ്കുവെച്ചിട്ടുണ്ട്. തിയേറ്ററുകളിൽ റിലീസ് ചെയ്തതിന് പിന്നാലെ ഒ.ടി.ടി പ്ലാറ്റ്ഫോമുകളിലൂടെ കൂടുതൽ പ്രേക്ഷകരിലേക്ക് എത്തിയ 'പൊൻമാൻ' വലിയ ശ്രദ്ധ നേടിയിരുന്നു.
മുൻ ഇന്ത്യൻ വിക്കറ്റ് കീപ്പർ ബാറ്റ്സ്മാൻ ദിനേശ് കാർത്തിക് കഴിഞ്ഞ ദിവസമാണ് 'പൊൻമാനെ'യും ബേസിലിനെയും പ്രശംസിച്ച് രംഗത്തെത്തിയത്. താൻ സമീപകാലത്ത് കണ്ട മികച്ച ചിത്രങ്ങളിലൊന്നാണ് 'പൊൻമാൻ' എന്ന് കാർത്തിക് അഭിപ്രായപ്പെട്ടു. "പൊൻമാനിലെ ബേസിൽ ജോസഫിന്റെ അസാമാന്യ അഭിനയം എടുത്തുപറയേണ്ടതാണ്. അദ്ദേഹത്തിന്റെ അഭിനയ മികവിലൂടെയാണ് സിനിമ ജീവസ്സുറ്റതായി മുന്നോട്ടുപോകുന്നത്. സഹതാരങ്ങളും മികച്ച പിന്തുണ നൽകി," കാർത്തിക് കുറിച്ചു. ദിൻജിത്ത് സംവിധാനം ചെയ്ത 'എക്കോ' എന്ന ചിത്രത്തെക്കുറിച്ചും മലയാള സിനിമയുടെ നിലവിലെ വളർച്ചയെക്കുറിച്ചും കാർത്തിക് തന്റെ സമൂഹമാധ്യമ പോസ്റ്റിൽ പരാമർശിച്ചു.
ദിനേശ് കാർത്തിക്കിന്റെ അഭിനന്ദനങ്ങൾക്ക് ബേസിൽ ജോസഫ് നന്ദി രേഖപ്പെടുത്തി. "ഒരുപാട് നന്ദി.. ദിനേശ് കാർത്തിക്; നിങ്ങളുടെ പ്രതികരണം എന്റെ മനം നിറച്ചു" എന്ന് ബേസിൽ മറുപടിയായി കുറിച്ചു. സിനിമയിലും ജീവിതത്തിലും നർമ്മം നിറഞ്ഞ വ്യക്തിത്വമാണ് ബേസിൽ ജോസഫിന്റേതെന്ന് പല സെലിബ്രിറ്റികളും ചൂണ്ടിക്കാട്ടിയിട്ടുണ്ട്. അടുത്തിടെ മകൾക്കും ഭാര്യക്കുമൊപ്പം ബേസിൽ പങ്കുവെച്ച 'കുട്ടുമ കുട്ടൂ' എന്ന റീൽ സാമൂഹിക മാധ്യമങ്ങളിൽ ഏറെ ചിരി പടർത്തുകയും വൈറലാവുകയും ചെയ്തിരുന്നു.