കൊറിയൻ മോഹൻലാലിന് ഭക്ഷണം വിളമ്പി ബാലയ്യ; ആടിപ്പാടി തെന്നിന്ത്യൻ സൂപ്പർ താരങ്ങൾ; പ്രഭാസ്- അനുഷ്ക എഐ വിവാഹ വിഡിയോ പങ്കുവെച്ച് ആർജിവി
മുംബൈ: സിനിമ താരങ്ങളായ പ്രഭാസും അനുഷ്ക ഷെട്ടിയും തമ്മിലുള്ള എഐ (ആർട്ടിഫിഷ്യൽ ഇൻ്റലിജൻസ്) സാങ്കേതികവിദ്യ ഉപയോഗിച്ച് നിർമ്മിച്ച വിവാഹം വിഡിയോ പങ്കുവെച്ച് സംവിധായകൻ രാം ഗോപാൽ വർമ. 'ഹേയ് എഐ, എന്താ ഇത്?' എന്ന അടിക്കുറിപ്പോടെ എക്സിലാണ് വർമ ഈ വിഡിയോ പോസ്റ്റ് ചെയ്തത്. പ്രമുഖ താരങ്ങളുടെ സാങ്കൽപ്പിക വിവാഹ വിഡിയോ സോഷ്യൽ മീഡിയയിൽ വലിയ ചർച്ചകൾക്ക് വഴിവെച്ചിരിക്കുകയാണ്.
ക്രിയോവിയ എന്ന ഇൻസ്റ്റാഗ്രാം പേജിലാണ് ഈ എഐ വിഡിയോ ആദ്യമായി പ്രത്യക്ഷപ്പെട്ടത്. "രാജ്യം മുഴുവൻ കാത്തിരുന്ന വിവാഹം! സൂപ്പർ സ്റ്റാർ മുതൽ ആത്മമിത്രങ്ങൾ വരെ - ഇതാണ് ഇതുവരെയുള്ളതിൽ വച്ച് ഏറ്റവും വലിയ വിവാഹ ആഘോഷം!" എന്ന അടിക്കുറിപ്പോടെയാണ് ക്രിയോവിയ ഈ വിഡിയോ പങ്കുവെച്ചത്. ഈ സാങ്കൽപ്പിക വിവാഹ ചടങ്ങുകളിൽ രാം ഗോപാൽ വർമയെ പൂജാരിയായി അവതരിപ്പിച്ചിരിക്കുന്നു.
തമിഴ് സിനിമാ ലോകത്തുനിന്ന് വിജയ്, അജിത്, രജനികാന്ത്, കമൽ ഹാസൻ, സൂര്യ, ധനുഷ് എന്നിവരെയും മലയാളത്തിൽനിന്ന് മോഹൻലാൽ, മമ്മൂട്ടി, ദുൽഖർ സൽമാൻ, പൃഥ്വിരാജ് സുകുമാരൻ, ഫഹദ് ഫാസിൽ എന്നിവരെയും അതിഥികളായി വിഡിയോയിൽ കാണാം. തൃഷ, കാജൽ അഗർവാൾ, നയൻതാര, രമ്യ കൃഷ്ണൻ തുടങ്ങിയ നായികമാരും വിഡിയോയിൽ നിറഞ്ഞുനിൽക്കുന്നു. ചെണ്ട കൊട്ടുന്ന റാം ചരൺ, നൃത്തം ചെയ്യുന്ന എസ്.എസ്. രാജമൗലി, വിവാഹ സദ്യ കഴിക്കുന്ന ഡോങ് ലീ, സദ്യ വിളമ്പുന്ന ബാലയ്യ തുടങ്ങിയ രസകരമായ ദൃശ്യങ്ങളും ഈ എഐ വിഡിയോയുടെ ഭാഗമാണ്.
വർഷങ്ങളായി പ്രഭാസും അനുഷ്കയും പ്രണയത്തിലാണെന്ന അഭ്യൂഹങ്ങൾ സിനിമാ മേഖലയിൽ ശക്തമാണ്. എന്നാൽ ഈ ഗോസിപ്പുകളോട് ഇരുവരും ഇതുവരെ ഔദ്യോഗികമായി പ്രതികരിച്ചിട്ടില്ല. 'ബാഹുബലി'യാണ് ഈ താരജോഡി ഒടുവിൽ ഒരുമിച്ച് അഭിനയിച്ച ചിത്രം. സന്ദീപ് റെഡ്ഡി വാങ്ക സംവിധാനം ചെയ്യുന്ന 'സ്പിരിറ്റ്' ആണ് പ്രഭാസിന്റേതായി അണിയറയിൽ ഒരുങ്ങുന്ന അടുത്ത ചിത്രം. സാമൂഹിക മാധ്യമങ്ങളിൽ സജീവമായി തന്റെ അഭിപ്രായങ്ങളും നിലപാടുകളും രേഖപ്പെടുത്താറുള്ള വ്യക്തിയാണ് രാം ഗോപാൽ വർമ.