'മമ്മൂട്ടി എന്നാണ് ശരിക്കും നിന്നെ വിളിക്കേണ്ടത്'; മഹാനടന് ആ പേരിട്ടത് എന്റെ സഹപാഠി; ഒരു യുഗത്തിന് നാമകരണം ചെയ്ത മഹദ് വ്യക്തി; പൂച്ചെണ്ടുമായി ചെന്നൊന്നു കാണണം; കുറിപ്പുമായി വി കെ ശ്രീരാമൻ

കൊച്ചി: മലയാളത്തിന്റെ മഹാനടൻ മമ്മൂട്ടിയുടെ പേരിന് പിന്നിലെ കൗതുകകരമായ കഥ പങ്കുവെച്ച് സുഹൃത്തും എഴുത്തുകാരനുമായ വി കെ ശ്രീരാമൻ. തന്റെ സഹപാഠിയായ ശശിധരനാണ് മമ്മൂട്ടിയെ ആദ്യമായി ആ പേരിൽ വിളിച്ചതെന്ന് നടൻ വെളിപ്പെടുത്തിയതിന് പിന്നാലെ, ഒരു യുഗത്തിന് നാമകരണം ചെയ്ത മഹത് വ്യക്തിയാണ് ശശിധരൻ എന്നും ശ്രീരാമൻ ഫെയ്‌സ്ബുക്കിൽ കുറിച്ചു.

കഴിഞ്ഞ ദിവസം മമ്മൂട്ടി തന്നെയാണ് തനിക്ക് 'മമ്മൂട്ടി' എന്ന് പേരിട്ടയാളെ മലയാളികൾക്ക് മുന്നിൽ പരിചയപ്പെടുത്തിയത്. ശശിധരൻ എന്ന സഹപാഠിയാണ് തന്നെ ആദ്യമായി ഈ പേരിൽ വിളിച്ചതെന്നാണ് മമ്മൂട്ടി പറഞ്ഞത്. ഈ വെളിപ്പെടുത്തലിന് പിന്നാലെയാണ് വി കെ ശ്രീരാമൻ ശശിധരന്റെ മഹത്വത്തെ പ്രകീർത്തിച്ച് രംഗത്തെത്തിയത്.

വി കെ ശ്രീരാമന്റെ ഫെയ്‌സ്ബുക്ക് കുറിപ്പിന്റെ പൂർണ രൂപം:

30 വർഷം മുമ്പ് ദൂരദർശൻനിർമ്മിച്ച 'നക്ഷത്രങ്ങളുടെ രാജകുമാരൻ' എന്ന ഡോക്യുമെൻ്ററിയുടെ ഷൂട്ട് നടക്കുന്ന സമയത്ത് ഞാൻ ചോദിച്ചു.

'നാട്ടിലോ വീട്ടിലോ ആരും നിങ്ങളെ മമ്മൂട്ടി എന്നു വിളിക്കുന്നത് കേട്ടില്ല. മമ്മൂഞ്ഞ്, കുഞ്ഞ് എന്നൊക്കെയാണ് വിളിക്കുന്നത്. എന്താ അതങ്ങനെ ?'ആ ചോദ്യത്തിനു ഉത്തരമായി മഹാരാജാസിൽ ചെന്നു ചേർന്ന കാലത്ത് പേരു ചോദിക്കുന്നവരോടെല്ലാം 'ഒമർഷറീഫ് 'എന്നാണ് പേരെന്നു പറഞ്ഞിരുന്നതെന്നും ഒരു ദിവസം ഐഡൻ്റിറ്റി കാർഡ് നിലത്തു വീണപ്പോൾ അതെടുത്ത് നോക്കിയ ശശിധരൻ എന്ന ഒരു വിദ്യാർത്ഥി മറ്റുള്ളവർ കേൾക്കെ

"നിൻ്റെ യഥാർത്ഥ പേര് മുഹമ്മദുകുട്ടി എന്നാണല്ലേ? മമ്മൂട്ടി എന്നാണ് ശരിക്കുനിന്നെ വിളിക്കേണ്ടത് "അതുകേട്ട് കൂടെ നിന്ന മറ്റു സുഹൃത്തുക്കൾ മമ്മൂട്ടി എന്ന് ഉച്ചത്തിൽ വിളിച്ച് അത് ഉറപ്പിക്കുകയും ചെയ്തു.

അന്നു മുതലാണ് മമ്മൂട്ടിയായത്. പിന്നെ ഞാനതങ്ങു സ്വീകരിച്ചു"

എന്തായാലും എടവനക്കാട്ടുകാരനായ

ശശിധരനെ ഇന്നലെ യാണ് ചിത്രത്തിൽ കണ്ടത്.

ഏറെ സന്തോഷം.

ഒരു യുഗത്തിന് നാമകരണം ചെയ്ത മഹത് വ്യക്തിയാണല്ലോ ശശിധരൻ.

ചെന്നൊന്നു കാണണം.

ഒരു പൂച്ചെണ്ടും കയ്യിൽ വെക്കണം.

Full View