'ആ കഥാപാത്രം മമ്മൂക്ക നൽകിയ സമ്മാനം'; ഈ ജന്മത്തിലെ ഭാഗ്യങ്ങളാണിതെല്ലാം; ഡയലോഗ് ഡെലിവറി മെച്ചപ്പെടുത്താൻ സഹായിച്ചു; 'കളങ്കാവൽ' ചിത്രത്തിലെ കഥാപാത്രത്തെ കുറിച്ച് വിനായകൻ

കൊച്ചി: മമ്മൂട്ടി കമ്പനിയുടെ ബാനറിൽ ജിതിൻ കെ. ജോസ് സംവിധാനം ചെയ്യുന്ന 'കളങ്കാവൽ' എന്ന സിനിമയിലെ തന്റെ കഥാപാത്രം നടൻ മമ്മൂട്ടി നൽകിയ വലിയൊരു സമ്മാനമാണെന്ന് നടൻ വിനായകൻ. ജീവിതത്തിലെ വലിയൊരു ഭാഗ്യമായി ഈ വേഷത്തെ കാണുന്നുവെന്നും, അത് ലൗഡ് അല്ലാത്തതും സൂക്ഷ്മമായ അഭിനയം ആവശ്യപ്പെടുന്നതുമാണെന്നും അദ്ദേഹം വെളിപ്പെടുത്തി. മമ്മൂട്ടി കമ്പനിയുടെ ഔദ്യോഗിക യൂട്യൂബ് ചാനലിൽ പങ്കുവെച്ച അഭിമുഖത്തിലാണ് വിനായകൻ തന്റെ അനുഭവങ്ങൾ പങ്കുവെച്ചത്.

മമ്മൂട്ടിയോടൊപ്പം പ്രവർത്തിക്കാൻ വളരെ എളുപ്പമാണെന്ന് വിനായകൻ അഭിപ്രായപ്പെട്ടു. "മമ്മൂക്ക തന്നെ പറയുന്നു വിനായകനെ വെച്ച് ചെയ്യിക്കാമെന്ന്... ജന്മത്തിലെ ഭാഗ്യങ്ങളാണിതെല്ലാം," എന്ന് അദ്ദേഹം പറഞ്ഞു. മമ്മൂട്ടിയുടെ എതിർവേഷത്തിൽ ഇത്രയും വലിയൊരു ചിത്രത്തിൽ അഭിനയിക്കാൻ കഴിഞ്ഞത് ഭാഗ്യമായാണ് കാണുന്നത്. ഡയലോഗ് ഡെലിവറി അടക്കമുള്ള കാര്യങ്ങളിൽ മമ്മൂട്ടി വലിയ പിന്തുണ നൽകിയെന്നും, അദ്ദേഹത്തിന്റെ നിർദേശങ്ങൾ വളരെയധികം ഉപകരിച്ചെന്നും വിനായകൻ കൂട്ടിച്ചേർത്തു. "അത്രയൊന്നും പറയണ്ട അല്ലെങ്കിൽ ഇത്രയും പറയണം എന്നൊക്കെയുള്ള നിർദേശങ്ങൾ സഹായകമായി," എന്നും മമ്മൂട്ടിക്ക് വലിയ അനുഭവസമ്പത്തുള്ളതുകൊണ്ട് കാര്യങ്ങൾ എളുപ്പമായെന്നും വിനായകൻ വ്യക്തമാക്കി.

കുറ്റാന്വേഷണ വിഭാഗത്തിൽപ്പെടുന്ന 'കളങ്കാവൽ' എന്ന ചിത്രത്തിലെ തന്റെ കഥാപാത്രം നായകനാണോ വില്ലനാണോ എന്ന ചോദ്യത്തിന് സസ്പെൻസ് നിലനിർത്തിക്കൊണ്ട് വിനായകൻ മറുപടി നൽകി. തന്റേയും മമ്മൂട്ടിയുടേയും കഥാപാത്രങ്ങൾക്ക് അവരുടേതായ സത്യങ്ങളുണ്ടെന്നും, താൻ ഒരു സിസ്റ്റത്തിന്റെ ആളും മമ്മൂട്ടിയുടെ കഥാപാത്രം സ്വാതന്ത്ര്യത്തിന്റെ അങ്ങേയറ്റത്തെ പ്രതിനിധിയുമാണെന്നും അദ്ദേഹം പറഞ്ഞു.

സംവിധായകൻ ജിതിൻ കെ. ജോസ് തന്റെ സ്വാഭാവികമായ 'ലൗഡ്' ശൈലിയിൽ നിന്ന് മാറ്റി, സൂക്ഷ്മമായ അഭിനയം കാഴ്ചവെക്കാൻ സഹായിച്ചുവെന്നും വിനായകൻ എടുത്തുപറഞ്ഞു. "വിനായകന്റെ കയ്യും കാലുമൊക്കെ കെട്ടിക്കളഞ്ഞു ജിതിൻ," എന്ന് അദ്ദേഹം തമാശരൂപേണ പറഞ്ഞു. ലൗഡ് ആയി അഭിനയിക്കാൻ എളുപ്പമാണെങ്കിലും, പിടിച്ചുനിർത്തി അഭിനയിക്കുന്നത് തനിക്ക് കുറച്ച് പ്രയാസമായിരുന്നു എന്നും ഈ വെല്ലുവിളി ഏറ്റെടുത്തതിൽ സന്തോഷമുണ്ടെന്നും താരം വ്യക്തമാക്കി.