പരിശോധന ഒന്ന് ശക്തമാക്കിയപ്പോൾ ഞെട്ടൽ; കുവൈറ്റിലെ മയക്കുമരുന്ന് വേട്ടയിൽ ഇതുവരെ കുടുങ്ങിയത് ആറു പേർ; കടുത്ത നടപടി ഉണ്ടാകുമെന്ന് അധികൃതർ

കുവൈറ്റ്: രാജ്യത്ത് മയക്കുമരുന്ന് വിതരണം തടയുന്നതിൻ്റെ ഭാഗമായി നടന്ന ശക്തമായ നടപടികളിൽ വൻ മയക്കുമരുന്ന് ശേഖരം പിടികൂടി. നാല് വ്യത്യസ്ത കേസുകളിലായി ആറ് പേരെ അറസ്റ്റ് ചെയ്തെന്നും ഏകദേശം 12.8 കിലോഗ്രാം മയക്കുമരുന്നുകളും ലഹരിവസ്തുക്കളും ഒരു തോക്കും കണ്ടെടുത്തെന്നും ആഭ്യന്തര മന്ത്രാലയം വ്യാഴാഴ്ച അറിയിച്ചു.

മയക്കുമരുന്ന് നിയന്ത്രണത്തിനായുള്ള ജനറൽ ഡിപ്പാർട്ട്‌മെന്‍റിന്‍റെ നേതൃത്വത്തിൽ നടന്ന പരിശോധനകളിലാണ് പ്രതികളെ പിടികൂടിയത്. രാജ്യവ്യാപകമായി നടപ്പാക്കുന്ന സുരക്ഷാ കർശന നടപടികളുടെയും മയക്കുമരുന്ന് ഉന്മൂലനം ചെയ്യാനുള്ള ക്രിമിനൽ സുരക്ഷാ വിഭാഗത്തിൻ്റെ ഊർജ്ജിത പ്രചാരണങ്ങളുടെയും ഭാഗമായാണ് ഈ അറസ്റ്റുകൾ എന്ന് മന്ത്രാലയം പുറത്തിറക്കിയ പ്രസ്താവനയിൽ വ്യക്തമാക്കി.

ഇവർ പിടിയിലായ വിവിധ സ്ഥലങ്ങളിൽ നിന്ന് വലിയ അളവിലുള്ള മയക്കുമരുന്ന് ശേഖരങ്ങളാണ് പിടിച്ചെടുത്തത്. അൽ-റായിൽ ഒരു കുവൈത്തി പൗരനെയും ഒരു അനധികൃത താമസക്കാരനെയും അറസ്റ്റ് ചെയ്തപ്പോൾ ഇവരിൽ നിന്ന് ഏകദേശം 2.5 കിലോഗ്രാം കഞ്ചാവ്, ഒരു കിലോഗ്രാം സിന്തറ്റിക് ഡ്രഗ്‌സ്, ഒരു കൃത്യതാ സ്കെയിൽ, ഒരു തോക്ക് എന്നിവ കണ്ടെടുത്തു.

ഖുർത്തുബയിൽ നിന്ന് അറസ്റ്റിലായ ഒരു ഏഷ്യൻ പൗരനിൽ നിന്ന് 1.5 കിലോഗ്രാം മെത്താംഫെറ്റാമൈൻ, 500 ഗ്രാം ഹെറോയിൻ എന്നിവ ലഭിച്ചു. അൽ-ഷുഹദ, ഫുനൈറ്റീസ് പ്രദേശങ്ങളിൽ രണ്ട് കുവൈത്തി പൗരന്മാരെ ഏകദേശം 3.5 കിലോഗ്രാം ഹാഷിഷ്, രണ്ട് ഗ്രാം കൊക്കെയ്ൻ, ഒരു ഗ്രാം ഷാബു, ഒരു കൃത്യതാ സ്കെയിൽ എന്നിവ കൈവശം വെച്ചതിന് അറസ്റ്റ് ചെയ്തു.