മരുന്നുകളുടെ സുരക്ഷയും ഗുണനിലവാരവും ഉറപ്പാക്കണം..; കുവൈറ്റിൽ 15 സ്വകാര്യ ഫാർമസികൾ പൂട്ടും; ലൈസൻസുകൾ റദ്ദാക്കാനും ഉത്തരവ്

കുവൈറ്റ്: നിയമലംഘനങ്ങൾ കണ്ടെത്തിയതിനെ തുടർന്ന് കുവൈത്തിലെ 15 സ്വകാര്യ ഫാർമസികൾ ഉടനടി അടച്ചുപൂട്ടാനും അവയുടെ ലൈസൻസുകൾ റദ്ദാക്കാനും ആരോഗ്യമന്ത്രി ഡോ. അഹമ്മദ് അൽ-അവാധി ഉത്തരവിട്ടു. മരുന്നുകളുടെ സുരക്ഷയും ഗുണനിലവാരവും ഉറപ്പാക്കുന്നതിന്റെ ഭാഗമായി ആരോഗ്യ മന്ത്രാലയം നടത്തിയ കർശന പരിശോധനകൾക്ക് പിന്നാലെയാണ് ഈ സുപ്രധാന നടപടി.

മന്ത്രാലയത്തിന്റെ ഫാർമസ്യൂട്ടിക്കൽ ആൻഡ് ഫുഡ് കൺട്രോൾ കമ്മിറ്റികൾ നടത്തിയ അന്വേഷണത്തിൽ, ഈ ഫാർമസികൾ 1996-ലെ 28-ാം നമ്പർ നിയമത്തിലെ വ്യവസ്ഥകൾ ലംഘിച്ചതായി കണ്ടെത്തി. മരുന്നുകൾ വിതരണം ചെയ്യുന്നതിലെ അപാകതകൾ, ഔദ്യോഗിക ചട്ടങ്ങൾ പാലിക്കാതെ മെഡിക്കൽ ഉൽപ്പന്നങ്ങൾ കൈകാര്യം ചെയ്യുക, ഭരണപരമായ വീഴ്ചകൾ എന്നിവയാണ് പരിശോധനാ സംഘം കണ്ടെത്തിയ പ്രധാന നിയമലംഘനങ്ങൾ.

ഈ നിയമലംഘനങ്ങൾ രോഗികളുടെ ആരോഗ്യത്തെ നേരിട്ട് ബാധിക്കുമെന്നും ഔഷധ സുരക്ഷയ്ക്കും ഉപഭോക്തൃ അവകാശങ്ങൾക്കും ഭീഷണിയാണെന്നും മന്ത്രാലയം ഔദ്യോഗിക പ്രസ്താവനയിൽ വ്യക്തമാക്കി. ആരോഗ്യമേഖലയിലെ പ്രൊഫഷണൽ നിലവാരം കാത്തുസൂക്ഷിക്കുന്നതിന്റെ ഭാഗമായി വരും ദിവസങ്ങളിലും പരിശോധനകൾ തുടരുമെന്ന് മന്ത്രാലയം അറിയിച്ചു. നിയമം ലംഘിക്കുന്ന സ്ഥാപനങ്ങൾക്കെതിരെ വിട്ടുവീഴ്ചയില്ലാത്ത നടപടികൾ സ്വീകരിക്കുമെന്നും അധികൃതർ മുന്നറിയിപ്പ് നൽകി. രാജ്യത്തെ ഔഷധ വിതരണ സമ്പ്രദായത്തിന്റെ വിശ്വാസ്യത ഉറപ്പാക്കുന്നതിൽ ഈ നടപടികൾ നിർണായകമാണ്.