യുപിഐ ലൈറ്റ് ലളിതമാക്കാന്‍ ഓട്ടോ ടോപ്പ്-അപ്പ് ഫീച്ചറും, വാലറ്റ് പരിധിയും;പുതിയ നിബന്ധനകളുമായി റിസര്‍വ് ബാങ്ക് ഓഫ് ഇന്ത്യ; ഗൂഗിള്‍ പേ ഉള്‍പ്പടെ ഡിജിറ്റല്‍ പെയ്മെന്റിലെ പരിഷ്‌കാരങ്ങള്‍ അറിയാം
യുപിഐ ലൈറ്റ് ലളിതമാക്കാന്‍ ഓട്ടോ ടോപ്പ്-അപ്പ് ഫീച്ചറും, വാലറ്റ് പരിധിയും;പുതിയ നിബന്ധനകളുമായി റിസര്‍വ് ബാങ്ക് ഓഫ് ഇന്ത്യ; ഗൂഗിള്‍ പേ ഉള്‍പ്പടെ ഡിജിറ്റല്‍ പെയ്മെന്റിലെ പരിഷ്‌കാരങ്ങള്‍ അറിയാം
മുംബൈ: കഴിഞ്ഞ വര്‍ഷമാണ് ഡിജില്‍ പേയ്മെന്റിന്റെ കാര്യത്തില്‍ ഇന്ത്യ ഒന്നാം സ്ഥാനത്തെത്തിയത്.ഡാറ്റ അനുസരിച്ച് ആഗോള തത്സമയ പേയ്‌മെന്റുകളില്‍ 46 ശതമാനവും ഇന്ത്യയിലായതിനാലാണ് ഇന്ത്യ ഒന്നാം സ്ഥാനം നേടിയത്.ഡിജിറ്റല്‍ പേയ്മെന്റ് സംവിധാനം ഉപയോഗിക്കുന്നവരുടെ എണ്ണം കൂടിയതിനാല്‍ തന്നെ ഉപയോക്താക്കള്‍ക്കായി പലവിധ സൗകര്യങ്ങളാണ് പ്ലാറ്റ്ഫോമുകള്‍ ഒരുക്കുന്നത്.
ഉപയോക്താക്കളുടെ എണ്ണം കൂട്ടുവാനായി ജനങ്ങള്‍ക്കിടയില്‍ ഡിജിറ്റല്‍ പേയ്മെന്റ് മാര്‍ഗങ്ങളുടെ സ്വീകാര്യത വര്‍ധിപ്പിക്കുന്നതിനായി സര്‍ക്കാരും, ആര്‍ബിഐയും, എന്‍പിസിഐയും മികച്ച ഇടപെടലുകളാണ് നടത്തിവരുന്നത്.അതിന്റെ ഭാഗമായി ഈ മാസം മുതല്‍ പേയ്മെന്റുകള്‍ എളുപ്പമാക്കുന്ന രണ്ട് പ്രധാന അപ്ഡേറ്റുകളാണ് പ്രാബല്യത്തില്‍ വന്നത്.പ്രധാനമായും യുപിഐ ലൈറ്റ് ഉപയോക്താക്കളാണ് ഈ മാറ്റങ്ങള്‍ അറിഞ്ഞിരിക്കേണ്ടത്.
നാഷണല്‍ പേയ്മെന്റ് കോര്‍പ്പറേഷന്‍ ഓഫ് ഇന്ത്യ (എന്‍പിസിഐ) നല്‍കുന്ന സേവനങ്ങളില്‍ ഒന്നാണ് യുപിഐ ലൈറ്റ്. ചെറിയ ഇടപാടുകള്‍ക്കു പിന്‍ നല്‍കാതെ തന്നെ പേയ്മെന്റ് സാധ്യമാക്കുന്ന രീതിയാണിത്.ഇത് ദൈനംദിന ചെലവുകള്‍ക്കുള്ള ഉപയോക്തൃ സൗകര്യം വര്‍ദ്ധിപ്പിക്കുന്നു.ചെറു ഇടപാടുകള്‍ക്ക് ഗൂഗിള്‍ പേ, ഫോണ്‍ പേ, പേടിഎം പോലുള്ള മാധ്യമങ്ങള്‍ ഉപയോഗിക്കുന്നവര്‍ ഈ മാറ്റങ്ങള്‍ ഉറപ്പായും അറിഞ്ഞിരിക്കണം.
യുപിഐ ലൈറ്റ് പ്രക്രിയ ലളിതമാക്കാന്‍ ഒരു ഓട്ടോ ടോപ്പ്-അപ്പ് ഫീച്ചറും, വാലറ്റ് പരിധി വര്‍ധയുമാണ് റിസര്‍വ് ബാങ്ക് ഓഫ് ഇന്ത്യ (ആര്‍ബിഐ) പ്രഖ്യാപിച്ചിരിക്കുന്ന്ത്.പുതിയ മാറ്റങ്ങളോടെ യുപിഐ ലൈറ്റിന്റെ ഒറ്റത്തവണ ഇടപാട് പരിധി 500 രൂപയില്‍ നിന്ന് 1,000 രൂപയായി ഉയരും. യുപിഐ ലൈറ്റ് ഉപയോക്താക്കള്‍ക്ക് മുമ്പ് വാലറ്റ് പരിധി 2,000 രൂപയായിരുന്നു. എന്നാല്‍ ഇന്നു മുതല്‍ ഇത് 5,000 രൂപ ആയിരിക്കും. അതേസമയം യുപിഐ ലൈറ്റിന്റെ പ്രതിദിന ചെലവ് പരിധി 4,000 രൂപയായി തുടരുമെന്നതും ശ്രദ്ധേയമാണ്.പുതിയ ഓട്ടോ അപ്‌ഡേറ്റ് ഫീച്ചര്‍, ഓരോ തവണയും വാലറ്റിലെ തുക കുറയുമ്പോഴും ഉപയോക്താക്കള്‍ നേരിട്ട് റീചാര്‍ജ് ചെയ്യേണ്ട സാഹചര്യം ഒഴിവാക്കുന്നതാണ്.
അതായത് യുപിഐ ലൈറ്റ് ബാലന്‍സ് ഉപയോക്താവ് നിശ്ചയിച്ച മിനിമം തുകയില്‍ താഴെയെത്തുമ്പോള്‍ ടോപ്പ്-അപ്പ് ഫീച്ചര്‍ ഉപയോക്താവിന്റെ ലിങ്ക് ചെയ്ത ബാങ്ക് അക്കൗണ്ടില്‍ നിന്ന് വാലറ്റിലേയ്ക്ക് പണം റീഫില്‍ ചെയ്യും. ഇതിനു ഉപയോക്താക്കള്‍ സമതം കളയേണ്ടതില്ലെന്നു സാരം. റീഫില്‍ ചെയ്യേണ്ട തുക ഉപയോക്താക്കള്‍ക്കു മുന്‍കൂട്ടി നിശ്ചയിക്കാം. പ്രതിദിന ടോപ്പ്-അപ്പ് പരിധി നിലവില്‍ അഞ്ചായി പരിമിതപ്പെടുത്തിയിട്ടുണ്ട്.
പുതിയ പരിഷ്‌കാരങ്ങള്‍ കൂടുതല്‍ ആളുകളെ യുപിഐ ലൈറ്റിലേയ്ക്ക് ആകര്‍ഷിക്കുമെന്നാണ് പ്രതീക്ഷിക്കപ്പെടുന്നത്. ഡിജിറ്റല്‍ പേയ്മെന്റ് ഇക്കോസിസ്റ്റം രാജ്യത്ത് വ്യാപിപ്പിക്കുകയെന്ന ആര്‍ബിഐ ലക്ഷ്യത്തിന്റെ ഭാഗമാണ് പരിഷ്‌കാരങ്ങള്‍.