കൊയിലാണ്ടി എംഎല്‍എ കാനത്തില്‍ ജമീല അന്തരിച്ചു; അന്ത്യം കോഴിക്കോട്ടെ ആശുപത്രിയില്‍ വച്ച്; അസുഖബാധിതയായി ആറുമാസമായി വിശ്രമത്തില്‍; മുസ്ലിം മാപ്പിള സമുദായത്തില്‍ നിന്നുള്ള ആദ്യ വനിതാ എംഎല്‍എ; ജില്ലാ പഞ്ചായത്ത് അംഗമായി തിളങ്ങിയതിന് പിന്നാലെ നിയമസഭയിലേക്ക്; അനുശോചനം രേഖപ്പെടുത്തി പ്രമുഖര്‍
കാനത്തില്‍ ജമീല അന്തരിച്ചു
കോഴിക്കോട്: കൊയിലാണ്ടി നിയോജകമണ്ഡലം എംഎല്‍എയും മുതിര്‍ന്ന സിപിഎം നേതാവുമായ കാനത്തില്‍ ജമീല അന്തരിച്ചു. 59 വയസ്സായിരുന്നു. കോഴിക്കോട്ടെ സ്വകാര്യ ആശുപത്രിയില്‍ ആയിരുന്നു അന്ത്യം. അര്‍ബുദബാധിതയായ ജമീല ആറുമാസത്തോളമായി വീട്ടില്‍ വിശ്രമത്തിലായിരുന്നു.
2021 നിയമസഭാ തിരഞ്ഞെടുപ്പിലാണ് കാനത്തില്‍ ജമീല കൊയിലാണ്ടിയില്‍ നിന്ന് വിജയിച്ച് നിയമസഭയിലെത്തിയത്. കോഴിക്കോട് ജില്ലാ പഞ്ചായത്ത് പ്രസിഡന്റായി മികച്ച പ്രവര്‍ത്തനം കാഴ്ചവെച്ചിട്ടുണ്ട്.
സിപിഎം കോഴിക്കോട് ജില്ലാ കമ്മിറ്റി അംഗം, ജനാധിപത്യ മഹിളാ അസോസിയേഷന്‍ സംസ്ഥാന വൈസ് പ്രസിഡന്റ് എന്നീ നിലകളിലും പ്രവര്‍ത്തിച്ചിട്ടുണ്ട്. കേരളത്തിലെ മുസ്ലിം മാപ്പിള സമുദായത്തില്‍ നിന്നുള്ള ആദ്യ വനിതാ എംഎല്‍എ ആയിരുന്നു കാനത്തില്‍ ജമീല. 2005-ലാണ് ചേളന്നൂര്‍ ബ്ലോക്ക് പഞ്ചായത്ത് പ്രസിഡന്റായത്. 2010-ല്‍ കോഴിക്കോട് ജില്ലാ പഞ്ചായത്ത് പ്രസിഡന്റുമായി. 2020-ല്‍ രണ്ടാം തവണയും ജില്ലാ പഞ്ചായത്ത് പ്രസിഡന്റ് സ്ഥാനത്തെത്തി. 2021-ല്‍ നിയമസഭാ തിരഞ്ഞെടുപ്പില്‍ കൊയിലാണ്ടിയില്‍നിന്ന് മത്സരിച്ച് നിയമസഭയിലേക്കെത്തി. 8472 വോട്ടിനാണ് കോണ്‍ഗ്രസിന്റെ എന്‍. സുബ്രഹ്‌മണ്യനെ ജമീല പരാജയപ്പെടുത്തിയത്.
പഞ്ചായത്ത് മുതല്‍ നിയമസഭ വരെ; 'ജമീല ടച്ച്'
ഒരു സാധാരണ എല്‍ഐസി ഏജന്റായി പൊതുരംഗത്തേക്ക് കടന്നുവന്ന കാനത്തില്‍ ജമീല, ഭരണരംഗത്തും സംഘടനാ രംഗത്തും തന്റേതായ വ്യക്തിമുദ്ര പതിപ്പിച്ച നേതാവാണ്. 2010-ലും 2020-ലും കോഴിക്കോട് ജില്ലാ പഞ്ചായത്ത് പ്രസിഡന്റായി തെരഞ്ഞെടുക്കപ്പെട്ടു. നിയമസഭയിലേക്ക് മത്സരിക്കാന്‍ വേണ്ടിയാണ് അവര്‍ ആ സ്ഥാനം രാജിവെച്ചത്. 2021-ലെ നിയമസഭാ തിരഞ്ഞെടുപ്പില്‍ കൊയിലാണ്ടിയില്‍ നിന്ന് വിജയിച്ചു.
തലക്കൊളത്തൂര്‍ ഗ്രാമപഞ്ചായത്ത് പ്രസിഡന്റ്, ചേളന്നൂര്‍ ബ്ലോക്ക് പഞ്ചായത്ത് പ്രസിഡന്റ് എന്നീ നിലകളിലും മികച്ച പ്രവര്‍ത്തനം കാഴ്ചവെച്ചു.
സിപിഎം കോഴിക്കോട് ജില്ലാ കമ്മിറ്റി അംഗം, ജനാധിപത്യ മഹിളാ അസോസിയേഷന്‍ സംസ്ഥാന വൈസ് പ്രസിഡന്റ് എന്നീ നിലകളില്‍ സജീവമായിരുന്നു.
കുടുംബം
പരേതരായ ടി.കെ. ആലിയുടെയും മറിയത്തിന്റെയും മകളാണ് കാനത്തില്‍ ജമീല.
ഭര്‍ത്താവ്: കെ. അബ്ദുറഹ്‌മാന്‍.
മക്കള്‍: ഐറിജ്‌റഹ്‌മാന്‍ (യുഎസ്എ), അനൂജ സുഹൈബ് (ന്യൂനപക്ഷ കോര്‍പ്പറേഷന്‍ ഓഫീസ്, കോഴിക്കോട്).
മരുമക്കള്‍: സുഹൈബ്, തേജു.