ഡിസ്ചാര്ജിന് തൊട്ടുമുമ്പ് രക്തസമ്മര്ദ്ദം ഉയര്ന്നു; കെ.പി ശങ്കരദാസ് വീണ്ടും ഐസിയുവില്; ശബരിമല കേസില് നിര്ണായക അറസ്റ്റ് നീളുന്നു; മിനുട്സിലെ വെട്ടലിലും തിരുത്തലിലും കുടുങ്ങി ശങ്കരദാസ്; അസുഖം തുണയാകുമോ? കടകംപള്ളിയിലേക്കും പ്രശാന്തിലേക്കും അന്വേഷണം നീളും; ശങ്കരദാസിനെ പരിശോധിക്കാന് മെഡിക്കല് ബോര്ഡ് വരുമോ?
തിരുവനന്തപുരം; മുന് ദേവസ്വം ബോര്ഡ് അംഗം കെപി ശങ്കരദാസ് വീണ്ടും ഐസിയുവില്. പക്ഷാഘാതത്തെ തുടര്ന്ന് ശങ്കരാദിനെ ആശുപത്രിയില് പ്രവേശിപ്പിച്ചിരുന്നു. പൂര്ണ്ണ രോഗമുക്തി നേടിയതിനെ തുടര്ന്ന് ഇന്നലെ ആശുപത്രിയില് നിന്നും ശങ്കരദാസിനെ ഡിസ്ചാര്ജ് ചെയ്യാന് ഡോക്ടര്മാര് തീരുമാനിച്ചു. ഇതിനിടെ അപ്രതീക്ഷിത ആരോഗ്യപ്രശ്നങ്ങള് ശങ്കരദാസിനുണ്ടായി. തിരുവനന്തപുരത്തെ സ്വകാര്യ ആശുപത്രിയിലെ ഡോക്ടര്മാരെ പോലും അമ്പരപ്പിക്കുന്ന തരത്തില് രക്തസമ്മര്ദ്ദം ഉയര്ന്നു. ഇതോടെ വീണ്ടും ഐസിയുവിലേക്ക് മാറ്റി. ശബരിമല കൊള്ളയില് പ്രതിസ്ഥാനത്താണ് ശങ്കരദാസ്. സുപ്രീംകോടതിയില് പോലും അറസ്റ്റു തടയാനുള്ള നിയമ പോരാട്ടം നടത്തി. എന്നാല് ഫലം കണ്ടില്ല. ഇതിനിടെയാണ് പക്ഷഘാതം വന്ന് ആശുപത്രിയില് എത്തിയത്. ഇതോടെ പോലീസിന് അറസ്റ്റു ചെയ്യാന് കഴിയാത്ത സാഹചര്യവും ഉണ്ടായി. വീണ്ടും ഐസിയുവില് ആയതോടെ ഇനിയും അറസ്റ്റ് നീളും.
പക്ഷാഘാതത്തെത്തുടര്ന്ന് ചികിത്സയിലായിരുന്ന അദ്ദേഹത്തിന് പൂര്ണ്ണ ആരോഗ്യവാനായി വീട്ടിലേക്ക് മടങ്ങാനിരിക്കെയാണ് അപ്രതീക്ഷിതമായി ആരോഗ്യപ്രശ്നങ്ങള് അനുഭവപ്പെട്ടത്. ഇതോടെ ശബരിമല കൊള്ളക്കേസിലെ നിര്ണായകമായ അറസ്റ്റ് നടപടികള് വീണ്ടും അനിശ്ചിതത്വത്തിലായി. ശബരിമലയിലെ സാമ്പത്തിക ഇടപാടുകളുമായി ബന്ധപ്പെട്ട ഗുരുതര ആരോപണങ്ങളില് പ്രതിയായ ശങ്കരദാസ്, അറസ്റ്റ് ഒഴിവാക്കാനായി സുപ്രീംകോടതി വരെ നിയമപോരാട്ടം നടത്തിയിരുന്നു. എന്നാല് കോടതിയില് നിന്നും അനുകൂലമായ വിധി ലഭിക്കാതിരുന്നതോടെ അന്വേഷണസംഘം അറസ്റ്റ് നടപടികളിലേക്ക് നീങ്ങുകയായിരുന്നു. ഈ ഘട്ടത്തിലാണ് പക്ഷാഘാതം സംഭവിച്ചതിനെത്തുടര്ന്ന് അദ്ദേഹത്തെ തിരുവനന്തപുരത്തെ സ്വകാര്യ ആശുപത്രിയില് പ്രവേശിപ്പിച്ചത്.
ആരോഗ്യനില പൂര്ണ്ണമായും സാധാരണ നിലയിലായാല് മാത്രമേ നിയമനടപടികളിലേക്ക് കടക്കാന് സാധിക്കൂ എന്ന് അന്വേഷണ ഉദ്യോഗസ്ഥര് വ്യക്തമാക്കി. അറസ്റ്റ് വൈകിപ്പിക്കാനുള്ള നീക്കമാണിതെന്ന ആരോപണം ഉയരുന്നുണ്ടെങ്കിലും ഡോക്ടര്മാരുടെ റിപ്പോര്ട്ടിന്റെ അടിസ്ഥാനത്തില് മാത്രമേ പോലീസിന് തുടര്നടപടികള് സ്വീകരിക്കാന് കഴിയൂ. കേരളത്തിന് പുറത്തു നിന്നുള്ള ഡോക്ടര്മാരെ കൊണ്ട് ആരോഗ്യ നില പരിശോധിപ്പിക്കണമെന്ന ആവശ്യവുമുണ്ട്. ശബരിമലയില് ഭക്തര് സമര്പ്പിച്ച സ്വര്ണ്ണ ഉരുപ്പടികളിലും സ്വര്ണ്ണാഭരണങ്ങളിലും കുറവുണ്ടായതുമായി ബന്ധപ്പെട്ട കേസില് ഇദ്ദേഹത്തിന്റെ പങ്ക് സംശയിക്കപ്പെട്ടിരുന്നു. ഇതിനെയാണ് 'ശബരിമല കൊള്ള' എന്ന് പല റിപ്പോര്ട്ടുകളും പരാമര്ശിക്കുന്നത്.
ദേവസ്വം ബോര്ഡ് അംഗമായിരുന്ന കാലയളവില് ചട്ടങ്ങള് ലംഘിച്ച് കരാറുകള് നല്കിയെന്നും ബോര്ഡിന്റെ ഫണ്ട് വകമാറ്റി ചിലവഴിച്ചെന്നും ആരോപണമുണ്ട്. ഇത് സംബന്ധിച്ച് വിജിലന്സ് അന്വേഷണവും നടന്നിരുന്നു. ഈ കേസുകളില് പോലീസ് അന്വേഷണം ഊര്ജ്ജിതമാക്കുകയും അറസ്റ്റ് നടപടികളിലേക്ക് നീങ്ങുകയും ചെയ്തതോടെയാണ് അദ്ദേഹം മുന്കൂര് ജാമ്യത്തിനായി സുപ്രീംകോടതിയെ വരെ സമീപിച്ചത്. എന്നാല് കോടതി ജാമ്യാപേക്ഷ തള്ളിയതോടെയാണ് അറസ്റ്റ് അനിവാര്യമായത്. ചുരുക്കത്തില്, ശബരിമലയിലെ ഭക്തരുടെ കാണിക്കയായും മറ്റും ലഭിക്കുന്ന പണത്തിലും സ്വര്ണ്ണത്തിലും വലിയ തോതിലുള്ള ക്രമക്കേട് നടത്തിയെന്നാണ് ശങ്കരദാസിനെതിരെ പോലീസ് ചുമത്തിയിരിക്കുന്ന കുറ്റം. നിലവില് അസുഖം കാരണം ആശുപത്രിയില് കഴിയുന്നത് കൊണ്ട് മാത്രമാണ് പോലീസിന് അറസ്റ്റ് നടപടികള് പൂര്ത്തിയാക്കാന് കഴിയാത്തത്.
ശബരിമലയിലെ ശ്രീകോവിലില് സ്വര്ണ്ണപ്പാളികള്ക്ക് പകരം ചെമ്പ് പാളികള് സ്ഥാപിച്ചു കടത്തിയെന്ന 'സ്വര്ണ്ണക്കൊള്ള' കേസില് അന്വേഷണം നിര്ണായക ഘട്ടത്തിലേക്ക് കടക്കുകയാണ്. മുന് ദേവസ്വം മന്ത്രി കടകംപള്ളി സുരേന്ദ്രന്, മുന് ബോര്ഡ് പ്രസിഡന്റ് പി.എസ്. പ്രശാന്ത് എന്നിവരിലേക്ക് അന്വേഷണം നീളുമ്പോള്, മുന് ബോര്ഡംഗം കെ.പി. ശങ്കരദാസിന്റെ അറസ്റ്റ് ഉടന് ഉണ്ടായേക്കും. കേസില് ഇതിനോടകം തന്ത്രി കണ്ഠരര് രാജീവര് ഉള്പ്പെടെ 11 പേര് അറസ്റ്റിലായിട്ടുണ്ട്. പക്ഷാഘാതം ബാധിച്ച് സ്വകാര്യ ആശുപത്രിയില് കഴിയുന്ന ശങ്കരദാസിനെ ചോദ്യം ചെയ്യുന്നത് തടയാന് മഡിക്കല് സര്ട്ടിഫിക്കറ്റ് നല്കിയിരുന്നു. എന്നാല്, ഇത് അറസ്റ്റ് വൈകിപ്പിക്കാനുള്ള നീക്കമാണോ എന്ന് സംശയിക്കുന്ന പ്രത്യേക അന്വേഷണസംഘം, മെഡിക്കല് കോളേജ് ഡോക്ടര്മാരെ ഉള്പ്പെടുത്തി ഒരു മെഡിക്കല് ബോര്ഡ് രൂപീകരിക്കാന് അപേക്ഷ നല്കിയിട്ടുണ്ട്. ബോര്ഡ് റിപ്പോര്ട്ട് അനുകൂലമായാല് ഉടന് അറസ്റ്റ് രേഖപ്പെടുത്തും.
2019 മാര്ച്ചില് നടന്ന ബോര്ഡ് യോഗത്തിന്റെ മിനുട്ട്സില് വരുത്തിയ തിരുത്തലാണ് ശങ്കരദാസിനും പത്മകുമാറിനും തിരിച്ചടിയായത്. 'സ്വര്ണ്ണം പൊതിഞ്ഞ പിത്തള' എന്ന ഭാഗം വെട്ടി 'ചെമ്പ്' എന്ന് പത്മകുമാര് മാറ്റിയെഴുതിയതിനും അതില് ശങ്കരദാസ് ഒപ്പിട്ടതിനും തെളിവ് ലഭിച്ചിട്ടുണ്ട്. കഴിഞ്ഞ ദിവസം നടന്ന മൂന്ന് മണിക്കൂര് നീണ്ട ചോദ്യം ചെയ്യലില് മുന് മന്ത്രി കടകംപള്ളി സുരേന്ദ്രന് ആരോപണങ്ങള് നിഷേധിച്ചെങ്കിലും, മൊഴികളിലെ വൈരുദ്ധ്യം പരിശോധിച്ച ശേഷം അദ്ദേഹത്തെ വീണ്ടും വിളിപ്പിക്കാനാണ് എസ്.ഐ.ടിയുടെ തീരുമാനം.