'ഹിമാലയത്തിന്റെ മടിത്തട്ടിൽ എന്റെ ചെറിയ കഫേ, ദി മൗണ്ടെയ്ൻ സ്റ്റോറി'; മണാലിയിൽ കഫേ ആരംഭിച്ച് ബിജെപി എംപി കങ്കണ റണൗട്ട്; വൈറലായി വീഡിയോ
മണാലി: മണാലിയിൽ കഫേ ആരംഭിച്ച് ബോളിവുഡ് താരവും ബിജെപി എംപി യുമായ കങ്കണ റണൗട്ട്. 'ദി മൗണ്ടെയ്ൻ സ്റ്റോറി' എന്നാണ് കഫേയ്ക്ക് പേര് നൽകിയിരിക്കുന്നത്. കഫേയുടെ ഗ്ലിംസ് വിഡിയോ താരം തന്നെയാണ് ഇൻസ്റ്റഗ്രാമിൽ പങ്കുവെച്ചത്. 'ഹിമാലയത്തിന്റെ മടിത്തട്ടിൽ എന്റെ ചെറിയ കഫേ, കുട്ടിക്കാലത്തെ ഒരു സ്വപ്നം യാഥാർഥ്യമായിരിക്കുന്നു. ദി മൗണ്ടെയ്ൻ സ്റ്റോറി, ഇതൊരു സ്നേഹത്തിന്റെ കഥയാണ്' എന്ന് കുറിപ്പോടെയാണ് വീഡിയോ പങ്കുവെച്ചരിക്കുന്നത്.
മഞ്ഞുമൂടിയ മലനിരകളാൽ ചുറ്റപ്പെട്ട മനോഹരമായ കഫേയുടെ ഉള്ളിലേക്ക് പ്രവേശിക്കുന്നിടത്താണ് വീഡിയോ ആരംഭിക്കുന്നത്. തടികൊണ്ട് മനോഹരമായി നിർമ്മിച്ചിരിക്കുന്ന ഹോംലി ഹിൽ സ്റ്റൈൽ കഫേയാണ് വീഡിയോയിലുള്ളത്. ഹിമാചലിന്റെ പരമ്പരാഗത വിഭവങ്ങൾക്കു പുറമെ, പിസ, സാലഡുകൾ, കേക്ക് തുടങ്ങിയവയും ദൃശ്യങ്ങളിലുണ്ട്. കഫേയ്ക്കുള്ളിലും പുറത്തുമായാണ് ഇരിപ്പിടങ്ങൾ സജ്ജമാക്കിയിരിക്കുന്നത്. ഭക്ഷണം രുചിച്ചുകൊണ്ട് മലനിരകളുടെ അതിമനോഹരമായ കാഴ്ചകളും ഇവിടെയിരുന്ന് ആസ്വദിക്കാം.
2023 മാർച്ചിൽ താനൊരു റെസ്റ്റോറന്റ് ആരംഭിക്കാൻ പദ്ധതിയിട്ടിരുന്നെവെങ്കിലും സാമ്പത്തിക പ്രയാസം നേരിട്ടിരുന്നതായി നേരത്തേ അവർ വെളിപ്പെടുത്തിയിരുന്നു. അടുത്തിടെ, ബോളിവുഡ് താരം മലൈക അറോറയും ഗോവയിൽ റസ്റ്റോറന്റ് ആരംഭിച്ചിരുന്നു. കഫേ ഫെബ്രുവരി 14-ന് തുറക്കുമെന്നാണ് അറിയിച്ചിരിക്കുന്നത്. തന്റെ ബാല്യകാല ഓർമ്മകളിൽ നിന്നും അമ്മ വീട്ടിൽ ഉണ്ടാക്കുന്ന ഭക്ഷണത്തിന്റെ സുഗന്ധത്തിൽ നിന്നുമൊക്കെയുള്ള പ്രചോദനം ഉൾക്കൊണ്ടാണ് 'ദി മൗണ്ടൻ സ്റ്റോറി' എന്ന കഫേ ആരംഭിക്കുന്നതെന്നാണ് കങ്കണ പറയുന്നത്.