വൈഗ അണക്കെട്ടില്‍ ജലനിരപ്പ് ഉയര്‍ന്നു; തമിഴ്‌നാട്ടിലെ അഞ്ച് ജില്ലകളില്‍ പ്രളയ മുന്നറിയിപ്പ്
തമിഴ്‌നാട്ടിലെ അഞ്ച് ജില്ലകളില്‍ പ്രളയ മുന്നറിയിപ്പ്
By : സ്വന്തം ലേഖകൻ
Update: 2025-10-20 04:07 GMT
തേനി: കനത്ത മഴയില്‍ വൈഗ അണക്കെട്ടില്‍ ജലനിരപ്പ് ഉയര്‍ന്നതോടെ തമിഴ്‌നാട്ടില്‍ അഞ്ച് ജില്ലകളില്‍ പ്രളയ മുന്നറിയിപ്പ് നല്‍കി. അണക്കെട്ടിന്റെ വൃഷ്ടിപ്രദേശങ്ങളില്‍ ശക്തമായ മഴ തുടരുന്ന സാഹചര്യത്തില്‍ തേനി, മഥുര, രാമനാഥപുരം, ഡിണ്ടിഗല്‍, ശിവഗംഗ ജില്ലകളിലാണ് വെള്ളപ്പൊക്ക മുന്നറിയിപ്പ്.
വൈഗ അണക്കെട്ടില്‍ ജലനിരപ്പ് 67 അടി പിന്നിട്ടിരിക്കുകയാണ്. പരമാവധി 71 അടിയാണ് ഡാമിന്റെ സംഭരണശേഷി. മുല്ലപ്പെരിയാറില്‍ നിന്ന് 1400 ഘനയടി വെള്ളവും ഒഴുകിയെത്തുന്നുണ്ട്. തേനി ജില്ലയില്‍ വെള്ളിയാഴ്ച മുതല്‍ ശക്തമായ മഴയുണ്ട്. ഒക്ടോബര്‍ 23നും 25നും ഇടയില്‍ വിവിധ ജില്ലകളില്‍ അതിശക്ത മഴ ലഭിക്കുമെന്നു കാലാവസ്ഥാ മുന്നറിയിപ്പുണ്ട്.