മൂന്നുദിവസം പഴക്കമുള്ള സാമ്പാര് വിളമ്പി; ഭര്ത്താവുമായി തര്ക്കം; കളനാശിനി കഴിച്ച് യുവതി ജീവനൊടുക്കി
ബെംഗളൂരു: മൂന്നുദിവസം പഴക്കമുള്ള സാമ്പാര് വിളമ്പിയതിനെച്ചൊല്ലി ഭര്ത്താവുമായുണ്ടായ തര്ക്കത്തിന് പിന്നാലെ യുവതി ജീവനൊടുക്കി. ബെംഗളൂരുവില് താമസിക്കുന്ന രംഗസ്വാമിയുടെ ഭാര്യ കാവ്യ(27)യാണ് കളനാശിനി കഴിച്ച് ജീവനൊടുക്കിയത്. ഭര്ത്താവുമായുണ്ടായ തര്ക്കത്തിന് പിന്നാലെയാണ് യുവതി കളനാശിനി കഴിച്ചതെന്ന് പോലീസ് പറഞ്ഞു.
വ്യാഴാഴ്ചയാണ് വീട്ടില് വിളമ്പിയ സാമ്പാറിനെച്ചൊല്ലി കാവ്യയും ഭര്ത്താവ് രംഗസ്വാമിയും തമ്മില് വഴക്കുണ്ടായത്. മൂന്നുദിവസം മുന്പ് പാകംചെയ്ത സാമ്പാര് ഭക്ഷണത്തിനൊപ്പം വിളമ്പിയതാണ് രംഗസ്വാമിയെ പ്രകോപിപ്പിച്ചത്. ഇതേത്തുടര്ന്ന് രംഗസ്വാമി കാവ്യയെ രൂക്ഷമായി വഴക്കുപറഞ്ഞെന്നും മര്ദിക്കാന് ശ്രമിച്ചെന്നും ആരോപണമുണ്ട്.
ഇതിനുപിന്നാലെയാണ് കാവ്യ വീട്ടില് കാര്ഷികാവശ്യത്തിനായി കരുതിയിരുന്ന കളനാശിനി കഴിച്ചത്. കളനാശിനി കഴിച്ച കാവ്യയ്ക്ക് ഛര്ദിയും ശാരീരികാസ്വാസ്ഥ്യവും അനുഭവപ്പെട്ടതോടെയാണ് വീട്ടുകാര് സംഭവമറിഞ്ഞത്. അവശയായ യുവതിയെ ഉടന്തന്നെ ആശുപത്രിയിലേക്ക് കൊണ്ടുപോയെങ്കിലും വഴിമധ്യേ മരണം സംഭവിക്കുകയായിരുന്നു. സംഭവത്തില് കേസെടുത്ത് അന്വേഷണം ആരംഭിച്ചതായും മൃതദേഹം പോസ്റ്റ്മോര്ട്ടത്തിനായി ആശുപത്രിയിലേക്ക് മാറ്റിയതായും പോലീസ് അറിയിച്ചു.