അങ്ങ് അത്താണിയിൽ നമുക്ക് സ്ഥലവും കെട്ടിടവും ഉണ്ട്...താൽപ്പര്യം ഉണ്ടെങ്കിൽ നോക്കാം..! ഇല്ലാത്ത കഥകൾ എല്ലാം മെനഞ്ഞ് കൊടുംചതി; കേട്ടപാതി ഒന്നും നോക്കാതെ വയോധികൻ ചെയ്തത്; പ്രതികളെ കണ്ട് പോലീസിന് ഡബിൾ ലോട്ടറി

തൃശ്ശൂർ: അത്താണിയിൽ സ്ഥലവും കെട്ടിടവും രജിസ്റ്റർ ചെയ്ത് നൽകാമെന്ന് വിശ്വസിപ്പിച്ച് വയോധികനിൽ നിന്ന് 90 ലക്ഷം രൂപ തട്ടിയെടുത്ത കേസിൽ രണ്ടുപേരെ തൃശ്ശൂർ റൂറൽ പോലീസ് അറസ്റ്റ് ചെയ്തു. അത്താണിയിൽ സ്ഥലവും കെട്ടിടവും രജിസ്റ്റർ ചെയ്ത് നൽകാമെന്നും, അതുകൂടാതെ മകളുടെ പുത്തൻച്ചിറയിലുള്ള വീടും പറമ്പും മറ്റൊരു പറമ്പുമായി കൈമാറ്റം (എക്സ്ചേഞ്ച്) ചെയ്യാമെന്നും പറഞ്ഞ് വിശ്വസിപ്പിച്ചാണ് ഇവർ തട്ടിപ്പ് നടത്തിയത്.

പ്രതികൾ പല തവണകളായി വയോധികനിൽ നിന്ന് 90 ലക്ഷം രൂപ കൈപ്പറ്റിയെങ്കിലും, സ്ഥലം കൈമാറ്റം ചെയ്യുന്നതിനുള്ള തീറ് (ഡീഡ്) നൽകുകയോ, വാങ്ങിയ പണം തിരികെ നൽകുകയോ ചെയ്തില്ല. ഇതേത്തുടർന്നാണ് വയോധികൻ പോലീസിൽ പരാതി നൽകിയത്.

തൃശൂരിലെ മാള പുത്തൻച്ചിറ കുന്നത്തേരി സ്വദേശിയായ സ്റ്റേഷൻ റൗഡി ജലീൽ (54), കൊടുക്കല്ലൂർ ലോകമലേശ്വരം സ്വദേശി മുഹമ്മദ് ഹനീഫ (71) എന്നിവരെ തൃശൂർ റൂറൽ പൊലീസാണ് അറസ്റ്റ് ചെയ്തത്.

മാള പുത്തൻച്ചിറ കുന്നത്തേരി സ്വദേശിയായ വയോധികനെയാണ് ഇരുവരും പറ്റിച്ചത്. ജലീൽ കൊടുങ്ങല്ലൂർ പൊലീസ് സ്റ്റേഷനിൽ എട്ട് തട്ടിപ്പ് കേസുകളിലും സ്ത്രീയോട് മോശമായി പെരുമാറിയ കേസിലും മാള പൊലീസ് സ്റ്റേഷനിലെ രണ്ട് തട്ടിപ്പ് കേസുകളിലും പാലക്കാട് ചാലിശ്ശേരി പൊലീസ് സ്റ്റേഷനിലെ ഒരു തട്ടിപ്പ് കേസിലും അടക്കം 12 ക്രിമിനൽ കേസുകളിലെ പ്രതിയാണ്. മുഹമ്മദ് ഹനീഫ മാള പൊലീസ് സ്റ്റേഷനിലെ ഒരു തട്ടിപ്പ് കേസിലും പാലക്കാട് ചാലിശ്ശേരി പൊലീസ് സ്റ്റേഷനിലെ ഒരു തട്ടിപ്പ് കേസിലും പ്രതിയാണ്.

മാള പോലീസ് സ്റ്റേഷൻ എസ് എച്ച് ഒ സജിൻ ശശി വി, എസ് ഐ റഷീദ് പി എം, ജി എസ് ഐ മാരായ സുധാകരൻ കെ ആർ, മുഹമ്മദ് ബാഷി എം എ, മുരുകേഷ് കടവത്ത്, ജി എ എസ് ഐ മാരായ നജീബ്, ഷാലി, ജി എസ് സി പി ഒ വഹദ്, ജിബിൻ, ഡിബീഷ്, വിപിൻലാൽ എന്നിവരാണ് അന്വേഷണ സംഘത്തിലുണ്ടായിരുന്നത്.