ഏജന്റ് മുഖേന അതിര്‍ത്തി കടന്ന് ഇന്ത്യയിലെത്തി; വിവിധ സ്ഥലങ്ങളിൽ കറങ്ങി നടന്നു; ബെംഗളൂരുവിൽ വെച്ച് പുതിയ ബോയ്ഫ്രണ്ടിനെ കിട്ടി; വീണ്ടും ചുറ്റി ഇരുവരും അവസാനം എത്തിയത് പെരുമ്പാവൂരില്‍; ബംഗ്ലാദേശ് സ്വദേശിനിയും ആണ്‍ സുഹൃത്തും പിടിയിൽ; പോലീസ് വലയിൽ കുടുങ്ങിയത് ഇങ്ങനെ!
പെരുമ്പാവൂര്‍: ബംഗ്ലാദേശ് സ്വദേശിനിയും ആണ്‍ സുഹൃത്തും പിടിയിൽ. പെരുമ്പാവൂരില്‍ നിന്നുമാണ് ഇരുവരെയും പോലീസ് കൈയ്യോടെ പൊക്കിയത്. പിടിയിലായ ബംഗ്ലാദേശ് സ്വദേശിനിയായ യുവതിയുടെയും ആണ്‍ സുഹൃത്തിന്‍റെയും അറസ്റ്റ് രേഖപ്പെടുത്തിയിട്ടുണ്ട്. ബംഗ്ലാദേശ് കുല്‍നാസദര്‍ രുപ്ഷാവെരിബാദ് സ്വദേശിനി തസ്ലീമ ബീഗം (28) ബിഹാര്‍ നവാദ ചിറ്റാര്‍കോല്‍ ഷാക്തി കുമാര്‍ (32) എന്നിവരാണ് ബുധനാഴ്ച പെരുമ്പാവൂര്‍ പോലീസ് വലയിൽ കുടുങ്ങിയത്.
കണ്ടന്തറ ബംഗാള്‍ കോളനിയില്‍നിന്നാണ് ഇവരെ അറസ്റ്റ് ചെയ്തത്. കൊച്ചി സിറ്റിയിലെ വിവിധ ലോഡ്ജുകളിലെ താമസത്തിനുശേഷം ബുധനാഴ്ചയാണ് കണ്ടന്തറയിലെത്തിയത്. ഉടൻ പൊലീസ് ഇവരെ കസ്റ്റഡിയിലെടുക്കുകയായിരുന്നു.
ഏജന്റ് മുഖേനയാണ് അതിര്‍ത്തി കടന്ന് ഇന്ത്യയിലേക്കെത്തിയതെന്നും തുടര്‍ന്ന് വിവിധ സ്ഥലങ്ങളില്‍ കറങ്ങി ബംഗളൂരുവിലെത്തുകയും അവിടെവച്ചാണ് ആണ്‍സുഹൃത്തിനെ കണ്ടതെന്നുമാണ് യുവതി പറയുന്നതെന്ന് പോലീസ് അറിയിച്ചു. തുടര്‍ന്ന് ഇവര്‍ പല സ്ഥലങ്ങളിലും സഞ്ചരിച്ചാണ് കേരളത്തിൽ എത്തിയത്.
ഇപ്പോൾ ജില്ലയില്‍ ഇവര്‍ താമസിച്ച സ്ഥലങ്ങളെക്കുറിച്ച് പോലീസ് അന്വേഷിച്ചു വരുന്നു. യുവതിയില്‍നിന്ന് വ്യാജ ആധാറും പാന്‍ കാര്‍ഡും പോലീസ് കണ്ടെടുത്തു. ഇതും ഏജന്റ് ശരിയാക്കി നല്‍കിയതാണെന്നും കഴിഞ്ഞ അഞ്ച് മാസമായി കേരളത്തിലുണ്ടെന്നും യുവതി സമ്മതിച്ചതായി പോലീസ് വ്യക്തമാക്കി.
ജില്ല പൊലീസ് മേധാവി വൈഭവ് സക്‌സേന പൊലീസ് ആസ്ഥാനത്ത് രണ്ടുപേരെയും ചോദ്യംചെയ്തു. എന്‍.ഐ.എ, ഇന്റലിജന്‍സ് ബ്യൂറോ, എ.ടി.എസ് തുടങ്ങിയവരും ചോദ്യംചെയ്തു. ഇന്‍സ്‌പെക്ടര്‍ ടി.എം. സൂഫിയുടെ നേതൃത്വത്തില്‍ സബ് ഇന്‍സ്‌പെക്ടര്‍മാരായ പി.എം. റാസിഖ്, റിന്‍സ് എം. തോമസ്, ലാല്‍ മോഹന്‍ തുടങ്ങിയവരാണ് അന്വേഷണ സംഘത്തിൽ ഉണ്ടായിരുന്നത്.