ആലുവയില്‍ 40 പവന്‍ സ്വര്‍ണ്ണം മോഷണം പോയ കേസില്‍ വന്‍ ട്വിസ്റ്റ്! സ്വര്‍ണം തട്ടിയെടുത്തത് മന്ത്രവാദി; വീട്ടിലെ പ്രശ്‌നങ്ങള്‍ മാറാന്‍ ആഭിചാരക്രിയ നടത്താമെന്ന് പറഞ്ഞ് തട്ടിപ്പ്; വ്യാപാരിയുടെ പരാതിയില്‍ മന്ത്രവാദി അറസ്റ്റില്‍
ആലുവയില്‍ 40 പവന്‍ സ്വര്‍ണ്ണം മോഷണം പോയ കേസില്‍ വന്‍ ട്വിസ്റ്റ്!
കൊച്ചി: എറണാകുളം ആലുവയില്‍ 40 പവന്‍ സ്വര്‍ണം നഷ്ടമായെന്ന കേസില്‍ നിര്‍ണായക കണ്ടെത്തലുമായി ആലുവ പൊലീസ് . ആഭിചാരക്രിയ നടത്താമെന്ന് പറഞ്ഞ് സ്വര്‍ണം തട്ടിയെടുത്തത് തൃശൂര്‍ സ്വദേശിയായ മന്ത്രവാദിയാണെന്നാണ് കണ്ടെത്തല്‍. മന്ത്രവാദിയെ ആലുവ പൊലീസ് അറസ്റ്റ് ചെയ്തു.
വീട്ടിലെ പ്രശ്‌നങ്ങള്‍ മാറാന്‍ ആഭിചാരക്രിയ നടത്താമെന്ന് പറഞ്ഞായിരുന്നു തട്ടിപ്പ്. തട്ടിപ്പിനിരയായ ആലുവ സ്വദേശി ഇബ്രാഹിമിന്റെ പരാതിയിലാണ് അറസ്റ്റ്. കഴിഞ്ഞ ആഴ്ചയാണ് ചെമ്പകശ്ശേരി ആശാന്‍ കോളനി ആയത്ത് വീട്ടില്‍ ഇബ്രാഹിം കുട്ടിയുടെ വീട് കുത്തിത്തുറന്നാണ് പട്ടാപ്പകല്‍ എട്ടരലക്ഷം രൂപയും 40 പവനും കവര്‍ന്നത്.
ഇബ്രാഹിം കുട്ടി പഴയവീടുകള്‍ പൊളിയ്ക്കുന്ന ബിസിനസുകാരനാണ്. അദ്ദേഹം രാവിലെ ജോലിക്ക് പോയിരുന്നു. ഉച്ചയ്ക്ക് ഭാര്യ ആശുപത്രിയിലും പോയി. വൈകിട്ട് അഞ്ചരയോടെ തിരിച്ചെത്തിയപ്പോഴാണ് മോഷണ വിവരം അറിയുന്നത്.