കടയിൽ നിന്നും അഞ്ച് സിഗരറ്റും വെള്ളക്കുപ്പിയും വാങ്ങി യുവാക്കൾ; പണം ചോദിച്ച കടയുടമയെ തല്ലിക്കൊന്നു; പാൻ ഷോപ്പ് ഉടമയെ പിടിച്ചുവെച്ച് തല്ലിച്ചതച്ചു; ആശുപത്രിയിലേക്കുള്ള വഴിയിൽ മരണം; മദ്യലഹരിയിൽ ക്രൂരത കാട്ടിയ നാലംഗ സംഘം പിടിയിൽ

ബെലഗാവി: കർണാടകയിലെ ബെലഗാവിൽ 48 വയസ്സുകാരനായ പാൻ ഷോപ്പ് ഉടമയെ ഒരു സംഘം ആളുകൾ ക്രൂരമായി മർദ്ദിച്ചു കൊലപ്പെടുത്തിയ സംഭവത്തിൽ പുറത്ത് വരുന്നത് ഞെട്ടിക്കുന്ന വിവരങ്ങൾ. യെല്ലാപ്പ നായിക് എന്നയാളാണ് കൊല്ലപ്പെട്ടത്. ഗ്രാമത്തിലെ ഉത്സവം കഴിഞ്ഞ് മടങ്ങുകയായിരുന്ന നാലംഗ സംഘമാണ് കടയുടമയെ ആക്രമിച്ചത്. സിഗരറ്റിന്റെയും വെള്ളക്കുപ്പിയുടെയും പണത്തെച്ചൊല്ലിയുണ്ടായ നിസാര തർക്കം കൊലപാതകത്തിൽ കലാശിച്ചത്. സംഭവത്തിൽ പ്രജ്വൽ പാട്ടീൽ (22), നിഖിൽ ചൗഗാലെ (22), വിവേക് ചൗഗാലെ, ശ്രീധർ പാട്ടീൽ എന്നീ നാല് പ്രതികളെ പോലീസ് അറസ്റ്റ് ചെയ്തു.

നാലോ അഞ്ചോ സിഗരറ്റും രണ്ട് കുപ്പി വെള്ളവും വാങ്ങിയ ശേഷം പണം ചോദിച്ചതാണ് അക്രമികളെ പ്രകോപിപ്പിച്ചത്. സംഭവത്തെക്കുറിച്ച് യെല്ലാപ്പയുടെ സഹോദരൻ നിംഗപ്പ നായിക് പറയുന്നത് ഇങ്ങനെ: "അർദ്ധരാത്രിയോടെയാണ് അവർ കടയിലെത്തിയത്. നാലഞ്ച് സിഗരറ്റും രണ്ട് വെള്ളക്കുപ്പിയും അവർ എടുത്തു. എന്റെ സഹോദരൻ ഇതിന്റെ പണം ചോദിച്ചപ്പോൾ അവർ നൽകാൻ തയ്യാറായില്ലെന്ന് മാത്രമല്ല, അവനെ മർദ്ദിക്കാൻ തുടങ്ങുകയും ചെയ്തു. രണ്ടുപേർ ചേർന്ന് അവനെ പിടിച്ചു വെച്ചു, മറ്റുള്ളവർ ക്രൂരമായി തല്ലിച്ചതച്ചു. ഞങ്ങൾ ഓടിയെത്തിയപ്പോഴേക്കും അവർ ഓടി രക്ഷപ്പെടാൻ ശ്രമിച്ചു. അതിൽ രണ്ടുപേരെ ഞങ്ങൾ പിടികൂടി."

ഗുരുതരമായി പരിക്കേറ്റ യെല്ലാപ്പയെ ഉടൻ തന്നെ അടുത്തുള്ള ആശുപത്രിയിൽ എത്തിച്ചെങ്കിലും വിദഗ്ദ്ധ ചികിത്സയ്ക്കായി മറ്റൊരു ആശുപത്രിയിലേക്ക് മാറ്റാൻ ഡോക്ടർമാർ നിർദ്ദേശിച്ചു. എന്നാൽ കെ.എൽ.ഇ (KLE) ആശുപത്രിയിലേക്കുള്ള യാത്രാമധ്യേ യെല്ലാപ്പ മരണത്തിന് കീഴടങ്ങുകയായിരുന്നു. അക്രമികൾ മദ്യലഹരിയിലായിരുന്നുവെന്നും ഉത്സവത്തിന് ശേഷം ആ പ്രദേശത്ത് ഇവർ വലിയ രീതിയിൽ പ്രശ്നങ്ങൾ ഉണ്ടാക്കിയിരുന്നുവെന്നും നാട്ടുകാർ ആരോപിക്കുന്നു.

കുടുംബത്തിന്റെ ഏക വരുമാന സ്രോതസ്സായിരുന്നു കൊല്ലപ്പെട്ട യെല്ലാപ്പ. കാകതി പോലീസ് സ്റ്റേഷനിൽ കേസ് രജിസ്റ്റർ ചെയ്ത് അന്വേഷണം ആരംഭിച്ചിട്ടുണ്ട്. പ്രതികൾക്കെതിരെ കർശന നടപടി വേണമെന്ന് കുടുംബവും നാട്ടുകാരും ആവശ്യപ്പെട്ടു.