ദേശീയ തൊഴിലുറപ്പ് പദ്ധതിയുമായി ബന്ധപ്പെട്ട അഴിമതി; ഇന്ത്യന്‍ ക്രിക്കറ്റ് താരം മുഹമ്മദ് ഷമിയുടെ സഹോദരിയും ഉള്‍പ്പെടെ 18 പേര്‍ പ്രതികള്‍; 8.6 ലക്ഷം രൂപയുടെ അഴിമതി തുക തിരിച്ചുപിടിച്ചതായി റിപ്പോര്‍ട്ട്; വില്ലേജ് ഡെവലപ്മെന്റ് ഓഫിസര്‍, അസിസ്റ്റന്റ് പ്രോഗ്രാം ഓഫീസര്‍, കംപ്യൂട്ടര്‍ ഓപ്പറേറ്റര്‍ എന്നിവരും തട്ടിപ്പില്‍ പങ്കാളികള്‍
ലക്നൗ: ദേശീയ തൊഴിലുറപ്പ് പദ്ധതിയുമായി ബന്ധപ്പെട്ട അഴിമതിയില്‍ ഇന്ത്യന്‍ ക്രിക്കറ്റ് താരം മുഹമ്മദ് ഷമിയുടെ സഹോദരിയും ഉള്‍പ്പെട്ടതായി കണ്ടെത്തല്‍. വ്യാജ ജോബ് കാര്‍ഡുകള്‍ തയ്യാറാക്കി ജോലി ചെയ്യാതെയേയും ശമ്പളം കൈപ്പറ്റിയേയും കേസില്‍ ഷമിയുടെ സഹോദരി ഷബിന ഉള്‍പ്പെടെ 18 പേര്‍ പ്രതികളാകുമെന്നു അന്വേഷണ ഉദ്യോഗസ്ഥര്‍ സ്ഥിരീകരിച്ചു. ഷബിനയുടെ ഭര്‍ത്താവ് ഗസ്നവി, ഭര്‍ത്താവിന്റെ അമ്മ ഗുലെ ആയിഷ, സഹോദരന്മാരായ ആമിര്‍ സുഹെയ്ല്‍, നസ്റുദ്ദീന്‍, ഷെഖു എന്നിവരും കേസില്‍ ഉള്‍പ്പെട്ടിട്ടുണ്ട്. ജില്ലാ മജിസ്‌ട്രേറ്റ് നിധി ഗുപ്തയുടെ നേതൃത്വത്തില്‍ നടന്ന അന്വേഷണത്തിലാണ് ഈ വിവരങ്ങള്‍ പുറത്ത് വന്നത്.
2021 ജനുവരിയിലാണ് ഈ അഴിമതിക്ക് തുടക്കമായത്. തൊഴിലുറപ്പു പദ്ധതിയുമായി ബന്ധപ്പെട്ട് ഗുലെ ആയിഷ തന്റെ സ്വാധീനം ഉപയോഗിച്ച് കുടുംബാംഗങ്ങളെയും മറ്റു ചിലരെയും പദ്ധതിയില്‍ നിയമിച്ച് ജോലി ചെയ്യാതെയും ശമ്പളം നല്‍കുന്നതും ഉണ്ടായിരുന്നതായി കണ്ടെത്തി. 2024-25 സാമ്പത്തിക വര്‍ഷത്തിലും വ്യാജ അക്കൗണ്ടുകളിലൂടെ പണം കൈപ്പറ്റിയതായാണ് കണ്ടെത്തല്‍.
അഴിമതി പുറത്തായതിനെ തുടര്‍ന്ന് പ്രതികളെ അന്വേഷണ വിധേയമായി സസ്പെന്‍ഡ് ചെയ്തു. പൊലീസ് കേസെടുത്ത് തുടര്‍നടപടികളും ആരംഭിച്ചിരിക്കുകയാണ്. ഗുലെ ആയിഷയുടെ ബാങ്ക് അക്കൗണ്ടുകള്‍ മരവിപ്പിച്ച പൊലീസ്, 8.6 ലക്ഷം രൂപയുടെ അഴിമതി തുക ഇതിനോടകം തിരിച്ചുപിടിച്ചതായി റിപ്പോര്‍ട്ടുകള്‍ വ്യക്തമാക്കുന്നു. വില്ലേജ് ഡെവലപ്മെന്റ് ഓഫിസര്‍, അസിസ്റ്റന്റ് പ്രോഗ്രാം ഓഫീസര്‍, കംപ്യൂട്ടര്‍ ഓപ്പറേറ്റര്‍ എന്നിവരും ഈ തട്ടിപ്പില്‍ പങ്കാളികളായതായും കണ്ടെത്തിയിട്ടുണ്ട്. ഇവര്‍ക്കെതിരെയും നിയമനടപടികള്‍ ഉടന്‍ ഉണ്ടാകുമെന്നാണ് സൂചന.
ഇതിനിടെ, ഷബിനയുടെ കുടുംബം ഇതുവരെ ആരും സംഭവവുമായി ബന്ധപ്പെട്ട് ഔദ്യോഗിക പ്രതികരണം നടത്തിയിട്ടില്ല. അതേസമയം, ഷമി ഇപ്പോള്‍ സണ്‍റൈസേഴ്സ് ഹൈദരാബാദ് ടീമിനൊപ്പം ഐപിഎല്‍ മത്സരങ്ങള്‍ക്ക് തയ്യാറാകുകയാണ്.