രാഹുല്‍ മാങ്കൂട്ടത്തിലിനായി വ്യാപക തിരച്ചില്‍; ഡ്രൈവര്‍ കസ്റ്റഡിയിലെടുത്തു ചോദ്യം ചെയ്തു; അടൂരിലും തിരച്ചില്‍, അടുത്ത സുഹൃത്ത് ഫെന്നി നൈനന്റെ വീട്ടില്‍ പരിശോധന; പോലീസ് വീട്ടില്‍ കയറി ഭീഷണിപ്പെടുത്തിയെന്ന് ഫെനി; പാലക്കാട്ടെ ഫ്‌ലാറ്റില്‍ കണ്ടെത്തിയത് ഒരു മാസത്തെ സിസിടിവി ബാക്ക് അപ്; മുന്‍കൂര്‍ ജാമ്യാപേക്ഷ കോടതി പരിഗണിക്കുന്നതിന് മുന്‍പ് കസ്റ്റഡിയിലെടുക്കാന്‍ നീക്കം
രാഹുല്‍ മാങ്കൂട്ടത്തിലിനായി വ്യാപക തിരച്ചില്‍
തിരുവനന്തപുരം: ബലാത്സംഗക്കേസില്‍ പ്രതിയായി ഒളിവില്‍ കഴിയുന്ന പാലക്കാട് എംഎല്‍എയെ പിടികൂടാന്‍ നീക്കം ശക്തമാക്കി പോലീസ്. രാഹുലിനെ കണ്ടെത്താന്‍ വ്യാപക പരിശോധനയാണ് ഇന്ന് നടന്നത്. ഇതിന്റെ ഭാഗമായി രാഹുലിന്റെ ഡ്രൈവറെ പാലക്കാട്ടെ ഫ്‌ലാറ്റില്‍നിന്ന് പോലീസ് കസ്റ്റഡിയിലെടുത്തു ചോദ്യം ചെയ്തു. രാഹുലിന്റെ ഡ്രൈവറായ ആല്‍വിനെയാണ് അന്വേഷണ സംഘം കസ്റ്റഡിയിലെടുത്തത്. രാഹുല്‍ താമസിച്ചിരുന്ന പാലക്കാട്ടെ ഫ്‌ലാറ്റില്‍നിന്ന് ഇയാളെ കസ്റ്റഡിയിലെടുത്ത ശേഷം ചോദ്യം ചെയ്യുകയായിരുന്നു.
ഇതിനിടെ, രാഹുല്‍ മാങ്കൂട്ടത്തിലിന്റെ അടുത്ത സുഹൃത്തായ ഫെന്നി നൈനാന്റെ അടൂരിലുള്ള വീട്ടിലും പൊലീസ് പരിശോധന നടത്തി. രാഹുല്‍ ഈ വീട്ടില്‍ ഒളിവില്‍ കഴിയാന്‍ സാധ്യതയുണ്ടെന്ന സൂചനയുടെ അടിസ്ഥാനത്തിലായിരുന്നു നീക്കം. എന്നാല്‍, പരിശോധനയ്‌ക്കെത്തിയ പൊലീസ് ഉദ്യോഗസ്ഥര്‍ മര്യാദയില്ലാതെയാണ് പെരുമാറിയതെന്ന് ഫെന്നി നൈനാന്‍ പ്രതികരിച്ചു.
പൊലീസ് വീട്ടില്‍ കയറി ഭീഷണിപ്പെടുത്തിയെന്ന് ഫെനി ആരോപിച്ചു. അടൂര്‍ നഗരസഭയിലെ എട്ടാം വാര്‍ഡില്‍ സ്ഥാനാര്‍ഥിയാണ് ഫെനി. തെരഞ്ഞെടുപ്പ് പ്രചാരണത്തിനായി പോയ സമയത്താണ് പൊലീസ് രാഹുലിനെ തേടി ഫെനിയുടെ വീട്ടിലെത്തിയത്. പൊലീസ് എത്തുമ്പോള്‍ അമ്മ മാത്രമാണ് വീട്ടിലുണ്ടായിരുന്നത്. അമ്മ അറിയിച്ചതനുസരിച്ച് വീട്ടിലെത്തിയപ്പോള്‍ പൊലീസ് ഭീഷണിപ്പെടുത്തിയെന്ന് ഫെനി പറഞ്ഞു. തുടര്‍ന്നാണ് അടൂര്‍ സ്റ്റേഷനിലെത്തി കുത്തിയിരുന്ന് പ്രതിഷേധിച്ചത്.
തുടര്‍ന്ന് കോണ്‍ഗ്രസ് നേതാക്കള്‍ സ്ഥലത്തെത്തി പൊലീസുമായി ചര്‍ച്ച നടത്തി. ശേഷം ഫെനിയുമായി സംസാരിച്ച് സമരത്തില്‍ നിന്ന് പിന്തിരിപ്പിക്കുകയായിരുന്നു. ഇനിയും ഫെനിയുടെ വീട്ടില്‍ കയറിയാല്‍ ശക്തമായ പ്രതിഷേധം നടത്തുമെന്ന് കോണ്‍ഗ്രസ് നേതാക്കള്‍ മുന്നറിയിപ്പ് നല്‍കി. രാഹുല്‍ മാങ്കൂട്ടത്തില്‍ എംഎല്‍എയുടെ ഫ്‌ലാറ്റിലെ പരിശോധന പൂര്‍ത്തിയാക്കി അന്വേഷണ സംഘം മടങ്ങി. ഫ്‌ലാറ്റില്‍ ഉള്ളത് ഒരു മാസത്തെ സിസിടിവി ബാക്ക് അപെന്ന് കണ്ടെത്തല്‍. നാളെ അന്വേഷണ സംഘം വീണ്ടും ഫ്‌ലാറ്റില്‍ എത്തും. കെയര്‍ടേക്കറില്‍ നിന്ന് വിവരങ്ങള്‍ തേടും. ഫ്‌ലാറ്റില്‍ നിന്ന് അന്വേഷണ സംഘം വിവരങ്ങള്‍ ശേഖരിച്ചു. രാഹുല്‍ അവസാനം ഫ്‌ലാറ്റില്‍ എത്തിയത് ഉള്‍പ്പെടെയുള്ള ദൃശ്യങ്ങള്‍ അന്വേഷണ സംഘത്തിന് ലഭിച്ചു.
എന്നാല്‍, രാഹുലിന്റെ ഫ്‌ലാറ്റില്‍ നിന്ന് ഫോണുകള്‍ കണ്ടെത്താന്‍ അന്വേഷണ സംഘത്തിനായില്ല. രാഹുല്‍ മുങ്ങിയ വഴി കണ്ടെത്താന്‍ പാലക്കാട് പൊലീസ് പരിശോധന നടന്നു വരികയാണ്. നഗരത്തിലെ 9 ഇടങ്ങളിലെ സിസിടിവികള്‍ പൊലീസ് പരിശോധിക്കുകയാണ്. വ്യാഴാഴ്ച വൈകീട്ട് കണ്ണാടിയില്‍ നിന്നും മുങ്ങിയതു മുതലുള്ള ദുശ്യങ്ങള്‍ ആണ് പരിശോധിക്കുന്നത്. എസ്‌ഐടിയുടെ ആവശ്യപ്രകാരം സ്‌പെഷ്യല്‍ ബ്രാഞ്ച് ആണ് പരിശോധന നടത്തുന്നത്.
ഇന്ന് രാവിലെ ഫ്‌ലാറ്റില്‍ പ്രാഥമിക പരിശോധന പൂര്‍ത്തിയാക്കി ക്രൈംബ്രാഞ്ച് ആസ്ഥാനത്തെത്തിയ അന്വേഷണ സംഘം ജില്ലയിലെ പൊലീസ് ഉദ്യോഗസ്ഥരുമായി കൂടിക്കാഴ്ച നടത്തിയിരുന്നു. ഇതിനുശേഷം വീണ്ടും സ്വകാര്യ വാഹനത്തില്‍ അഞ്ചംഗ സംഘം ഫ്‌ലാറ്റിലെത്തുകയായിരുന്നു. സംഘത്തിലെ എല്ലാവരും ഫ്‌ലാറ്റിലുള്ളില്‍ കയറി പരിശോധന നടത്തി. രാഹുലിനെ കണ്ടെത്താനായി പൊലീസ് വിവിധ കേന്ദ്രങ്ങളില്‍ റെയ്ഡ് തുടരുകയാണ്. മുന്‍കൂര്‍ ജാമ്യാപേക്ഷ കോടതി പരിഗണിക്കുന്നതിന് മുന്‍പ് തന്നെ രാഹുലിനെ കസ്റ്റഡിയിലെടുക്കാനാണ് അന്വേഷണ സംഘത്തിന്റെ ശ്രമം.