ആത്മീയ കാര്യങ്ങളിൽ താൽപ്പര്യമുള്ളവരെ ലക്ഷ്യമിട്ടു; ആഭിചാരക്രിയകളിലും മന്ത്രവാദത്തിലും അസാധാരണമായ കഴിവുകളുണ്ടെന്ന് വിശ്വസിപ്പിച്ചു; വീഡിയോയിലെ ഉള്ളടക്കം കണ്ട് ആകർഷിതയായ യുവതിയെ 'ദിവ്യഗർഭം' ധരിപ്പിക്കാമെന്ന് പറഞ്ഞ് പീഡിപ്പിച്ചു; പിടിയിലായത് കാളികാവുകാരൻ സജിൻ ഷറഫുദ്ദീൻ

മലപ്പുറം: 'ദിവ്യഗർഭം ധരിപ്പിക്കാം' എന്ന് വിശ്വസിപ്പിച്ച് യുവതിയെ ബലാത്സംഗം ചെയ്ത കേസിൽ വ്യാജ ദിവ്യൻ അറസ്റ്റിൽ. മലപ്പുറം കാളികാവ് സ്വദേശിയായ സജിൻ ഷറഫുദ്ദീൻ അറസ്റ്റിലായത്. സാമൂഹിക മാധ്യമത്തിലെ ഒരു ആത്മീയ യൂട്യൂബ് ചാനലിലൂടെ സജീവമായിരുന്ന ഇയാളെ തിരുവനന്തപുരത്തുനിന്നാണ് കൊളത്തൂർ പോലീസ് പിടികൂടിയത്. യുവതിയുടെ പരാതിയെത്തുടർന്ന് നടത്തിയ വിശദമായ അന്വേഷണത്തിനൊടുവിലാണ് പോലീസ് നടപടി.

ആത്മീയ കാര്യങ്ങളിൽ താൽപ്പര്യമുള്ളവരെ ലക്ഷ്യമിട്ടാണ് സജിൻ ഷറഫുദ്ദീൻ തട്ടിപ്പുകൾ നടത്തിയിരുന്നത്. തന്റെ യൂട്യൂബ് ചാനലിലെ ഉള്ളടക്കം കണ്ട് ആകർഷിതയായ പരാതിക്കാരി ഇയാളുമായി ബന്ധം സ്ഥാപിക്കുകയായിരുന്നു. ആഭിചാരക്രിയകളിലും മന്ത്രവാദത്തിലും തനിക്ക് അസാധാരണമായ കഴിവുകളുണ്ടെന്ന് വിശ്വസിപ്പിച്ച് ഇയാൾ യുവതിയുടെ വിശ്വാസം നേടിയെടുത്തു.

തുടർന്ന്, 'ദിവ്യഗർഭം' ഉണ്ടാകുമെന്ന് വ്യാജ വാഗ്ദാനം നൽകി യുവതി താമസിക്കുന്ന ക്വാർട്ടേഴ്സിലേക്ക് അതിക്രമിച്ച് കടന്ന് ബലാത്സംഗം ചെയ്യുകയായിരുന്നുവെന്ന് പോലീസിന് നൽകിയ മൊഴിയിൽ വ്യക്തമാക്കുന്നു. സജിൻ ഷറഫുദ്ദീനെതിരെ സമാനമായ കുറ്റകൃത്യങ്ങൾക്ക് വേറെയും കേസുകൾ നിലവിലുണ്ടെന്ന് കൊളത്തൂർ പോലീസ് ഉദ്യോഗസ്ഥർ സ്ഥിരീകരിച്ചു. ഇയാളുടെ തട്ടിപ്പുകൾക്ക് ഇരയായ നിരവധി സ്ത്രീകൾ ഇതിനോടകം പരാതികളുമായി രംഗത്തെത്തിയിട്ടുണ്ടെന്നും വിവരം ലഭിച്ചിട്ടുണ്ട്.