'ദ്വാരപാലകപാളികള്‍ പോറ്റിക്ക് കൈമാറാന്‍ അനുമതി നല്‍കിയത് ദേവസ്വം ബോര്‍ഡ് പറഞ്ഞിട്ട്; അറ്റകുറ്റപ്പണി സന്നിധാനത്തു തന്നെ നടത്താനാണ് നിര്‍ദേശം നല്‍കിയത്'; ശബരിമല തന്ത്രി കണ്ഠരര് മഹേഷ് മോഹനരുടെ മൊഴി ഇങ്ങനെ; ഗോവര്‍ധന്റെ ബെല്ലാരിയിലെ ജൂവലറിയിലെ പൂജയെ കുറിച്ചുള്ള ചോദ്യത്തില്‍ പൂജകള്‍ക്കായി ക്ഷണിക്കുമ്പോള്‍ പോകാറുണ്ടെന്നും മൊഴി
'ദ്വാരപാലകപാളികള്‍ പോറ്റിക്ക് കൈമാറാന്‍ അനുമതി നല്‍കിയത് ദേവസ്വം ബോര്‍ഡ് പറഞ്ഞിട്ട്
തിരുവനന്തപുരം: ശബരിമല സ്വര്‍ണക്കൊള്ളക്കേസില്‍ തന്ത്രി കണ്ഠരര് മഹേഷ് മോഹനരുടെ മൊഴി രേഖപ്പെടുത്തി പ്രത്യേക അന്വേഷണ സംഘം. 2025ല്‍ ദ്വാരപാലകപാളികള്‍ ഉണ്ണിക്കൃഷ്ണന്‍ പോറ്റിക്ക് കൊണ്ടു പോകാന്‍ അനുമതി നല്‍കിയത് ഉള്‍പ്പെടെയുള്ള കാര്യങ്ങളില്‍ വ്യക്തത തേടിയാണ് മഹേഷ് മോഹനരില്‍ നിന്ന് മൊഴിയെടുത്തത്. ദേവസ്വം ബോര്‍ഡ് പറഞ്ഞിട്ടാണ് ദ്വാരപാലകപാളികള്‍ പോറ്റിയുടെ കൈവശം കൊടുത്തുവിടാന്‍ അനുമതി നല്‍കിയതെന്ന് മഹേഷ് മോഹനര് മൊഴി നല്‍കി.
വാതിലും കട്ടിളപ്പാളികളും കൂടി കൊണ്ടു പോകാനുള്ള അനുമതി കൂടി തേടിയിരുന്നു. എന്നാല്‍, ഇവയുടെ അറ്റകുറ്റപ്പണി സന്നിധാനത്തു തന്നെ നടത്താനാണ് നിര്‍ദേശം നല്‍കിയതെന്നും മഹേഷ് മോഹനരുടെ മൊഴിയിലുണ്ട്. ഗോവര്‍ധന്റെ ബെല്ലാരിയിലെ ജൂവലറിയില്‍ പൂജ നടത്തിയതുമായി ബന്ധപ്പെട്ട ചോദ്യത്തിന് പൂജകള്‍ക്കായി ക്ഷണിക്കുമ്പോള്‍ പോകാറുണ്ടെന്നായിരുന്നു മൊഴി.
ശബരിമല സ്വര്‍ണക്കൊള്ളക്കേസുമായി ബന്ധപ്പെട്ട് എസ്ഐടിയുടെ മൊഴിയെടുപ്പുകള്‍ ഉള്‍പ്പെടെയുള്ള പ്രധാനപ്പെട്ട ഘട്ടം പൂര്‍ത്തിയായിക്കഴിഞ്ഞു. ഈ ഘട്ടത്തിലെ അറസ്റ്റുകള്‍ ഉള്‍പ്പെടെയുള്ള വിവരങ്ങള്‍ ഉള്‍പ്പെടുത്തിക്കൊണ്ടുള്ള റിപ്പോര്‍ട്ടാണ് ബുധനാഴ്ച എസ്ഐടി കോടതിയില്‍ സമര്‍പ്പിക്കുക.
ശബരിമല സ്വര്‍ണക്കൊള്ളക്കേസിലെ തിരുത്ത് അംഗീകരിച്ച് എ പത്മകുമാര്‍ മൊഴി നല്‍കിയതോടെ ദേവസ്വം ബോര്‍ഡ് അംഗങ്ങളായ മറ്റുള്ളവരെ കൂടിചോദ്യം ചെയ്യേണ്ടി വരും. 2019-ലെ ദേവസ്വം ബോര്‍ഡംഗങ്ങളായ കെ.പി. ശങ്കര്‍ദാസിനെയും എന്‍. വിജയകുമാറിനെയും പ്രതിയാക്കാത്തത് കോടതിയില്‍ ചോദ്യം ചെയ്യുകയാണ് പത്മകുമാര്‍. ഇവര്‍ക്കുള്ള പരിരക്ഷ തനിക്ക് കിട്ടാത്തത് എന്തുകൊണ്ടാണെന്ന ചോദ്യമാണ് ഉയര്‍ത്തുന്നത്.
ശ്രീകോവില്‍ കട്ടിളയിലെ സ്വര്‍ണപ്പാളികളിലെ സ്വര്‍ണം തട്ടിയ കേസില്‍ 2019-ലെ ദേവസ്വം ബോര്‍ഡ് എട്ടാം പ്രതിയാണ്. അതായത് പ്രസിഡന്റും ബോര്‍ഡ് അംഗങ്ങളും പ്രതികള്‍. ബോര്‍ഡ് തീരുമാനപ്രകാരമാണ് എല്ലാകാര്യങ്ങളും നടന്നതെന്നിരിക്കെ കൂട്ടുത്തരവാദിത്വത്തില്‍നിന്ന് അംഗങ്ങള്‍ക്കും ഒഴിഞ്ഞുമാറാന്‍ കഴിയില്ലെന്ന നിലപാടാണ് ജാമ്യാപേക്ഷയിലൂടെ പത്മകുമാര്‍ മുന്നോട്ടുവെക്കുന്നത്. ശങ്കര്‍ദാസിന്റെയും വിജയകുമാറിന്റെയും മൊഴി പ്രത്യേക അന്വേഷണസംഘം എടുത്തിട്ടുണ്ടെങ്കിലും വിശദമായ ചോദ്യംചെയ്യല്‍ ഉണ്ടായിട്ടില്ല. ഇതിന് കാരണം തേടുകയാണ് പത്മകുമാര്‍. കൊല്ലം കോടതിയില്‍ ജാമ്യ ഹര്‍ജി തള്ളിയാല്‍ ഹൈക്കോടതിയിലും പോകും. ഈ വിഷയം അവിടേയും ചര്‍ച്ച ചെയ്യും. ഇരട്ട നീതിയുണ്ടെന്നാണ് പത്മകുമാര്‍ മുമ്പോട്ട് വയ്ക്കുന്നത്.
ദേവസ്വം കമ്മിഷണറായിരുന്ന എന്‍. വാസുവും ഉദ്യോഗസ്ഥരായ മുരാരി ബാബു, ഡി. സുധീഷ് കുമാര്‍ എന്നിവരും ചേര്‍ന്ന് തയ്യാറാക്കിയ റിപ്പോര്‍ട്ടാണ് ദേവസ്വം ബോര്‍ഡിന്റെ പരിഗണനയ്ക്കു വന്നിരുന്നത്. കട്ടിള പൊതിഞ്ഞ സ്വര്‍ണപ്പാളി എന്നല്ല, പിച്ചളപ്പാളി എന്നാണ് ഈ റിപ്പോര്‍ട്ടിലുണ്ടായിരുന്നത്. ഇതിലെ പിച്ചള, പത്മകുമാര്‍ പച്ചമഷികൊണ്ട് വെട്ടി ചെമ്പെന്ന് എഴുതിച്ചേര്‍ത്തു. റിപ്പോര്‍ട്ടില്‍ ചെമ്പ് എന്നെഴുതിച്ചേര്‍ത്തതിനെയും പത്മകുമാര്‍ ജാമ്യാപേക്ഷയില്‍ ന്യായീകരിക്കുന്നുണ്ട്. അടിസ്ഥാന ലോഹം ചെമ്പായതിനാലാണ് ഇങ്ങനെ ചെയ്തതെന്നാണ് വാദം. ഏതായാലും വെട്ടിഎഴുതിയത് പത്മകുമാര്‍ സമ്മതിക്കുന്നു. എന്തുകൊണ്ട് സ്വര്‍ണ്ണം മറച്ചുവെന്ന ചോദ്യം അപ്പോഴും പ്രസക്തം.
ഇതിലൊന്നും പങ്കില്ലെന്നാണ് ശങ്കര്‍ദാസും വിജയകുമാറും പ്രത്യേക അന്വേഷണസംഘത്തിനോട് വ്യക്തമാക്കിയത്. രണ്ടുപേരും ബോര്‍ഡ് തീരുമാനത്തില്‍ വിയോജിപ്പുണ്ടെന്ന് രേഖാമൂലം അറിയിച്ചിട്ടില്ലാത്തതിനാല്‍ ക്രമവിരുദ്ധമായ കാര്യങ്ങളാണ് നടക്കുന്നതെന്ന് അറിഞ്ഞില്ലെന്ന വാദം നിലനില്‍ക്കില്ല. എതിര്‍ക്കാതിരുന്നത് ക്രമക്കേടിന് കൂട്ടുനിന്നതിന് തുല്യമാണ്. എന്നിട്ടും ഇവരെ അറസ്റ്റു ചെയ്യുന്നില്ല. ഇതില്‍ ശങ്കര്‍ദാസ് മാപ്പുസാക്ഷിയാകാനും സന്നദ്ധനാണ്. എന്നാല്‍ ഇതിലേക്ക് പോകാനും അറസ്റ്റു രേഖപ്പെടുത്തണം. അതിന് ശേഷം പ്രതിയെ മാപ്പുസാക്ഷിയാക്കി മാറ്റണം. ഇതിനുള്ള നീക്കവും അണിയറയില്‍ സജീവമാണ്. ശബരിമല ശ്രീകോവിലിലെ ദ്വാരപാലക ശില്പങ്ങളില്‍ സ്വര്‍ണം കുറഞ്ഞ് ചെമ്പ് തെളിഞ്ഞെന്ന തന്ത്രിയുടെ കുറിപ്പ് പ്രത്യേക അന്വേഷണസംഘം ഗൗരവത്തിലെടുത്തിട്ടുണ്ട്. ശാസ്ത്രീയപരിശോധനാഫലവുമായി ഒത്തുനോക്കി നിജസ്ഥിതി ഉറപ്പിക്കാനുള്ള നീക്കം തുടങ്ങി.
2019-ലെ തട്ടിപ്പ് ഇക്കൊല്ലം പുറത്തുവന്നപ്പോള്‍ ആദ്യം അന്വേഷണം നടത്തിയ ദേവസ്വം വിജിലന്‍സിന്റെ റിപ്പോര്‍ട്ടിലാണ് സ്വര്‍ണം കുറഞ്ഞ് ചെമ്പ് തെളിഞ്ഞെന്ന തന്ത്രിയുടെ പരാമര്‍ശമുള്ളത്. തന്ത്രി കണ്ഠര് രാജീവരില്‍നിന്നാണ് അന്നത്തെ അഡ്മിനിസ്‌ട്രേറ്റീവ് ഓഫീസറായിരുന്ന മുരാരി ബാബു അഭിപ്രായം എഴുതിവാങ്ങിയിരുന്നത്. 'ദ്വാരപാലകരിലും ശ്രീകോവിലിന്റെ തെക്കും വടക്കുമുള്ള മൂലകളിലും പൂശിയിട്ടുള്ള സ്വര്‍ണം കുറഞ്ഞ് ചെമ്പ് തെളിഞ്ഞതിനാല്‍ പുതിയതായി സ്വര്‍ണംപൂശി വൃത്തിയാക്കിവെക്കുന്നതിന് അനുവദിക്കാവുന്നതാണ്.' എന്നാണ് തന്ത്രിയുടെ കുറിപ്പില്‍ കാണുന്നതെന്ന് വിജിലന്‍സ് റിപ്പോര്‍ട്ടിലുണ്ടായിരുന്നു.